ព័ត៌មានអន្ដរជាតិ

ក្រុមហ៊ុនថៃបន្តអាជីវកម្មធម្មតានៅកម្ពុជា ដោយឃើញពីផលប៉ះពាល់តិចតួចនៃភាពតានតឹង

បានផុស

៣០ វិនាទី មុន

នៅ

ថ្ងៃសុក្រ ៦ មិថុនា ២០២៥

ដោយ

បណ្ដាក្រុមហ៊ុនថៃបានមើលឃើញពីផលប៉ះពាល់តិចតួចលើអាជីវកម្មក្នុងប្រទេសកម្ពុជា ក្នុងបរិបទនៃភាពតានតឹងព្រំដែនរវាងប្រទេសទាំង២ ដោយមិនទាន់មានសញ្ញាធំណាមួយ ដែលបណ្ដាលឱ្យមានការផ្លាស់ប្ដូរផែនការអាជីវកម្មនោះទេ។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមការវិវត្តចុងក្រោយដដែល អ្នកវិភាគបានលើកឡើងថា ក្រុមហ៊ុនចុះបញ្ជីក្នុងផ្សារហ៊ុនថៃ (SET) ដែលមានប្រតិបត្តិការនៅកម្ពុជា អាចប្រឈមមុខនឹងផលប៉ះពាល់ «ផ្លូវចិត្ត» ក្នុងរយៈពេលខ្លីប៉ុណ្ណោះ។ អាជីវកម្មភាគច្រើនបន្ត និងពង្រីកដំណើរការ ទៅតាមផែនការដើមរបស់ពួកគេ ដែលវាជាសញ្ញានៃភាពធន់រយៈពេលវែង។

អនុប្រធានប្រតិបត្តិនៃ UOB Kay Hian Securities (Thailand) លោក Kitpon Praipaisarnkit បានប្រាប់កាសែតក្នុងស្រុកថា ជម្លោះកម្ពុជា-ថៃបច្ចុប្បន្នមិនមែនជារឿងថ្មីទេ ហើយបានផ្ទុះឡើងជាបន្តបន្ទាប់ក្នុងរយៈពេល ២ ទសវត្សរ៍កន្លងមកនេះ។ វាកម្រប៉ះពាល់ដល់ទំនាក់ទំនងពាណិជ្ជកម្ម ឬការវិនិយោគរយៈពេលវែងណាស់។ យ៉ាងណាមិញ ម្តងម្កាល មនោសញ្ចេតនាជាតិនិយមអាចនាំឱ្យមានការធ្វើពហិការបណ្តោះអាសន្នលើផលិតផលថៃ ប៉ុន្តែវាមានរយៈពេលខ្លីប៉ុណ្ណោះ។

លោកបញ្ជាក់ថា ឥទ្ធិពលណាមួយមកលើក្រុមហ៊ុនថៃដែលវិនិយោគនៅកម្ពុជា គឺជាលក្ខណៈផ្លូវចិត្ត។ ប្រាក់ចំណូលពីការលក់ និងសេវាកម្មអាចធ្លាក់ចុះក្នុងរយៈពេលខ្លី ប៉ុន្តែមិនមានការផ្លាស់ប្តូរគួរឱ្យកត់សម្គាល់ណាមួយ អំពីមូលដ្ឋានគ្រឹះអាជីវកម្មនោះទេ។

អនុប្រធានប្រតិបត្តិ និងជាប្រធានផ្នែកស្រាវជ្រាវនៃក្រុមហ៊ុន Krungsri Securities លោក Kornpat Worachet បានបន្ថែមថា ខណៈបញ្ហាថៃ-កម្ពុជា អាចដាក់សម្ពាធលើទំនុកចិត្តវិនិយោគិនលើផ្សារភាគហ៊ុនរបស់អាជីវកម្មពាក់ព័ន្ធនឹងកម្ពុជា គេមើលឃើញពីការរំខានដល់ប្រតិបត្តិការអាជីវកម្មជាក់ស្តែងនោះទេ។ ទោះបីនេះក្ដី ការវិវត្តនៃភូមិសាស្ត្រនយោបាយ គួរតែត្រូវបានតាមដានយ៉ាងដិតដល់។

លោកបាននិយាយថា វាពិបាកក្នុងការវាស់វែងផលប៉ះពាល់ទាំងស្រុងឥឡូវនេះ ព្រោះឥទ្ធិពលសេដ្ឋកិច្ចពិតប្រាកដមិនទាន់លេចចេញជារូបរាងនៅឡើយទេ ប៉ុន្តែវិនិយោគិនគួរតែឃ្លាំមើលកំណើនភាពតានតឹងផ្នែកនយោបាយ ឬការផ្លាស់ប្តូរគោលនយោបាយណាមួយរបស់កម្ពុជា ដែលអាចប៉ះពាល់ដល់អាជីវកម្ម។

គួរបញ្ជាក់ថា ថៃមានអាជីវកម្មជាច្រើនវិស័យក្នុងប្រទេសកម្ពុជា រួមទាំងភេសជ្ជៈ សុខាភិបាល ថាមពល ការលក់រាយ គ្រឿងសំណង់ ប្រព័ន្ធផ្សព្វផ្សាយ និងផលិតផលកសិកម្មជាដើម៕