កសិករដាំដំឡូងមី មិនទាន់បារម្ភពីផលប៉ះពាល់ ក្រោយថៃបិទព្រំដែន

កសិករដាំដំឡូងមី នៅខេត្តឧត្តរមានជ័យបានប្រាប់ឱ្យដឹងថា ការបិទព្រំដែនរបស់ភាគីថៃ​បច្ចុប្បន្នមិនទាន់មាន​ផលប៉ះ​ពាល់​​​ទៅ​លើវិស័យដំឡូងមី​នៅ​កម្ពុជា​​នោះ​ទេ ដោយសារមិនមែនជារដូវប្រមូលផលច្រើន ខណៈ​ថៃ​​​បានរឹតបន្តឹងគុណភាពការនាំចូលដំឡូងមីពីកម្ពុជា។

លោក អិល ឈិញ ប្រធានសមា​គមកសិករដំឡូងមីខ្មែរ ប្រាប់កម្ពុជាថ្មី នៅថ្ងៃទី ២៣ ខែមិថុនា ឆ្នាំ ២០២៥ ថា៖ «រាល់ថ្ងៃយើងមិនបារម្ភទេ ព្រោះវាមិនមែនជាខែប្រមូលផលពេញលេញ តែបើ​ការ​បិទ​នេះ វាអូសបន្លាយទៅដល់ខែ១១ ខែ១ ឬខែ២ បានយើងបារម្ភ»។

ក្រសួងពាណិជ្ជកម្មថៃ កាលពីពេលថ្មីៗនេះ បានរឹតបន្តឹងការនាំចូលដំឡូងមីពីកម្ពុជា បន្ទាប់ពី​កម្ពុជាបានបិទការនាំចូលបន្លែផ្លែឈើពីថៃ ឆ្លើយតបនឹងថៃបិទព្រំដែនជាឯកតោភាគី ក្រោយពីទាហាន​ថៃចូលមកបាញ់ទាហានកម្ពុជាស្លាប់ម្នាក់នៅតំបន់មុំបី។ ថៃគឺទីផ្សារធំទី២របស់កម្ពុជា ក្នុងការទិញ​ដំឡូងមី បន្ទាប់ពីវៀតណាម។

យោងតាមក្រសួងកសិកម្មនៅក្នុងរយៈពេល ៥ ខែ ឆ្នាំ ២០២៥ កម្ពុជានាំចេញ ដំឡូង​មី​ស្រស់​សម្រេចបាន ១,៤២ លានតោន ធ្លាក់ចុះ ១០,៩២% និងចំណិត​ដំឡូងមីក្រៀម សម្រេចបាន ១,២២ លានតោន កើន ៥២,៧៣% ធៀបនឹងរយៈពេលដូចគ្នាកាលពីឆ្នាំមុន។

រដ្ឋាភិបាលកម្ពុជា កំពុងរៀបចំស្តង់ដាដំឡូងមីក្រៀម និងដំឡូងមីស្រស់ ដើម្បី​បង្កភាពងាយស្រួល​ដល់កិច្ចសម្រួលពាណិជ្ជ​កម្មទិញ-លក់ដំឡូងមី ការ​កំណត់​តម្លៃ​ ដោយផ្អែក​តាមស្តង់ដា ដែលបាន​ដាក់​ចេញតាម​ប្រភេទដំឡូងមីស្រស់ ឬក្រៀម និងទៅតាមកម្រិតជាតិម្សៅ។

គិតត្រឹមឆ្នាំ ២០២៤ កម្ពុជាមានផ្ទៃដីដាំដុះដំឡូងមីប្រមាណ ៧០ ម៉ឺនហិកតា ដែលអាចរក​ចំណូល​បានប្រមាណ ៧២៨ លានដុល្លារ៕

អត្ថបទ៖ ឡេង ដេត