អបអរសាទរ! កម្ពុជា ដណ្តើមបានមេដាយ ១១ គ្រឿង ពីការប្រកួតកីឡាជឺជីតស៊ូជើងឯកអាស៊ី

ក្រុមកីឡាករ កីឡាការិនីរបស់ កម្ពុជា ដណ្តើមបានមេដាយសរុបចំនួន ១១ គ្រឿងពីការប្រកួតកីឡាជឺជីតស៊ូជើងឯកទ្វីបអាស៊ី លើកទី៩ នៅប្រទេស ហ្ស៊កដានី។

ការប្រកួតកីឡាជឺជីតស៊ូជើងឯកទ្វីបអាស៊ី លើកទី៩ នេះ កម្ពុជាបានបញ្ជូនកីឡាករ កីឡាការិនី ទៅចូលរួមប្រកួតចំនួន ៦ នាក់ ក្នុងនោះមានកីឡាករ ៣ នាក់រួមមាន ទូច ពីរកក្កដា, មឿន លីមសុខបញ្ញា និង គង់ម៉ូណា មិថុរ៉ា។ ចំណែកកីឡាការិនីវិញមានចំនួន ៣ នាក់រួមមាន ហេង ស៊ីវហ៊ាង​, គង់ម៉ូណា ជេសស៊ីកា និង ទីន សុវណ្ណបួរកែវ។

យោងតាមការប្រកាសរបស់សហព័ន្ធជឺជីតស៊ូកម្ពុជា នៅថ្ងៃ អង្គារ៍ ទី ២៧ ខែ ឧសភា នេះបានឱ្យដឹងថា តាមរយៈការប្រកួតរយៈពេល ៤ ថ្ងៃមកនេះ ពីថ្ងៃទី ២២ ដល់ថ្ងៃទី ២៦ ខែ ឧសភា គឺ កីឡាករ កីឡាការិនី កម្ពុជា ទាំង ៦ រូបបានដណ្តើមបានមេដាយសរុបចំនួន ១១ គ្រឿង ក្នុងនោះមេដាយមាស ២ គ្រឿង ប្រាក់ ៦ គ្រឿង និងសំរឹទ្ធ ៣ គ្រឿង៕

អត្ថបទ៖ សេម កុសល