កម្ពុជាគាំទ្រចំពោះការដាក់ចេញនូវផែនការយុទ្ធសាស្រ្តសហគមន៍សេដ្ឋកិច្ចអាស៊ាន២០២៦-២០៣០

រដ្ឋមន្ត្រីក្រសួងពាណិជ្ជកម្ម និងជារដ្ឋមន្ត្រីក្រុមប្រឹក្សាសហគមន៍សេដ្ឋកិច្ចអាស៊ានសម្រាប់កម្ពុជា លោកស្រី ចម និម្មល បានថ្លែងថា កម្ពុជាប្តេជ្ញាគាំទ្រយ៉ាងពេញទំហឹងនូវការកម្មវិធីផ្សព្វផ្សាយនិងបញ្រ្ជាបការយល់ដឹងអំពីផែនការយុទ្ធសាស្រ្តសហគមន៍សេដ្ឋកិច្ចអាស៊ាន២០២៦-២០៣០ នៃចក្ខុវិស័យសហគមន៍អាស៊ានឆ្នាំ២០៤៥ ​ដើម្បី​អភិវឌ្ឍតំបន់នេះប្រកបដោយចីរភាព និងរីកចម្រើនជាសហគមន៍រួម​តែមួយ។

តាមរយៈការ​ថ្លែងសារគាំទ្រកាលពីថ្ងៃទី១៤ ខែមិថុនា លោកស្រី ចម និម្មល បានលើកឡើងថា ផែនការយុទ្ធសាស្រ្តនេះគឺជាផែនទីចង្អុលផ្លូវដ៏រឹងមាំ និងច្បាស់លាស់ក្នុងការសម្រេចឱ្យបាននូវការកសាងសហគមន៍សេដ្ឋកិច្ចអាស៊ាន។

លោកស្រីថា ៖«ខ្ញុំមានកិត្តិយសដែលបានចែករំលែកការគាំទ្រយ៉ាងពេញទំហឹង និងការប្តេជ្ញាចិត្តដ៏រឹងមាំរបស់កម្ពុជា ចំពោះផែនការយុទ្ធសាស្រ្តសហគមន៍សេដ្ឋកិច្ចអាស៊ាន ២០២៦-២០៣០។  ផែនការយុទ្ធសាស្រ្តនេះ គឺជាផែនទីចង្អុលផ្លូវដ៏ច្បាស់លាស់ និងពេលវេលាដ៏សមស្របសម្រាប់អនាគមរបស់អាស៊ានក្នុងការធ្វើឱ្យស៊ីជម្រៅនូវសមាហរណកម្មសេដ្ឋកិច្ច តាមរយៈនវានុវត្តន៍ ការផ្លាស់ប្តូរឌីជីថល ការអភិវឌ្ឍប្រកបដោយចីរភាព និងតំបន់ដែលមានការតភ្ជាប់ និងប្រកបដោយបរិយាបន្ន»។
លោកស្រីរដ្ឋមន្រ្តីរូបនេះក៏បានគូសបញ្ជាក់ផងដែរថា កម្ពុជាប្តេជ្ញាអនុវត្តគោលដៅយុទ្ធសាស្រ្តទាំងនេះ ជាពិសេសក្នុងការអភិវឌ្ឍន៍ឧស្សាហកម្មបៃតង គាំទ្រដល់សហគ្រាសធុនតូច និងមធ្យមរបស់យើង និងការវិនិយោគលើសេដ្ឋកិច្ចឌីជីថល។​ កម្ពុជានឹងបន្តជំរុញការតភ្ជាប់ ចីរភាព និងនវានុវត្តន៍ទាំងថ្នាក់ជាតិ និងក្នុងនាមជាសមាជិកអស៊ានដ៏សកម្មមួយ។

«តាមរយៈកិច្ចសហប្រតិបត្តិការក្នុងតំបន់ដ៏រឹងមាំ កម្ពុជាជឿជាក់យ៉ាងមុតមាំថា អាស៊ានមិនត្រឹមតែអាចទប់ទល់នឹងផលប៉ះពាល់ជាសកលប៉ុណ្ណោះទេ ប៉ុន្តែថែមទាំងឈានមុខក្នុងការអភិវឌ្ឍប្រកបដោយចីរភាព និងរីកចម្រើនជាសហគមន៍រួមគ្នាផងដែរ។ កម្ពុជាត្រៀមខ្លួនជាស្រេចដើម្បីធ្វើការជាមួយអាស៊ាន ដើម្បីសម្រេចបាននូវចក្ខុវិស័យនេះ  និងធានាផ្តល់នូវអត្ថប្រយោជន៍ដល់ប្រជាជនរបស់យើង»។ នេះបើយោងតាមលោកស្រីរដ្ឋមន្រ្តី ចម និម្មល។

គិតចាប់ពីខែមករា ដល់ខែឧសភា ឆ្នាំ ២០២៥ ការដោះដូរទំនិញអន្តរជាតិរបស់កម្ពុជា សម្រេច​បាន​នូវ​​ទំហំទឹកប្រាក់ជាង ២៥,២៩ ពាន់លានដុល្លារ ​កើនឡើង ១៨,៥% ធៀបរយៈពេលដូចគ្នា​នឹង​ឆ្នាំ ២០២៤។ ​ សម្រាប់ ការនាំចេញទំនិញ​របស់​កម្ពុជា ​​មានទំហំទឹកប្រាក់ ១១,៨០ ​ពាន់លានដុល្លារ កើនឡើង ១៧,២% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ១៣,៤៨ ពាន់លានដុល្លារ ​កើនឡើង ១៩,៧%។។ នេះ​បើយោង​តាម​​ទិន្ន​​ន័យ​របស់អគ្គនា​យកដ្ឋាន​គយ និង​រដ្ឋាករ​កម្ពុជា ​(GDCE) ចេញផ្សាយ​នៅ​ថ្ងៃទី ១០ ខែមិថុនា ឆ្នាំ ២០២៥។

ក្នុងនោះសម្រាប់ការដោះដូរទំនិញរបស់កម្ពុជាជាមួយបណ្តាសមាជិកអាស៊ានសម្រេចបានទឹកប្រាក់ជាង ៥,៩ ពាន់លានដុល្លារក្នុងរយៈពេល៥ខែកន្លងមកនេះ កើនឡើងជិត៥% ធៀបនឹង៥,​៦ ពាន់លានដុល្លារក្នុងរយៈពេលដូចគ្នាឆ្នាំមុន៕