​អេស៊ីលីដានឹងធ្វើការបោះផ្សាយសញ្ញាបណ្ណបន្ទាប់បន្សំដើម្បីកៀរគរទុនសម្រាប់ពង្រីកអាជីវកម្មរបស់ខ្លួន

ធនាគារ អេស៊ីលីដា ភីអិលស៊ីដែលជាធនាគារក្នុងស្រុកឈានមុខគេមួយរបស់កម្ពុជាបានទទួលការអនុញ្ញាតពីធនាគារជាតិ នៃ កម្ពុជា (NBC) ក្នុងការ​បោះផ្សាយលក់សញ្ញាបណ្ណបន្ទាប់បន្សំ (Subordinated Bond) នៅផ្សារមូល បត្រកម្ពុជា(CSX) ដើម្បីប្រមូលទុនបន្ថែមក្នុងការពង្រីកអាជិវកម្មរបស់ខ្លួន។​

យោងតាមសេចក្តីជូនដំណឹងរបស់ធនាគារ អេស៊ីលីដា ផ្ញើរទៅកាន់ CSX ការអនុញ្ញាតរបស់ NBC ដល់ខ្លួនលើការបោះផ្សាយសញ្ញាបណ្ណបន្ទាប់បន្សំនេះគឺជាការបើកផ្លូវក្នុងការកៀរគទុនតាមរយៈ CSX ដើម្បីទទួលបានទុនបន្ថែមក្នុងការពង្រីកអាជីវកម្ម និងសកម្មភាពនានារបស់ធនាគារ។

សេចក្តីជូនដំណឹងនេះបានលើកឡើងថា៖«ធនាគារ អេស៊ីលីដា ភីអិលស៊ី ជាធនាគារពាណិជ្ជទីមួយដែលបានបោះផ្សាយលក់មូលបត្រកម្មសិទ្ធិជាសាធារណៈនៅផ្សារមូលបត្រកម្ពុជា(CSX) សូមជម្រាបជូនដំណឹងដល់វិនិយោគិន និងសាធារជនជ្រាបថា ធនាគារ អេស៊ីលីដា បានទទួលការអនុញ្ញាតពីធនាគារជាតិ នៃកម្ពុជា ក្នុងការបោះផ្សាយលក់សញ្ញាបណ្ណបន្ទាប់បន្សំ នៅលើCSX សម្រាប់ប្រើប្រាស់ជាដើមទុន សកម្មភាពធនាគារទូទៅ និងគោលដៅសាជីវកម្មផ្សេងៗទៀត របស់ធនាគារ អេស៊ីលីដា»។

អេស៊ីលីដាបានគូសបញ្ជាក់ទៀតថា ការបោះផ្សាយលក់សញ្ញាបណ្ណបន្ទាប់បន្សំនេះ នឹងរួមចំណែកអនុវត្តស្របតាមយុទ្ធសាស្រ្តរបស់រាជរដ្ឋាភិបាលក្នុងការលើកស្ទួ និងអភិវឌ្ឍសេដ្ឋកិច្ចប្រទេសកម្ពុជា។ ធនាគារ អេស៊ីលីដា ភីអិលស៊ី  កំពុងរៀបចំបំពេញតាមលក្ខខណ្ឌតម្រូវរបស់អាជ្ញាធរពាក់ព័ន្ធ។

លោក ស៊ូ សុជាតិ អគ្គនាយកនៃនិយតករមូលបត្រកម្ពុជា បានថ្លែងមកកាន់កម្ពុជាថ្មីនៅព្រឹកថ្ងៃទី៩ ខែមករាថា ការអនុញ្ញាតរបស់ NBC គឺជាការបើកផ្លូវដល់អេស៊ីលីដាក្នុងការរៀបចំនីតិវិធីបន្តដើម្បីធ្វើការបោះផ្សាយនូវសញ្ញាបណ្ណបន្ទាប់បន្សំនេះជាផ្លូវការ។

លោកបានថ្លែងថា៖«សម្រាប់សញ្ញាបណ្ណបន្ទាប់បន្សំនេះគឺប្រភេទមួយនៃសញ្ញាបណ្ណទូទៅ ដែលជាធម្មតាដែលភាគច្រើនត្រូវបានបោះផ្សាយដោយគ្រឹះស្ថានធនាគារដែលជាការកំណត់អាទិភាពនៃស្ថាប័នទាំងនោះក្នុងការបោះផ្សាយ»។​

លោកថា នាពេលបច្ចុប្បន្ន SERC ពុំទាន់ទទួលបាននូវព័ត៌មានលំអិតនៃការបោះផ្សាយនេះនៅឡើយទេ ដោយសារតែធនាគារទើបទទួលបានការអនុញ្ញាតពី NBC។ លោកក៏ពុំអាចបញ្ចាក់ថាតើធនាគារនេះនឹងធ្វើការប្រមូលទុនប៉ុន្មានលានដុល្លារពីការបោះផ្សាយនេះនៅឡើយទេ។

 កាលពីថ្ងៃទី១៥ ខែឧសភា ឆ្នាំ២០២០ ធនាគារអេស៊ីលីបានធ្វើការបោះផ្សាយមូលតប្រ​កម្មសិទ្ធិម្តងរួចទៅហើយនៅ CSX ដោយប្រមូលទុនបានចំនួន ១៧,៥ លានដុល្លារ៕