មេដឹកនាំម៉ាឡេស៊ី ​ចេញវិធានការជួយពលរដ្ឋ ជុំ​វិញកំណើនចំណាយសម្រាប់ការរស់នៅ ​

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ​នា​ថ្ងៃពុធនេះ​បានប្រកាសវិធានការថ្មីៗ ដើម្បីដោះស្រាយ​កំណើននៃការមិនសប្បាយចិត្ត​របស់​សាធារណៈ ជុំវិញកំណើនតម្លៃនៃការរស់នៅ ដែលសំដៅលើការចំណាយ​សម្រាប់ការរស់នៅប្រចាំថ្ងៃ។ វិធានការទាំងនោះរួមបញ្ចូលទាំង​ការ​ផ្តល់សាច់ប្រាក់សម្រាប់ពលរដ្ឋពេញវ័យទាំងអស់ និងការសន្យាបញ្ចុះថ្លៃប្រេងឥន្ធនៈជាដើម​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការប្រកាសនេះ​ ធ្វើឡើងចំពេលដែល​ពលរដ្ឋម៉ាឡេស៊ីចន្លោះពី ១០ ០០០ – ១៥ ០០០ នាក់ (តាមការព្យាកររបស់ប៉ូលិស) គ្រោងប្រមូលផ្ដុំគ្នាតវ៉ានៅក្រុងគូឡាឡំពួរ នាថ្ងៃសៅរ៍នេះ ដោយ​អំពាវនាវឱ្យលោក អាន់វ៉ា ចុះចេញពីតំណែង ជុំវិញកំណើន​តម្លៃទំនិញ​ និងការ​បរាជ័យ​មិនបាន​ធ្វើកំណែទម្រង់តាមការសន្យា ​ក្នុងចំណោមកង្វល់ផ្សេងៗទៀត។

កន្លងមក រដ្ឋបាលរបស់លោក អាន់វ៉ា បានអនុវត្តវិធានការមួយចំនួន ដើម្បីបង្កើនប្រាក់ចំណូល និងផលិតភាពនៅឆ្នាំនេះ រួមទាំងការដំឡើងប្រាក់ឈ្នួលអប្បបរមា ការដំឡើងពន្ធអគ្គិសនីលើអ្នកប្រើប្រាស់ថាមពល​ច្រើន​ និងពន្ធលើការលក់​ផ្លែឈើ និងទំនិញប្រណីតថ្មីនាំចូលមួយ​។

លោក អាន់វ៉ា បាននិយាយថា ​វិធានការទាំងនោះ ​ផ្តោតជាចម្បងទៅលើអាជីវកម្មធំៗ និងអ្នកមាន ប៉ុន្តែអ្នករិះគន់បានសម្តែងការភ័យខ្លាចថា ​កំណើនពន្ធខ្ពស់នឹង​ជះឥទ្ធិពលលើអ្នកប្រើប្រាស់ ​រួមទាំងអ្នកដែលមានចំណូលទាប និងមធ្យមផងដែរ។

​យ៉ាងណាមិញ នៅថ្ងៃពុធនេះ​ លោក អាន់វ៉ា បាននិយាយថា ប្រជាជនម៉ាឡេស៊ីពេញវ័យទាំងអស់ដែលមានអាយុលើសពី ១៨ ឆ្នាំទៅ នឹងទទួលបានជំនួយជាសាច់ប្រាក់ ១០០ រីងហ្គីត (២៣,៦៧ ដុល្លារ) /ម្នាក់​​ចាប់ពីថ្ងៃទី ១ សីហា​ តទៅ។

នាយករដ្ឋមន្ត្រីម៉ាឡេស៊ីដដែល បាន​ទទួល​ស្គាល់​ការ​ត្អូញត្អែរ​របស់​ប្រជាជន ហើយ​បាន​ទទួល​ស្គាល់​ថា​ «តម្លៃ​នៃ​ការ​រស់​នៅ» ​នៅ​តែ​ជា​បញ្ហា បើ​ទោះ​បី​ជា​រដ្ឋាភិបាល​របស់លោក​ បាន​​ចាត់​វិធានការ​រួច​ហើយ​ក៏​ដោយ។ លោកគូសបញ្ជាក់ថា ជំនួយថ្មីសម្រាប់អ្នកក្រីក្រនឹងត្រូវបានប្រកាសឡើង​នៅថ្ងៃព្រហស្បតិ៍ ​ខណៈផែនការស្ដីពីការបញ្ជុះតម្លៃប្រេងនឹង​បង្ហាញឡើងនៅខែកញ្ញា។ ​

លោក អាន់វ៉ា ក៏បានប្រកាសផងដែរ ​អំពីការផ្តល់មូលនិធិបន្ថែមសម្រាប់កម្មវិធីរដ្ឋាភិបាល ដើម្បីធ្វើឱ្យទំនិញ​ទូទៅមានតម្លៃសមរម្យ ហើយបានសន្យាថានឹងពង្រឹងកម្មវិធីជំនួយ ដែលមានស្រាប់។

​គេមើលឃើញថា ខណៈអតិផរណាបានធ្លាក់ចុះនៅឆ្នាំនេះ ​ប្រជាជនម៉ាឡេស៊ីជាច្រើននៅតែមានការព្រួយបារម្ភអំពីការ​កំណើនថ្លៃម្ហូបអាហារ៕