​ DBD នឹង​បោះផ្សាយមូលបត្របំណុលនៅខែកុម្ភៈឆ្នាំ២០២៥ដើម្បីប្រមូលទុន៥លានដុល្លារ

ក្រុមហ៊ុន DBD ក្រុមហ៊ុន​វិស្វកម្ម និង​សំណង់​ពហុ​បំណងនឹងកៀរគរទុនចំនួន ៥ លានដុល្លារពីការបោះផ្សាយមូលបត្របំណុលតាមរយៈផ្សារមូលបត្រកម្ពុជាដើម្បីពង្រីកការវិនិយោគរបស់ខ្លួនបន្ថែមទៀត ជាពិសេសបម្រើជាទុនបង្វិលលើគម្រោងវិនិយោគរបស់ខ្លួន។

បើតាមសេចក្តីជូនដំណឹងរបស់ក្រុមហ៊ុនថ្ងៃទី២៩ ខែវិច្ឆិកា ស្តីពី ការបោះផ្សាយមូលបត្របំណុល​នេះ ថា ​ យោងតាមកិច្ចប្រជុំមហាសន្និបាតភាគហ៊ុនិកវិសាមញ្ញ ដែលបានប្រព្រឹត្តទៅនាថ្ងៃពុធ ​ទី២៧ ខែវិច្ឆិកា គ.ស. ២០២៤ ​ តាមប្រព័ន្ធអនឡាញ ​ ក្រុមហ៊ុនបានទទួលការអនុម័តពីភាគហ៊ុនិក លើការបោះផ្សាយមូលបត្របំណុលដែលមានបុគ្គលធានាសម្រាប់វិនិយោគិនគុណវុឌ្ឍិ ចំនួន ៥ លានដុល្លារអាមេរិក រយៈពេល ៥ ឆ្នាំ។

«ក្រុមហ៊ុននឹងប្រើប្រាស់ទឹកប្រាក់ដែលទទួលបានពីការបោះផ្សាយមូលបត្របំណុលនេះ ដើម្បីបង្កើនទុនបង្វិលរបស់ក្រុមហ៊ុន»។ នេះបើយោងតាមសេចក្តីជូនដំណឹងនេះ។

បើតាមសេចក្តីជូនដំណឹងដដែល ក្រុមហ៊ុនកំពុងបន្តរៀបចំនូវនីតិវិធី និងបំពេញបែបបទទៅតាមច្បាប់ និងបទប្បញ្ញត្តិ ដែលតំណាងស្របច្បាប់ដោយលោក នាង វិធី ប្រធានក្រុមប្រឹក្សាភិបាល និងអគ្គនាយកក្រុមហ៊ុន ក្នុងការចុះហត្ថលេខាលើឯកសារទាំងអស់ដែលពាក់ព័ន្ធជាមួយការបោះផ្សាយមូលបត្របំណុលនេះ។

«ក្រុមហ៊ុនរំពឹងថា នឹងអាចចុះបញ្ជីបោះផ្សាយលក់មូលបត្របំណុលដែលមានបុគ្គលធានានៅលើ ផ្សារមូលបត្រកម្ពុជា (ផមក) នៅក្នុងខែមករា ឬដើមខែកុម្ភៈ ​ ២០២៥ ខាងមុខ»។ នេះបើយោងតាមសេចក្តីជូនដំណឹងនេះ។

ត្រីមាសទី៣ ឆ្នាំ២០២៤ ក្រុមហ៊ុនមានប្រាក់ចំណូលសរុប ៦,១៤៧ ពាន់លានរៀល ដែលថយចុះចំនួន ៦៦,៧៧% បើធៀបនឹងត្រីមាសដូចគ្នានៃឆ្នាំ ២០២៣ ដែលមានចំនួន ១៨,៤៩៥​ ពាន់លានរៀល។ នេះបើយោងតាមរបាយការណ៍ហិរញ្ញវត្ថុរបស់ក្រុមហ៊ុន

​​ជាមួយគ្នានេះដែរ ប្រាក់ចំណូលចំនួនជាង ៦​ ពាន់លានរៀល គឺជាចំណូលដែលបានពីគម្រោងសាងសង់ និងសេវា ជួសជុល រីឯ ៦០,៤៨២ លានរៀល ជាចំណូលពីការលក់សម្ភារៈសំណង់។ ក្រុមហ៊ុនមានខាតលម្អិតក្នុងការិយបរិច្ឆេទចំនួន ៦,៣០៤​ ពាន់លានរៀល សម្រាប់ត្រីមាសនេះ។ ទ្រព្យសកម្មសរុបមានការថយចុះចំនួន ២០,៣៣% បើធៀបនឹងឆ្នាំ២០២៣ ដែលបានថយចុះពី ចំនួនជិត ៨៤ ពាន់លានរៀល ទៅជិត ៦៧ ពាន់លានរៀល ។

ក្រុមហ៊ុន​DBD ត្រូវបាន​បង្កើតឡើង​កាលពី​ឆ្នាំ​១៩៩៥ ផ្តល់​សេវា​ការ​រចនា ការសាងសង់ ការដំឡើង និង​ការ​កម្ម​ថែទាំ​។ នេះ​បើ​យោងតាម​ឯកសារ​របស់ក្រុមហ៊ុនចេញផ្សាយកន្លងមក​៕