ពន្ធបដិការអាមេរិកប៉ះពាល់កម្រិតណា ប្រសិនបើអាមេរិកអនុវត្តជាមួយកម្ពុជា

លោក កាំង ម៉ូនីកា អគ្គលេខាធិការរងសមាគមវាយនភណ្ឌ សម្លៀកបំពាក់ស្បែកជើង និងផលិត ផលធ្វើដំណើរបានលើកឡើងថា ពន្ធបដិការរបស់អាមេរិក-កម្ពុជា មិនទាន់ច្បាស់លាស់នៅ​ឡើយ​​​​ទេថាតើ វានឹងប៉ះពាល់កម្រិតណា?

លោកថា ប្រសិនបើអាមេរិអនុវត្តពន្ធបដិការនេះ វានឹងប៉ះពាល់ ប៉ុន្តែផលប៉ះពាល់វានឹងមាន​ទៅ​តាម​កម្រិត វានឹងមានទៅតាមសេនារីយោផ្សេងៗ ដែលលោកបញ្ជាក់ថា តើនៅចុងបញ្ចប់ អត្រា​ពន្ធ​ទៅលើប្រទេសផ្សេងៗ ជាពិសេស ប្រទេសដែលជាដៃគូប្រកួតប្រជែង​របស់យើង​ហ្នឹង​វា​​មាន​ខុស​គ្នាយ៉ាងណា?

លោក កាំង ម៉ូនីកា បានលើកឡើងថា៖ «បើថា មានតែយើងមួយទេដែលខ្ពស់ ហើយដៃគូប្រកួត​ប្រជែង​​របស់យើងនៅក្នុងវិស័យដូចគ្នាហ្នឹងដូចជាវៀតណាម ឥណ្ឌូនេស៊ី ឥណ្ឌា ឬក៏តួកគី គេ​មាន​អត្រាពន្ធទាបជាងយើងខ្លាំង អាហ្នឹងបានយើងទទួលរងនូវផលប៉ះពាល់ខ្លាំង ប៉ុន្តែបើថា អត្រា​​​ពន្ធខ្ពស់ប្រហែលៗគ្នា អាហ្នឹងអ្នកបញ្ជាទិញ ដែលជាម្ចាស់ម៉ាក ឬអ្នកនាំចូល នឹងមិន​មាន​ជម្រើសច្រើនទេ»។

បើតាមលោក កាំង ម៉ូនីកា វាអាស្រ័យទៅលើលទ្ធភាពនៃការផ្ទេរផលិតកម្ម បើថាយើង​ខ្ពស់​ជាង​គេ ហើយវាបាត់បង់​នូវភាពទាក់ទាញមួយចំនួន ថាតើគេផ្ទេរទៅប្រទេសណាបាន​ ហើយ​តម្លៃ​យ៉ាង​​ម៉េច ហើយសមត្ថភាពរបស់ប្រទេសនោះ ទទួលយកបានដែរអត់ នូវអ្វី​ដែលជា​ទំហំនៃការ​ហូរចេញរបស់យើង ដែលសុទ្ធតែជាសម្មតិកម្មនៅឡើយ។

លោក កាំង ម៉ូនីកា បានបន្ថែមថា ការបញ្ជាទិញ ការសម្រេចចិត្តដាក់ផលិតកម្ម​នៅក្នុងប្រទេស​ណាមួយវា ពឹងផ្អែកទៅលើតម្លៃ កេរ្តិ៍ឈ្មោះប្រទេស វាអាស្រ័យទៅលើកម្រិតអនុលោមភាព ដែលមានលក្ខណៈជ្រៅជាងមុន ពីមុនយើងនិយាយតែ សិទ្ធិកម្មករ សេរីភាពសហជីព ឥឡូវនេះយើងនិយាយ អនុលោមភាពបរិយាកាសសង្គម។

វាជាការបូករួមគ្នានៃកត្តាផ្សេងៗ ដើម្បីឈានទៅដល់ការសម្រេចចិត្តចុងក្រោយ ថាតើត្រូវបន្ត ឬផ្ទេរផលិតកម្មទៅប្រទេសផ្សេង។

លោក កាំង ម៉ូនីកា បញ្ជាក់ថា៖ «បច្ចុប្បន្ន យើងមានសមតិកម្មច្រើន ហើយកត្តាដែលពាក់ព័ន្ធ​ដែលយើងអត់ទាន់ច្បាស់ហ្នឹងក៏ច្រើនដែរ យើងពិបាកឈានទៅ​ដល់​វិនិច្ឆ័យចុងក្រោយថា យើង​នឹងត្រូវជាយ៉ាងណា គ្រាន់តែថា យើងត្រូវត្រៀមខ្លួនជាមុន ហើយបន្តពង្រឹងនូវអ្វីដែលយើង​អាច​ធ្វើបាន នៅក្នុងដែនសមត្ថភាពរបស់យើង ដូចជាបរិយកាសវិនិយោគ ការពង្រឹងភាពប្រកួត​ប្រជែងរបស់ប្រទេសកម្ពុជាទាំងមូលជាពិសេសសម្រាប់វិស័យរបស់យើង ដែលមានកត្តារួម​ផ្សំជាច្រើន មានទាំងថ្លៃអគ្គិសនី ថ្លៃភស្តុភារ គោលនយោបាយអគ្គិសនី ផលិតភាពកម្មករ សុទ្ធតែពាក់ព័ន្ធការប្រកួតប្រជែងរបស់ប្រទេសយើង»។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍​មានប្រសាសន៍ថា ការចរចារពន្ធបដិការអាមេរិកជុំទី១ សម្រេចបានលទ្ធផលវិជ្ជមាន ទី១ យើងសម្ដែងកាយវិកាសុឆន្ទៈ ទី២ យើងបានរៀបចំខ្លួនមុនគេ ក្នុងការជជែក។

លោក ប៉ែន សុវិជាតិ បញ្ជាក់ថា ក្រសួងពាណិជ្ជកម្មមានគោលនយោបាយធ្វើពិពិធកម្មទីផ្សារ និងពិពិធកម្មទំនិញ ពិពិធកម្មទីផ្សារបានន័យថា ពង្រីកតាមរយៈកិច្ចព្រមព្រៀងពាណិជ្ជកម្មសេរី ពិពិធម្មទំនិញបានន័យថា ជំរុញឱ្យឧស្សាហកម្មក្នុងស្រុកផលិតទំនិញឱ្យបានសម្បូរបែបសម្រាប់ស្រូបទីផ្សារ។

លោក ប៉ែន សុជាតិ បន្ថែមថា៖ «ការចរចារ យើងមានលទ្ធភាពច្រើន ក្នុងការទទួលបាន​ផល​វិជ្ជមាន យើងមានគោលដៅច្បាស់លាស់ថា​ពន្ធកម្រិតណាដែលអាចទទួលយកបាន ហើយ​អាច​សម្របសម្រួលបាន ដោយសារការធ្វើការជិតស្និទ្ធជាមួយសមាគមកាត់ដេរ ក៏ដូចជាអ្នកវិ​និយោគ​ ហើយយើងក៏មានលទ្ធភាពក្នុងការពង្រីកវិស័យផ្សេងទៀត»៕

អត្ថបទ៖ ឡេង ដេត