សេដ្ឋកិច្ច

អ្នកឧកញ៉ា លឹម ហេង៖ ព្រំដែនបិទ ខាតទាំងកម្ពុជា និងថៃ

បានផុស

១ year មុន

នៅ

ថ្ងៃអង្គារ ១០ មិថុនា ២០២៥

ដោយ

អនុប្រធានសភាពាណិជ្ជកម្មកម្ពុជា អ្នកឧកញ៉ា លឹម ហេង បានលើកឡើងថា ការបិទព្រំដែនរវាងថៃ និងកម្ពុជា ខាតបង់ផលប្រយោជន៍ទាំងសងខាង ដូចប្រមុខរដ្ឋាភិបាលបានអំពាវនាវថា ការប៉ះទង្គិចគ្នាតាមព្រំដែន សុំកុំពង្រីកទំនាស់ឱ្យរាលដាលធំដល់សេដ្ឋកិច្ច ពាណិជ្ជកម្ម និងវិស័យផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ាបានលើកឡើងថា៖ «ធម្មតាទេ អ្នកនាំចូលនាំ-នាំចេញច្រើន គឺខាតច្រើន តែខាត ទាំងអស់គ្នា ពិតមែនតែ អ្នកខ្លះថា កម្ពុជាខាតតិច តែកុំភ្លេចថាជាង ១ ពាន់លានដុល្លារ ក្នុងមួយឆ្នាំ មិនមែនតិចទេ ទំហំពាណិជ្ជកម្មកម្ពុជា-ថៃ គឺធំណាស់ យើងនាំចេញទៅកាណាដា និងប្រទេសអឺរ៉ុបមួយចំនួន អត់បាន ៥០០ លានផង ដូច្នេះ ប្រទេសជិតខាងហ្នឹងឯងដែលទទួលទិញលំហូរផលិតផលកម្ពុជាដែលជាវត្ថុធាតុដើម ដែលយើងមិនអាចនាំចេញក្រៅពីប្រទេសជិតខាង ដូច្នេះ ភាពចាំបាច់រវាងពាណិជ្ជកម្មសេដ្ឋកិច្ច ប្រទេសជិតខាង មិនថាតែថៃទេ វៀតណាម ក៏ដោយតែបិទ គឺមានបញ្ហា»។

អ្នកឧកញ៉ា លឹម ហេង បន្ថែមថា៖ «ទស្សនៈមួយចំនួនគាត់យល់ថា ការបិទព្រំដែនថៃ នឹងបង្កើតឱកាស ក្នុងការផលិត កែច្នៃ ពង្រឹងខ្លួនឯងក្នុងប្រទេស ខ្ញុំឯកភាពការពង្រឹងខ្លួនឯង គឺយើងមិនបាច់តែបិទព្រំដែនទេ យើងពង្រឹងឱ្យហើយទៅ លទ្ធភាពដែលយើងអាចផលិតនាំចេញបានគឺយើងកំពុងតែនាំចេញ លទ្ធភាពខ្លះ យើងមិនអាចនាំចេញបាន ដែលប្រកួតប្រជែងមិនឈ្នះគេ យើងនាំចូល នេះជាចរន្តសេដ្ឋកិច្ចជាសកល យើងមិនអាចផលិតបានគ្រប់មុខទេ ប្រទេសមួយៗ»។

អ្នកឧកញ៉ាបានថ្លែងបន្តទៀថា៖«បើបិទព្រំដែនថៃ កុំភ្លេចថា ទំនិញវៀតណាម ទំនិញចិន និងប្រទេសផ្សេងៗនៅតែហូរចូលចឹង ហើយបើបិទទាំងអស់ យើងថាទស្សនៈដើម្បីផលិតខ្លួនឯង ខ្ញុំសួរថា ផលិតផល បន្លែត្រី សាច់ របស់ប្រើប្រាស់ មិនមែនផលិតមួយអាទិត្យបានទេ គឺត្រូវការពេលរាប់ខែ រាប់ឆ្នាំ តើផលប៉ះពាល់មានទំហំប៉ុណ្ណាដល់ដល់កម្មករ បុគ្គលិក មន្ត្រីរាជការដែលមានប្រាក់ខែនៅមានកម្រិត វាប៉ះពាល់ខ្លាំងណាស់ ការបិទព្រំដែន»។

អ្នកឧកញ៉ាក៏បានធ្វើការអំពាវនាវដល់ពលរដ្ឋមួយចំនួន កុំមានការញុះញង់ បង្ករអរិភាពរវាងប្រទេសជិតខាង ព្រោះកម្ពុជាមិនអាចលើកប្រទេសទៅផ្សេងបានទេ ព្រោះវានៅជាប់គ្នារហូតរាប់រយឆ្នាំ ដូច្នេះកម្ពុចាត្រូវតែបង្ករភាពល្អប្រសើរអភិវឌ្ឍរួមគ្នានៅតាមបណ្ដោយព្រំដែន។

សភាពាណិជ្ជកម្មថៃប្រចាំខេត្តច័ន្ទបុរី បានសម្តែងការព្រួយបារម្ភចំពោះការបិទជាបណ្តោះអាសន្ននៃច្រកព្រំដែនជាមួយប្រទេសកម្ពុជា ដោយព្រមានថា វិធានការបែបនេះអាចបណ្តាលឱ្យមានការខាតបង់ផ្នែកសេដ្ឋកិច្ច «រាប់ពាន់លានបាត»។

អ្នកជំនាញជាច្រើនបានមើលឃើញពីការខាតបង់ ឬរំខានផ្នែកសេដ្ឋកិច្ចចំពោះការបិទព្រំដែន ជាពិសេសសម្រាប់ភាគីថៃ ដែលមានអតិរេកពាណិជ្ជកម្មជាមួយកម្ពុជាប្រមាណ ៤,១ ប៊ីលានដុល្លារ កាលពីឆ្នាំ ២០២៤។

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ ការដោះដូរទំនិញរវាងកម្ពុជា-ថៃ មានទំហំទឹកប្រាក់ជិត ១,៨៨ ពាន់លានដុល្លារ ក្នុងនោះកម្ពុជានាំចេញទៅថៃ ៣៩៦ លានដុល្លារ កើន ១,១% ចំណែកឯថៃនាំទំនិញចូលមកវិញ មានទំហំទឹកប្រាក់ ១,៤៨ ពាន់លានដុល្លារ កើនឡើង ១០,៤%។

យោងក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ។

កម្ពុជានាំចេញផលិតផលកសិម្មទៅប្រទេសថៃដូចជា ដំឡូងមី ពោត ម្រេច សណ្ដែក និងស្វាយ ខណៈថៃនាំមកវិញនូវសម្ភារៈសំណង់ គ្រឿងអេឡិកត្រូនិក គ្រឿងយន្តកសិកម្ម ភេសជ្ជៈ បន្លែ ផ្លែឈើ៕