តម្លៃប្រេងធ្លាក់ចុះ ខណៈវិនិយោគិនបន្តឃ្លាំមើលពីស្ថានភាពទីផ្សារ

តម្លៃប្រេងអន្តរជាតិ បានធ្លាក់ចុះប្រហែល ១ ភាគរយ សម្រាប់ការជួញដូរនៅថ្ងៃពុធនេះ ខណៈការផ្លាស់ប្តូរគោលនយោបាយពន្ធរបស់សហរដ្ឋអាមេរិក បានជំរុញឱ្យមានភាពមិនច្បាស់លាស់ ដែលធ្វើឱ្យ​វិនិយោគិនបន្តវិភាគពីស្ថានភាពទីផ្សារដែលប៉ះពាល់ដោយ​សង្រ្គាមពាណិជ្ជកម្មរវាងចិន​ និងអាមេរិក។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក​ Brent បានធ្លាក់ចុះ ៦៦ សេន ឬ ១ ភាគរយ ដោយជួញដូរនៅត្រឹម ៦៤,០១ ដុល្លារ/បារ៉ែល ខណៈតម្លៃប្រេងឆៅអាមេរិក ម៉ាក​ West Texas Intermediate (WTI) វិញ បានធ្លាក់ចុះ ៦៩ សេន ឬ ១,១ ភាគរយ ដោយជួញដូរ​នៅតម្លៃ ៦០,៦៤ ដុល្លារ/បារ៉ែល។ តម្លៃប្រេងទាំង២ បាន​ធ្លាក់ចុះ ០,៣ ភាគរយ កាលពីម្សិលមិញ។

កាលពីថ្ងៃអង្គារ ទីភ្នាក់ងារថាមពលអន្តរជាតិបាននិយាយថា តម្រូវការប្រេងសកលប្រចាំឆ្នាំ ២០២៥ រំពឹងថានឹងកើនឡើងក្នុងអត្រាទាបបំផុតក្នុងរយៈពេល ៥ ឆ្នាំ ហើយ​កំណើន​ផលិតកម្មរបស់សហរដ្ឋអាមេរិកក៏នឹងថយចុះផងដែរ ដោយសារតែគោលនយោបាយពន្ធគយរបស់ប្រធានាធិបតីអាមេរិក ដូណាល់ ត្រាំ និងការចាត់វិធានការសងសឹកពីប្រទេសដទៃ។

គួរគូសបញ្ជាក់ថា ការប្រកាសពន្ធរបស់លោក ត្រាំ នាពេល​កន្លងមក បាន​ធ្វើឱ្យតម្លៃប្រេងអន្តរជាតិធ្លាក់ចុះ ដោយសារតែក្ដីបារម្ភពីផលប៉ះពាល់សេដ្ឋកិច្ច ដែលជះឥទ្ធិពលដោយ​ផ្ទាល់លើកម្រិតនៃតម្រូវការប្រេង៕