កម្ពុជា-អាមេរិក ឯកភាពជួបចរចារជុំទី២ លើបញ្ហាពន្ធបដិការចាប់ពីថ្ងៃទី ៤-៦ មិថុនា

ថ្នាក់ដឹកនាំកម្ពុជា-អាមេរិកនឹងជួបប្រជុំចរចារជុំទី២ ជុំវិញពន្ធបដិការរវាងកម្ពុជា-អាមេរិក នៅថ្ងៃទី ០៤-៦ ខែមិថុនា ឆ្នាំ ២០២៥។

កាលពីថ្ងៃទី ១៣-១៥ ខែឧសភា ឆ្នាំ ២០២៥ លោកឧបនាយករដ្ឋមន្ត្រី ស៊ុន ចាន់ថុល និង​ជា​អនុ​ប្រ​ធានទី១ នៃក្រុមប្រឹក្សាអភិវឌ្ឍន៍កម្ពុជា បានដឹកនាំគណៈប្រតិភូជួបប្រជុំចរចាជុំទី១ ជា​មួយ​លោក​ស្រី Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិក ទទួលបន្ទុក​តំបន់​​អាស៊ី​អាគ្នេយ៍ និងប៉ាស៊ីហ្វិក។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ​ក្នុង​ចំណោមបណ្ដាប្រទេស ដែលបានសម្ដែងនូវសុឆន្ទៈ​របស់ខ្លួនមុនគេទៅ​កាន់សហរដ្ឋអាមេរិក​នោះ​គឺ កម្ពុជា។

លោកបន្តថា មានការកត់សម្គាល់ជាពិសេសចំ​ពោះការឆ្លើយតបយ៉ាង​រហ័សរបស់​សម្ដេច​មហា​បវរធិបតី ហ៊ុន ម៉ាណែត និងកាយវិការសុឆន្ទៈ ដែលកម្ពុជាបញ្ចុះពន្ធទំនិញអាមេរិក​នូវ​អត្រា​ពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%។​

លោក ប៉ែន សុវិជាតិ បន្ថែមថា៖ «នៅក្នុងអង្គការពាណិជ្ជកម្មពិភពលោក(WTO) ប្រព័ន្ធពហុនិយម មានការកំណត់ពន្ធអត្រាអតិបរមា និងអត្រាអប្បបរមា។ ជាការពិតណាស់ Applied Rate របស់យើង វាខ្ពស់ជាងនេះ វាមិនមែត្រឹមប៉ុណ្ណេះទេ អញ្ចឹងកាយវិកាសុឆន្ទៈ ដែលទាបជាង Applied Rate នេះ ជាការសម្ដែងនូវ កាយវិកាល្អមួយសម្រាប់ធ្វើការសម្របសម្រួលជាមួយភាគីអាមេរិក។ ទី២ យើងទៅផ្លូវការម្ដង ប៉ុន្តែមុនដែលទៅផ្លូវការនោះ គឺមានការចរចារ មានការជជែកគ្នា តាមប្រព័ន្ធវីដេអូ ២ ដង ដើម្បីរៀបចំសេនារីយោ រៀបចំឆាករៀងខ្លួន ស្ទង់មើលថាតើភាគីអាមេរិកចង់បានអី យើងអាចនឹងធ្វើអី គឺថាមានការរៀបចំខ្លួនរបៀបនេះ ២ ដង មុននឹងទៅម្ដង»។

លោក ប៉ែន សុវិជាតិ បញ្ជាក់ថា នឹងមានការទៅចរចាម្ដងទៀត នៅថ្ងៃទី ៤-៦ ខែមិថុនា ឆ្នាំ ២០២៥ ខណៈលោកមិនអាចបង្ហាញលទ្ធផលចរចាជុំទី១ បាននៅឡើយទេ ដោយសារកំពុងស្ថិតនៅក្នុងដំណាក់កាលចរចា។

បើតាមលោក ប៉ែន សុវិជាតិ ការចរចាជុំទី២ នេះ នឹងអាចមានលទ្ធផលមួយចំនួនទៀត ខណៈជុំទី១ រាជរដ្ឋាភិបាលក៏បានបង្ហាញតែត្រឹមលទ្ធផលជាវិជ្ជមានតែ មិនបង្ហាញ​លម្អិតថា បានលើកអ្វី ឬក៏ទទួលបានអ្វីខ្លះដែរ៕

អត្ថបទ៖ ឡេង ដេត