សេដ្ឋកិច្ច

អ្នកជំនាញលើកទឹកចិត្តឱ្យវិនិយោគិនដាក់ទុនលើវិស័យចម្រុះ កុំពឹងផ្អែកតែវិស័យមួយ

បានផុស

១ year មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

ការវិនិយោគគ្រប់យ៉ាងតែងតែមានហានិភ័យ ដែលវិនិយោគិនត្រូវតែទទួលស្គាល់ ទោះកាន់លុយនៅក្នុងដៃ ឬយកលុយទៅទុកនៅក្នុងធនាគារក៏អាចមានហានិភ័យដូចគ្នាដែរ ដូច្នេះវិនិយោគិនគួររៀនដាក់ទុកវិនិយោគលើគ្រប់វិស័យ។ នេះជាការលើកឡើងរបស់លោក ហុង សុខហួរ អគ្គនាយកនៃផ្សារមូលបត្រកម្ពុជា (CSX) ក្នុងបទសម្ភាសជាមួយកម្ពុជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហុង សុខហួរ មានប្រសាសន៍ថា ការវិនិយោគក្នុងវិស័យណា គឺត្រូវតែមានហានិភ័យ ទោះតិច ឬច្រើនក៏ដោយ មិនថាទាំងក្នុងវិស័យអចលនទ្រព្យ ទាំងវិស័យភាគហ៊ុនក៏មានហានិភ័យ ប៉ុន្តែវិនិយោគិនអាចទទួលរងនូវហានិភ័យក្នុងកម្រិតខុសៗគ្នា។

អគ្គនាយកនៃផ្សារមូលបត្រកម្ពុជា លើកទឹកចិត្តឱ្យវិនិយោគិនគួររៀនវិនិយោគលើវិស័យចម្រុះ កុំដាក់លុយទាំងអស់នៅកន្លែងតែមួយ ដូចសុភាសិតនៅក្នុងផ្សារហ៊ុនបានលើកឡើងថា៖ «កុំដាក់ពងមាន់ទាំងអស់នៅក្នុងកន្ត្រកតែមួយ ហើយនៅពេលកន្ត្រកនោះធ្លាក់នឹងធ្វើឱ្យពងមាន់បែកខ្ទេច»។

លោក ហុង សុខហួរបន្ថែមថា៖ «កន្លងមកអ្នកដែលតែងតែរអ៊ូពីបញ្ហាស្ទះលុយកាក់ គឺសុទ្ធសឹងតែជាអ្នកដែលដាក់ពងមាន់នៅក្នុងកន្ត្រកតែមួយ ដូច្នេះនៅពេលកន្ត្រកហ្នឹងធ្លាក់ ពងមាន់បែកខ្ទេច។ ហេតុនេះហើយ គួររៀនដាក់ពងមាន់នៅក្នុងកន្ត្រកចម្រុះគ្នា និងត្រូវចេះធ្វើប្រព្រឹត្តិកម្ម»។

អាស្រ័យហេតុដូចនេះហើយ ទោះវិនិយោគនៅក្នុងវិស័យណាក៏ដោយ ឬដាក់លុយនៅក្នុងធនាគារក៏ដោយ វិនិយោគិនត្រូវតែចេះធ្វើប្រព្រឹត្តិកម្ម និងកុំដាក់លុយនៅកន្លែងតែមួយ។ សូម្បីតែយកលុយទៅដាក់នៅក្នុងធនាគារក៏ត្រូវមានលុយបម្រុងនៅក្នុងខ្លួនផងដែរ ចៀសវាងមានតម្រូវការចាំបាច់ណាមួយ៕

អត្ថបទ៖ ឌិន ថារី