ព័ត៌មានអន្ដរជាតិ

តម្លៃប្រេងកើនឡើងពេលបើកការជួញដូរ ដោយសុទិដ្ឋិនិយមលើគោលនយោបាយជំរុញកំណើនសេដ្ឋកិច្ចអាមេរិក

បានផុស

១ year មុន

នៅ

ថ្ងៃចន្ទ ២៣ ធ្នូ ២០២៤

ដោយ

តម្លៃប្រេងបានកើនឡើងតិចតួចសម្រាប់ការជួញដូរនៅថ្ងៃចន្ទនេះ ជុំវិញសុទិដ្ឋិនិយមស្ដីពីគោលនយោបាយជំរុញកំណើនសេដ្ឋកិច្ចរបស់រដ្ឋាភិបាលសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានកើនឡើង ២៦ សេន ឬ ០,៤ ភាគរយ ដល់ ៧៣,២០ ដុល្លារ/បារ៉ែល ខណៈប្រេងឆៅអាមេរិក ម៉ាក West Texas Intermediate (WTI) បានកើនឡើង ៣១ សេន ឬ ០,៥ ភាគរយ ដោយជួញដូរនៅតម្លៃ ៦៩,៧៧ ដុល្លារ/បារ៉ែល។

តម្លៃប្រេងទាំង២បានធ្លាក់ចុះជាង ២ ភាគរយ ក្នុងអត្រាប្រចាំសប្ដាហ៍ ពេលបញ្ចប់ការជួញដូរនៅថ្ងៃសុក្រសប្តាហ៍មុន ដោយសារក្តីបារម្ភអំពីកំណើនសេដ្ឋកិច្ចពិភពលោក និងតម្រូវការប្រេង បន្ទាប់ពីធនាគារកណ្តាលអាមេរិក បានបង្ហាញពីការប្រុងប្រយ័ត្នចំពោះការបន្ធូរបន្ថយគោលនយោបាយរូបិយវត្ថុនៅឆ្នាំក្រោយ។

យ៉ាងណាមិញ សុទិដ្ឋិយមដែលជំរុញតម្លៃប្រេង បានកើតឡើងជុំវិញទិន្នន័យរបស់រដ្ឋាភិបាលអាមេរិកដែលចេញផ្សាយកាលពីថ្ងៃសុក្រ ស្ដីពីសន្ទស្សន៍មួយនៃអតិផរណា។ នៅក្នុងខែវិច្ឆិកា សន្ទស្សន៍ការចំណាយលើការប្រើប្រាស់ផ្ទាល់ខ្លួន (PCE) ដែលដកចេញនូវថ្លៃម្ហូបអាហារ និងថាមពល ហើយរងការតាមដានយ៉ាងជិតស្និទ្ធដោយធនាគារកណ្ដាលអាមេរិក បានកើនឡើងត្រឹម ០,១ ភាគរយ ប៉ុណ្ណោះ ខណៈវាកើនប្រមាណ ០,៣ ភាគរយ នៅខែតុលា។ ប្រសិនបើអតិផរណាថយចុះ នោះនឹងបើកផ្លូវឱ្យធនាគារកណ្ដាលកាត់បន្ថយអត្រាការប្រាក់បន្ថែមទៀត ដែលនេះជាធម្មតាតែងជំរុញសកម្មភាពសេដ្ឋកិច្ច និងតម្រូវការប្រេង។

លើសពីនេះ ប្រធានាធិបតីជាប់ឆ្នោតសហរដ្ឋអាមេរិក លោក ដូណាល់ ត្រាំ កាលពីថ្ងៃសុក្រ បានជំរុញឱ្យសហភាពអឺរ៉ុបបង្កើនការនាំចូលប្រេងពីអាមេរិក បើមិនដូច្នោះទេ នឹងរងនូវពន្ធនាំចូលអាមេរិក។ គណៈកម្មការអឺរ៉ុបបាននិយាយថា ខ្លួនបានត្រៀមខ្លួនរួចជាស្រេចដើម្បីពិភាក្សាជាមួយលោក ត្រាំ ពីរបៀបពង្រឹងទំនាក់ទំនង ទាំងក្នុងវិស័យថាមពល៕