កម្ពុជារកចំណូលបានជាង ៣៣៥​លានដុល្លារពីការនាំចេញអង្ករនៅក្នុងរយៈពេល៩ខែកន្លងមកនេះ

សហព័ន្ធស្រូវអង្ករកម្ពុជា (CRF) បានរាយការណ៍ថា ក្នុងរយៈពេល ៩ខែ នៃឆ្នាំ២០២៤ កម្ពុជាបាននាំចេញអង្ករចំនួន ៤៤៥ ៩១៣តោន ឬគិតជាទឹកប្រាក់ចំនួន​ ៣៣៥,៤០​លានដុល្លារ ទៅកាន់គោលដៅចំនួន ៦៥ នៅក្នុងតំបន់ និងលើពិភពលោកក្នុងរយៈពេល៩ខែដើមឆ្នាំ២០២៤នេះ។

បើតាម CRF ជាមួយនឹងបរិមាណនៃការនាំចេញនេះ គឺត្រូវធ្វើឡើងតាមរយៈក្រុមហ៊ុននាំចេញអង្ករចំនួន ៥៤ ក្រុមហ៊ុន ទៅកាន់គោលដៅចំនួន ៦៥ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ​២៦ ​បានបរិមាណអង្ករចំនួន ២២៨ ​៧៣១ តោន គិតជាទឹកប្រាក់ចំនួន ១៨៦.៦៧​ លានដុល្លារសហរដ្ឋអាមេរិក  ទៅកាន់ប្រទេសចិន ​រួមទាំងហុងកុង និងម៉ាកាវ ចំនួន ៨១ ៤២៣ តោន គិតជាទឹកប្រាក់ចំនួន ៥២.៦៣ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន         ៨៦ ០៤៣ តោន​ គិតជាទឹកប្រាក់ចំនួន ៥២.២៣ លានដុល្លារសហរដ្ឋអាមេរិក និងទៅកាន់      គោលដៅ ២៩ ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន   ៤៩ ៧១៦ តោន គិតជាទឹកប្រាក់ចំនួន  ៤៣.៨៧ លានដុល្លារសហរដ្ឋអាមេរិក។

លោក លន់ យ៉េង អគ្គលេខាធិការនៃ CRF  ថ្លែងប្រាប់កម្ពុជាថ្មីនៅថ្ងៃទី១៥ខែតុលានេះថា ស្ថានភាពនៃការនាំចេញនៅតែមានភាពល្អប្រសើរ ជាពិសេសការនាំចេញទៅកាន់ទីផ្សារអឺរ៉ុប។

​លោកបានគូសបញ្ជាក់ថា៖«តាមការសង្កេតរបស់ខ្ញុំ យើងនៅតែធ្វើការនាំចេញអង្ករទៅកាន់ទីផ្សារដែលមានស្រាប់ ហើយទីផ្សារចិនអាចនឹងមានតម្រូវការខ្ពស់នៅចុងឆ្នាំនេះ។ លើសពីនោះទៅទៀត ខ្ញុំមើលឃើញថាការនាំចេញទៅកាន់ទីផ្សារអឺរ៉ុបកាន់តែសន្ទុះខ្លាំងជាងឆ្នាំមុន ដោយសារតែមានតម្រូវការអង្ករក្រអូបខ្ពស់»។

បើតាមលោកលន់ យ៉េង សម្រាប់តម្លៃស្រូវ និងតម្លៃអង្ករនៅក្នុងឆ្នាំ២០២៤នេះគឺពុំមានការប្រែប្រួលខ្លាំងឡើយ បើទោះបីជាមានតម្រូវការនៅទីផ្សារខាងក្រៅក្តី។

របាយការណ៍ដដែលគូសបញ្ជាក់ថា ចំពោះប្រភេទអង្ករ បាននាំចេញអង្ករក្រអូបចំនួន ៧២.០១% ប្រភេទអង្ករស ធម្មតា​ ២២.៥២% អង្ករចំហ៊ុយ ៣.៣១% អង្ករសរីរាង្គចំនួន ១.៨២%  និងអង្ករផ្សេងៗចំនួន ០.៣៤% ។

ជាមួយគ្នានេះដែរ បើតាម CRF ប្រទេសកម្ពុជាក៏បាននាំចេញស្រូវចំនួន ៣,៣៦៨,០១២ តោនស្រូវសើម ដែលគិតជាទឹកប្រាក់បានប៉ាន់ប្រមាណជាង ១ ០៦៦.១៤ លានដុល្លារសហរដ្ឋអាមេរិក ដែលក្នុងនោះ ៨៦.៣០ % បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច៕