ឥណ្ឌូណេស៊ីគ្រោងយកពន្ធលើផ្លែដូងនាំចេញ ដើម្បីទប់ការឡើងថ្លៃក្នុងស្រុក

រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី លោក Budi Santoso បានប្រកាសកាលពីថ្មីៗនេះថា ប្រទេសឥណ្ឌូណេស៊ីគ្រោងនឹងដាក់ពន្ធលើការនាំចេញលើផ្លែដូងទាំងមូល​ ដើម្បីគ្រប់គ្រងការនាំចេញក្រៅប្រទេស និងធានាការផ្គត់ផ្គង់ក្នុងស្រុក។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណាត់ការនេះ ធ្វើឡើងនៅពេលដែលតម្លៃផ្លែដូងក្នុងស្រុកកើនឡើង ចំពេលដែលការផ្គង់ផ្គង់ធ្លាក់ចុះ ហើយតម្រូវការនៅតែខ្ពស់​។ និន្នាការ​នេះ​ ក៏កើតមាននៅប្រទេសផ្សេងៗទៀត រួមមាន​វៀតណាម ស្រីលង្កា និងហ្វីលីពីន ផងដែរ។

លោក Budi បាននិយាយថា៖ «កសិករចូលចិត្តលក់(ដូង)នៅបរទេសដែលតម្លៃខ្ពស់​ជាងខ្លាំង ខណៈ​ការផ្គត់ផ្គង់ទីផ្សារក្នុងស្រុក​នៅមានកម្រិត​។ តាមរយៈការដាក់ចេញនូវពន្ធលើការនាំចេញ យើងអាចគ្រប់គ្រងលំហូរនាំចេញ និងធានាបាននូវភាពគ្រប់គ្រាន់នៃវត្ថុធាតុដើម​សម្រាប់ឧស្សាហកម្មក្នុងស្រុក»។

រដ្ឋមន្រ្តីដដែលបាន​បន្ថែមថា នៅពេលនេះក្រសួងកំពុងពិភាក្សាបញ្ចប់លើអត្រានៃពន្ធ និងគ្រោងសម្រេចនៅសប្ដាហ៍ក្រោយ។

បើតាម Jakarta Globe ​តម្លៃដូងក្នុងស្រុកឥណ្ឌូណេស៊ីកំពុងកើនឡើងខ្លាំង ដោយសារតែតម្រូវការនាំចេញទៅក្រៅប្រទេសច្រើន រហូតធ្វើឱ្យ​ក្រុមហ៊ុនកែច្នៃក្នុងស្រុក ត្រូវកាត់បន្ថយផលិតកម្ម។

យោងតាមទីភ្នាក់ងារស្ថិតិកណ្តាល (BPS) ឥណ្ឌូណេស៊ីបាននាំចេញដូងទាំងមូល ចំនួន ៤៣១,៩១ លានគីឡូក្រាម កាលពីឆ្នាំ ២០២៤ ក្នុងតម្លៃ ១១៣,៥ លាន​ដុល្លារ​។ ​ទីផ្សារចិន​ជា​គោលដៅ​កំពូល​ ​បន្ទាប់មក​វៀតណាម ថៃ ម៉ាឡេស៊ី ម៉ាសេដូន​ខាង​ជើង និង​ប្រទេស​ផ្សេង​ៗទៀត។

មែនទែនទៅ ឥណ្ឌូណេស៊ី គឺជាប្រទេសផលិតដូងធំជាងគេបំផុតរបស់ពិភពលោក ជាមួយនឹងទិន្នផលប្រចាំឆ្នាំប្រហែល ១៧,១៩ ​លានតោនគិតត្រឹមទិន្នន័យចុងក្រោយបង្អស់ក្នុងឆ្នាំ ២០២២។ នេះបើយោងតាមអង្គការស្បៀងអាហារ និងកសិកម្ម (FAO) ។ ​ហ្វីលីពីនជាប់ចំណាត់ថ្នាក់លេខ ២ ​ក្នុងបរិមាណផលិតកម្ម​ ១៤,៩៣ លានតោន៕