វៀតណាមគ្រោងសាងសង់កំពង់ផែអន្តរជាតិតម្លៃ ២៣០ លា​ន​ដុល្លារ​ នៅខេត្តភាគខាង​ត្បូង

ឧបនាយករដ្ឋមន្ត្រីវៀតណាម លោក Tran Hong Ha កាល​ពី​សប្ដាហ៍​មុន​ បានអនុម័តលើ​​កំណែសម្រួលនៃ​គោលនយោបាយវិនិយោគសម្រាប់គម្រោងកំពង់ផែអន្តរជាតិ Mỹ Xuân International General Port ក្នុង​ខេត្ត Bà Rịa-Vũng Tàu នា​ភាគ​ខាង​ត្បូង​នៃប្រទេស​។ នេះបើតា​មការ​ចុះ​ផ្សាយ​របស់​សារព័ត៌មាន​ក្នុងស្រុក​វៀតណាម​។

គម្រោង​នេះ​ នឹង​ត្រូវ​អនុវត្ត​ដោយ​ក្រុមហ៊ុន QTM International Port Joint Stock Company​ ដោយ​រួមបញ្ចូលទាំង​ការសាងសង់កំពង់ផែអន្តរជាតិ Mỹ Xuân ដែលនឹងអាចផ្ទុកនាវា​មាន​សមត្ថភាព​ផ្ទុក​ដល់ ៦០ ០០០​ DWT ។

គម្រោង​តម្លៃ ២៣០ លាន​ដុល្លារ​នេះ​ នឹង​​អនុវត្ត​ចន្លោះ​ពីឆ្នាំ ២០២៥ ដល់​ឆ្នាំ ២០៣០ ដោយ​គ្រប​ដណ្ដប់​លើ​ផ្ទៃដី ៧១,២៣ ហិចតា។

កំពង់ផែ Mỹ Xuân International General Port ត្រូវបានចាត់ទុកថាជាគម្រោងសំខាន់ក្នុងការអភិវឌ្ឍ​ហេដ្ឋារចនាសម្ព័ន្ធកំពង់ផែនៅខេត្ត​ Bà Rịa-Vũng Tàu។ វា​មាន​គោលបំណង​ពង្រឹង​សមត្ថភាព​ភ័ស្តុភារ គាំទ្រ​ពាណិជ្ជកម្ម​អន្តរជាតិ និង​ជំរុញ​កំណើនសេដ្ឋកិច្ច​ក្នុង​តំបន់។ នៅពេល​បញ្ចប់ការសាងសង់ និងដំណើរការ វា​រំពឹងថានឹងក្លាយទៅជា​កន្លែង​យុទ្ធសាស្ត្រអភិវឌ្ឍន៍ដែនសមុទ្ររបស់វៀតណាម។

នៅឆ្នាំ ២០២៤ ខេត្ត ​Bà Rịa-Vũng Tàu បានបង្កើនឱកាសក្នុងស្រុក និងអន្តរជាតិ ដោយផ្តោតលើការអភិវឌ្ឍន៍ហេដ្ឋារចនាសម្ព័ន្ធ និងការបណ្តុះបណ្តាលកម្លាំងពលកម្មប្រកបដោយគុណភាពខ្ពស់។ ភាពខ្លាំងរបស់ខេត្ត​លើ​សេដ្ឋកិច្ចសមុទ្រ កំពង់ផែអន្តរជាតិ ឧស្សាហកម្មកែច្នៃ ថាមពលកកើតឡើងវិញ និងទេសចរណ៍បៃតង ​កាន់តែរឹង​មាំទៅៗ៕