ព័ត៌មានអន្ដរជាតិ

ផែថងថាន «បារម្ភ» ពីផលប៉ះពាល់សេដ្ឋកិច្ចទាំងថៃ និងកម្ពុជា ដោយសារការបិទព្រំដែន

បានផុស

១ year មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ បានសម្ដែងពីកង្វល់ពាក់ព័ន្ធនឹងផលប៉ះពាល់សេដ្ឋកិច្ចនៃពលរដ្ឋថៃ និងកម្ពុជា ដោយសារតែការបិទព្រំដែនរវាងប្រទេសទាំង២ ដែលមែនទែនទៅបង្កឡើងមុនជាឯកតោភាគីដោយយោធាថៃ ។ នេះបើតាមការចុះផ្សាយរបស់កាសែត The Nation។

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ ក្នុងអំឡុងកិច្ចប្រជុំនៅខេត្តស្រះកែវ នាថ្ងៃព្រហស្បតិ៍ ២៦ មិថុនា។ រូបភាពពីសារព័ត៌មានថៃ The Standard

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្ដែងកង្វល់ពីផលប៉ះពាល់នេះ ធ្វើឡើងនៅពេលលោកស្រីចុះមកទស្សនកិច្ចនៅស្រុក អារញ្ញប្រាថេត ខេត្តស្រះកែវ នាថ្ងៃព្រហស្បតិ៍ ២៦ មិថុនា នេះ ដើម្បីត្រួតពិនិត្យស្ថានការណ៍ ក៏ដូចជាធានានូវជំនួយដល់ប្រជាពលរដ្ឋ និងអាជីវកម្មដែលរងផលប៉ះពាល់ នៅច្រកព្រំដែនថៃ ជាប់ក្រុងប៉ោយប៉ែត នៃប្រទេសកម្ពុជា។ អំឡុងទស្សនកិច្ចនោះ លោកស្រីបានធ្វើជាអធិបតីក្នុងកិច្ចប្រជុំមួយ ដើម្បីពិភាក្សាអំពីភាពតានតឹងជាមួយកម្ពុជា រួមទាំងផលប៉ះពាល់សេដ្ឋកិច្ច។

អ្នកនាំពាក្យទីស្តីការនាយករដ្ឋមន្ត្រី លោក Jirayu Houngsub បានបង្ហើបថា លោកស្រី ផែថងថាន បានសម្តែងការព្រួយបារម្ភចំពោះផលប៉ះពាល់សេដ្ឋកិច្ចទាំងសម្រាប់ថៃ និងកម្ពុជា ដោយសារតែការបិទព្រំដែនទាំងអស់ រួមទាំងនៅខេត្តស្រះកែវ សុរិន្ទ អ៊ូប៊ុនរ៉ាត់ថានី បុរីរម្យ ត្រាត ស៊ីសាកេត និងច័ន្ទបុរី។

គួរគូសបញ្ជាក់ថា ថ្មីៗនេះ យោធាថៃបិទច្រកព្រំដែនដីគោកទាំងអស់ជាមួយកម្ពុជា ក្នុងការសម្រេចចិត្តជាឯកតោភាគី ដែលបង្កការឆ្លើយដូចគ្នាពីភាគីកម្ពុជា។ មុននោះ កម្ពុជាបានផ្អាកការនាំចូលប្រេង និងឧស្ម័នឥន្ធនៈ ក៏ដូចជាបន្លែផ្លែឈើ ផ្តាច់អគ្គិសនី និងអ៊ិនធឺណិត ដើម្បីឆ្លើយតបជាមុនទៅនឹងការរំខានសកម្មភាពតាមច្រកព្រំដែន និងការគំរាមកាត់ផ្ដាច់របស់ថៃ។

ភាពតានតឹងបែបនេះ បង្កក្ដីបារម្ភខ្លាំងសម្រាប់អាជីវកម្មទាំងខាងកម្ពុជា និងថៃ ជាពិសេសនៅជាប់ព្រំដែន។ យ៉ាងណាមិញ គេរំពឹងថា ផលប៉ះពាល់នឹងធ្ងន់សម្រាប់ភាគីថៃ ដែលមានអតិរេកពាណិជ្ជកម្មខ្ពស់រាប់ពាន់លានដុល្លារក្នុងមួយឆ្នាំជាមួយកម្ពុជា៕