តម្លៃមាសធ្លាក់ចុះក្រោយអ៊ីស្រាអែល-អ៊ីរ៉ង់ យល់ព្រមបទឈប់បាញ់

តម្លៃមាសអាចនឹងធ្លាក់ចុះក្រោម ៤ ពាន់ដុល្លារ ក្នុងមួយតម្លឹងនៅក្នុងសប្ដាហ៍នេះ បន្ទាប់ពីមាន​ការ​​ឯក​ភាពបទឈប់បាញ់រវាងអ៊ីស្រាអ៊ែល និងអ៊ីរ៉ង់។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បាន​ឱ្យ​ដឹង​នៅថ្ងៃទី ២៤ ខែមិថុនា ឆ្នាំ ២០២៥ ថា ទំនោរតម្លៃហាងឆេងមាសទាញទម្លាក់ចុះ បន្ទាប់​ពី​មាន​ការឯកភាពបទឈប់បាញ់រវាងអ៊ី​ស្រា​អែល និងអ៊ីរ៉ង់ ដែលអាចនឹងមានការចរចារ​ណា​មួយ​ជុំវិញ​ការបញ្ចប់សង្គ្រាមរវាងភាគីទាំងពីរ។

លោកបានថ្លែងបញ្ជាក់ថា៖ «ពាក់ព័ន្ធនឹងការចរចាច្រើនជាងប្រើសព្វាវុធ អញ្ចឹងហើយធ្វើឱ្យ​តម្លៃហាង​ឆេងមាសអាចនឹងធ្លាក់ចុះបន្ថែមទៀត បើវិភាគតាមបច្ចេកទេស តម្លៃហាងឆេងមាស​អាច​​នឹង​ធ្លាក់ចុះបន្តទៀតដំណាក់កាលទី១ ប្រហែល ៣ ៩៣០ ដុល្លារក្នុងមួយ​តម្លឹងនៅក្នុង​សប្ដាហ៍​នេះ»។

គិតត្រឹមម៉ោង ៩ ព្រឹកថ្ងៃទី ២៤ ខែមិថុនា ឆ្នាំ ២០២៥ តម្លៃហាងឆេងមាសកំពុងជួញដូរក្នុងតម្លៃ ៤ ០៣៦ ដុល្លារក្នុងមួយតម្លឹង។ សម្រាប់​ហាងលក់មាសនៅក្នុងរាជធានីភ្នំពេញ លក់ចេញក្នុងតម្លៃ ៤០៦ ដុល្លារ ក្នុង​មួយជី៕

អត្ថបទ៖ ឡេង ដេត