ក្រុមហ៊ុនបារាំង AFI KLM E&M សម្រេចបានកិច្ចព្រមព្រៀងជាមួយខេមបូឌា អ៊ែរវ៉េ​ លើការផ្តល់សេវាថែទាំលើសេវាថែទាំយន្តហោះ

ក្រុមហ៊ុនអាកាសចរណ៍ Air France Industries KLM Engineering & Maintenance (AFI KLM E&M) បានប្រកាសពីកិច្ចព្រមព្រៀង ជាមួយក្រុមហ៊ុនអាកាសចរណ៍​ខេមបូឌា អ៊ែរវ៉េ (Cambodia Airways) ក្នុងការផ្តល់សេវាថែទាំ និងការគាំទ្រនូវប្រតិបត្តិការអាជីវកម្មមួយចំនួន។

កិច្ចសន្យា​មានរយៈពេល ៥ ឆ្នាំ​នេះ ដែលក្រុមហ៊ុន AFI KLM E&M នឹងផ្តល់សេវាកម្មថែទាំ និងការធ្វើប្រតិបត្តិការនានាដល់ក្រុមហ៊ុនអាកាសចរណ៍ Cambodia Airways សម្រាប់យន្តហោះ Airbus A៣១៩ និង A៣២០ ​។

​​នៅក្រោមកិច្ចព្រមព្រៀងនេះ AFI ​​KLM E&M នឹងផ្តល់នូវសេវាកម្មដ៏ទូលំទូលាយ រួមមានការថែទាំនានា ការជួសជុល ផ្នែកភស្តុភារកម្ម និងកន្លែងដែលចាំបាច់មួយចំនួនទៀត។

«កិច្ចសហការនេះធ្វើឡើងក្នុងគោលបំណងធានាឱ្យក្រុមហ៊ុនអាកាសចរណ៍ខេមបូឌា អ៊ែរវ៉េ ទទួលបានការគាំទ្រប្រតិបត្តិការប្រកបដោយប្រសិទ្ធិភាព ដែលមានសារៈសំខាន់សម្រាប់ការរក្សាបាននូវដំណើរការខ្ពស់ និងភាពជឿជាក់នៃយន្តហោះរបស់ខ្លួន។ តាមរយៈការរួមបញ្ចូលសេវាកម្មទាំងនេះ ក្រុមហ៊ុនអាកាសចរណ៍នឹងទទួលបានការបង្កើនប្រសិទ្ធភាពប្រតិបត្តិការរបស់ខ្លួន កាត់បន្ថយពេលវេលារងចាំ និងរក្សាស្តង់ដារសុវត្ថិភាព និងការអនុវត្តដ៏ខ្ពស់បំផុត»។

​លោក Edison Duan ក្រុមប្រឹក្សាភិបាល និងជានាយកប្រតិបត្តិនៃក្រុមហ៊ុនអាកាសចរណ៍ Cambodia Airways បានមានប្រសាសន៍ថា៖«យើងមានសេចក្តីរំភើបរីករាយក្នុង​ភាពជាដៃគូថ្មីនេះជាមួយក្រុមហ៊ុន Air France Industries KLM Engineering & Maintenance​ ។ កិច្ចព្រមព្រៀងរយៈពេល ៥ ឆ្នាំ​នឹងបង្កើនភាពជឿជាក់ និងប្រសិទ្ធភាពប្រតិបត្តិការយ៉ាងសំខាន់នៃយន្តហោះ A319 និង A320 របស់យើង»។

តាមរយៈការប្រើប្រាស់ជំនាញរបស់ AFI KLM E&M ក្នុងការគាំទ្រនូវសេវានេះ យើងមានទំនុកចិត្តថាយើងនឹងបន្តផ្តល់ជូនអ្នកដំណើររបស់យើងនូ​សុវត្ថិភាព និងសេវាកម្មដ៏ល្អបំផុត ខណៈពេលដែល​ការប្តេជ្ញាចិត្តរបស់យើងចំពោះការរីកចម្រើន និងឧត្តមភាពនៅក្នុងឧស្សាហកម្មអាកាសចរណ៍»។

​ក្រុមហ៊ុនអាកាសចរណ៍ Cambodia Airways ដែលបានចាប់ផ្តើមប្រតិបត្តិការក្នុងខែកក្កដា ឆ្នាំ ២០១៨ បានក្លាយជាក្រុមហ៊ុនអាកាសចរណ៍ដ៏លេចធ្លោមួយនៅក្នុងឧស្សាហកម្មអាកាសចរណ៍នៅអាស៊ីអាគ្នេយ៍។ កិច្ចសន្យាថ្មីជាមួយ AFI KLM E&M បង្ហាញពីកិច្ចខិតខំប្រឹងប្រែងដែលកំពុងបន្តរបស់ ខេមបូឌា អ៊ែរវ៉េ ក្នុងការលើកកម្ពស់ការផ្តល់សេវា និងសមត្ថភាពប្រតិបត្តិការរបស់ខ្លួន៕