អ្នកជំនាញអះអាង​ តម្លៃមាសមាននិន្នាការកើនឡើង

តម្លៃហាងឆេងមាសបានកើនឡើងដល់ជាង ៤ ពាន់ដុល្លារក្នុងមួយតម្លឹង ខណៈធនា​គារ​កណ្ដាល​អាមេរិកសម្រេចរក្សាអត្រាការប្រាក់ដដែល។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បានប្រាប់ថា តម្លៃមាសនៅពាក់កណ្ដាលខែ ឧសភានេះ តម្លៃមាសអាចនឹងឡើងចុះ នៅក្នុង​ចន្លោះ ៣៩៥០ ដុល្លារ ដល់ ៤ ២០០ ដុល្លារ ក្នុងមួយតម្លឹង។

លោក ឡុង សំណាង បញ្ជាក់ថា ព័ត៌មានធនា​គារ​កណ្ដាល​អាមេរិកសម្រេចរក្សាអត្រា​ការ​ប្រាក់នៅថ្ងៃទី ០៨ ខែឧសភានេះ មានឥទ្ធិពលតិចតួចដល់តម្លៃហាងឆេងមាស ដោយសារ​តែភាគរយច្រើនដែលគេដឹងថា ធនាគារអាមេរិកនឹងរក្សាការប្រាក់ដដែល។

លោក ឡុង សំណាង បន្ថែមថា៖ «ប្រសិនយើងមើលហាងឆេងមាសប៉ះតិចមែនទែន ដោយ​សារតែព័ត៌មានអត្រាការប្រាក់អាមេរិកមានភាគរយច្រើនទៅហើយ ដែលគេបានដឹងថា ប្រាកដ​កណាស់គេត្រូវរក្សាអត្រាការប្រាក់ទុក អញ្ចឹងព័ត៌មានដែលគេបានដឹងហើយ គេ​សម្រុក​ទិញ​តាំង​ពីដើមខែ ដូច្នេះកម្រិតនៃការស្ទុះឡើងគឺឡើងតាំងពីដើមខែ ពេលដែល​រក្សាការ​ប្រាក់​ដដែល មានន័យថា លំនឹងសេដ្ឋកិច្ចអាមេរិក ជាមួយអតិផរណា និងតម្លៃលុយ​ត្រូវចំណុច​មួយដែល​គេចង់បាន»។

លោក ឡុង សំណាង បញ្ជាក់ថា ការរក្សាអត្រាការប្រាក់របស់អាមេរិក ធ្វើឡើងដើម្បីទប់នូវ​តម្លៃ​អតិផរណាកំពុងកើនឡើងបន្តិច ដែលលោកអះអាងថា តម្លៃមាសនឹងមាននិន្នាការកើនឡើង ខណៈ​​អាមេរិកនឹងកាត់បន្ថយអត្រាការប្រាក់នៅពេលខាងមុខ។

ហាងឆេងមាសជួញដូរនៅថ្ងៃទី ០៨ ខែឧសភា ឆ្នាំ ២០២៥ តម្លៃ ៤០៥០ ដុល្លារ ក្នុងមួយតម្លឹង ខណៈតាមបណ្ដា​ហាង​នានា​នៅក្នុងរាជធានីភ្នំពេញ លក់ចេញក្នុងតម្លៃ ៤១០ ដុល្លារ ក្នុងមួយជី និងទិញចូល ៤០០ ដុល្លារ ក្នុងមួយជី៕

អត្ថបទ៖ ឡេង ដេត