អ្នកជំនាញអះអាង ការទាក់ទាញវិនិយោគនៅក្នុងវិស័យ​ឧស្សាហកម្ម និងសេវាកម្ម ក៏ជាការជួយគ្រួសារកសិករ

លោក ច័ន្ទ សុផល ប្រធានមជ្ឈមណ្ឌលសិក្សាគោលនយោបាយ និងជាអ្នកជំនាញក្នុងវិស័យកសិកម្ម បានលើកឡើងថា ​វិនិយោគ​រាប់​ពាន់​លាន​ដុល្លារ​ នៅក្នុង​បី​ទស្សវត្សរ៍​កន្លង​មក​ ទៅ​លេី​គម្រោង​ធារាសាស្ត្រ​ គម្រោង​ផ្លូវ ​និង​ស្ពាន​ គម្រោង​កសិកម្ម​ និង​គម្រោង​អភិវឌ្ឍ​ជនបទ​ សុទ្ធតែ​ជា​ប្រយោជន៍​​បម្រើ​ឱ្យ​កសិករ​នៅ​ជនបទ​។

គម្រោង​ទាំង​នេះ​ជួយ​រួម​ចំណែក​បង្កើន​ផលិត​ភាព​កសិកម្ម​ កសិឧស្សាហកម្ម​ និង​ពាណិជ្ជកម្ម​កសិផល​។​ លោក ចាន់ សុផលបានអះអាងថា ការ​ទាក់ទាញ​វិនិយោគ​នៅ​ក្នុង​វិស័យ​ឧស្សាហកម្ម​ និង​សេវាកម្ម​ ដេីម្បី​ផ្តល់​ការងារ​ឱ្យ​កូន​កសិករ​ ក៏​ជាការ​ជួយ​ដល់​គ្រួសារ​កសិករ​ដែរ។

បើតាមអ្នកជំនាញរូបនេះ ការ​ផ្តល់​ប្រាក់​កម្ចី​ជាង​ ២០០ លានដុល្លារ​ ដល់​ក្រុមហ៊ុន​ម៉ាស៊ីន​ស្រូវ​ គ្រាន់​តែ​ជា​ចំណែក​តូច​មួយ​នៃ​ការ​ជួយ​គ្រួសារ​កសិករ​ ពោលគឺនៅ​មាន​ការងារ​ជាច្រើន​ទៀត​ ដែល​ត្រូវ​បន្ត​ធ្វើ​ដេីម្បី​ជួយ​ដល់​កសិករ​។

សូមជំរាបថា ចាប់តាំងពីដើមខែមករា ឆ្នាំ ២០២៥ តម្លៃស្រូវអូអឹម បានធ្លាក់ចុះយ៉ាងគំហុកតម្លៃក្រោម ៨០០ រៀល គ្រាដែលពិភពលោកកំពុងចួបបញ្ហាគ្រោះអេលីណូ ខណៈប្រទេសឥណ្ឌាបានប្រកាសថា នឹងឱ្យនាំចេញអង្ករវែងរបស់គាត់វិញ ខណៈ​​ប្រទេសមួយចំនួនមានការព្រួយបារម្ភពីសន្តិសុខស្បៀង។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា កម្ពុជា មានតម្រូវការស្រូវចំនួន ៦ លានតោន ក្នុងមួយឆ្នាំ ខណៈផលិតកម្មសម្រេចបាន ១២ លានតោននៅឆ្នាំ ២០២៣ និងជាង ១៣ លានតោននៅឆ្នាំ ២០២៤ ដែលលើសតម្រូវការក្នុងស្រុក។

លោក ឌិត ទីណា បានប្រាប់ថា តម្លៃស្រូវអូអឹម បានចាប់ផ្ដើមធ្លាក់តាំងពីដើមខែមករា រហូតដល់ក្រោម ៨០០ រៀល ក្នុងមួយគីឡូក្រាម។

លោកថ្លែងថា៖ «ស្រូវវាផ្សារភ្ជាប់ទៅនឹងទីផ្សារអង្ករ នៅពេលដែលយើងពិនិត្យមើលទីផ្សារអង្ករលើពិភពលោក ចាប់តាំងពីប្រទេសឥណ្ឌាប្រកាសថា អេលីណូ ចប់ហើយ គាត់អនុញ្ញាតឱ្យមានការនាំចេញនូវអង្ករស របស់គាត់ត្រឡប់មកវិញ ស្ថាន​ភាពតម្លៃអង្ករក៏ចាប់ផ្ដើមមានការប្រកួតប្រជែងខ្លាំង ហើយចំពោះស្រូវអូអឹមចុះថ្លៃ ភាគច្រើនយើងលក់ទៅវៀតណាម ហើយយើងឃើញថាអង្ករវៀតណាមក៏រងបញ្ហាដូចគ្នា គាត់ត្រូវង្ខំចិត្តលក់ក្នុងតម្លៃទាប នៅពេលដែលអេលីណូ មានឥទ្ធិ​ពលគាត់លក់អង្ករក្នុងតម្លៃ ៦៦០ ដុល្លារ ក្នុងមួយតោន ប៉ុន្តែនៅដើមខែមករា នេះ អង្ករវៀតណាមលក់ចេញក្នុងតម្លៃ ៤៣០ ដុល្លារក្នុងមួយតោនប៉ុណ្ណោះ ធ្លាក់ចុះប្រមាណ ៣០%»។

សូមជំរាបថា ផលិតកម្មដាំដុះស្រូវប្រាំងនៅកម្ពុជានៅឆ្នាំនេះ ពលរដ្ឋដាំដុះប្រមាណ ៧០ ម៉ឺនហិកតា លើសផែនការ ដែលមានទិន្នផលប្រមាណ ៤ លានតោន។

លោក ឌិត ទីណា មានប្រសាសន៍ថា ប្រសិនបើយើងផលិតលើស ទីផ្សារក្នុងស្រុកមិនមានតម្រូវការច្រើនទេ។ លោកបញ្ជាក់ថា ប្រសិនបើបរិមាណ គុណភាព និងតម្លៃមិនអាចគ្រប់គ្រងបាន នោះផលចំណេញក៏មិនបានច្រើនទេ។ ប្រសិនបើយើងគ្រប់គ្រងស្ថិរភាពបរិមាណ គុណភាព តម្លៃបាន នឹងផ្ដល់ផលច្រើនដល់កសិករ៕

អត្ថបទ៖ ឡេង ដេត