សេដ្ឋកិច្ច

យន្តហោះខ្នាត A320 ត្រៀមសាកល្បងហោះហើរលើកដំបូង នៅព្រលាន 4F តេជោ សប្ដាហ៍ក្រោយ

បានផុស

១០ ខែ មុន

នៅ

ថ្ងៃសុក្រ ៨ សីហា ២០២៥

ដោយ

យន្តហោះប្រភេទ Airbus 320 ត្រៀមការហោះហើរសាកល្បងលើកដំបូងនៅអាកាសយានដ្ឋានអន្តរជាតិតេជោ នៅថ្ងៃទី ១៥ ខែសីហានេះ ខណៈអាកាសយានដ្ឋានលំដាប់ 4F តម្លៃ ២ ពាន់លានដុល្លារ មួយនេះបានបញ្ចប់ការសាងសង់ដំណាក់កាលទី១ និងត្រៀមបើកឱ្យដំណើរការនៅថ្ងៃទី ០៩ ខែកញ្ញា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC) មានប្រសាសន៍នៅថ្ងៃសុក្រនេះថា អាកាសយានដ្ឋានអន្តរជាតិតេជោ បានបិទបញ្ចប់ការសាងសង់ទាំងស្រុង និងត្រៀមដាក់ឱ្យដំណើរការនៅថ្ងៃទី ៩ ខែកញ្ញាខាងមុខនេះ។

លោកបញ្ជាក់ថា ក្រុមហ៊ុនហោះហើរនៅព្រលានយន្តហោះអន្តរជាតិភ្នំពេញ បានត្រៀមរៀបចំរួចរាល់ហើយ ក្នុងការផ្ទេរមកអាកាសយានដ្ឋានអន្តរជាតិតេជោ។

លោកឧកញ៉ា ឆារស៍ វ៉ាន់ បានឱ្យដឹងថា ក្រុមហ៊ុនហោះហើរនៅព្រលានយន្តហោះអន្តរជាតិភ្នំពេញទាំងអស់ នឹងផ្ទេរមកព្រលានយន្តហោះតេជោថ្មី ខណៈមានក្រុមហ៊ុនថ្មី២ បន្ថែមទៀត បានចុះហត្ថលេខាជាមួយព្រមលានតេជោ នឹងត្រៀមហោះហើរនៅខែកញ្ញាខាងមុខនេះដែរ។

លោកឧកញ៉ា ឆារស៍ វ៉ាន់បន្ថែមថា៖ «បច្ចេកទេសយើងបានធ្វើតេស្តសាកល្បង២ រួចហើយ ហើយអាកាសចរស៊ីវិលបានចេញអាជ្ញាបណ្ណរួចហើយដែរ ហើយយើងកំពុងត្រៀមខ្លួនប្រើ A320 ហោះហើរសាកល្បងនៅថ្ងៃទី ១៥ ខែសីហានេះ បន្ទាប់មកក៏មានក្រុមហ៊ុន ២ ទៀត សាកល្បងហោះហើរនៅដើមខែ ៩ ផងដែរ»។

វិស័យអាកាសចរណ៍កម្ពុជាកំពុងឈានចូលដល់ដំណាក់កាលផ្លាស់ប្តូរទៅកាន់សករាជថ្មី ជាមួយនឹងការបើកដំណើរការនៅពេលខាងមុខនៃអាកាសយានដ្ឋានអន្តរជាតិតេជោ និងការពង្រីកបណ្តាញផ្លូវអាកាសអន្តរជាតិរបស់កម្ពុជា ហើយយើងមានគោលបំណងដាក់ប្រទេសកម្ពុជាជាមជ្ឈមណ្ឌលអាកាសចរណ៍ក្នុងតំបន់ដែលឆ្លើយតបនឹងស្តង់ដារអន្តរជាតិខាងសុវត្ថិភាព ប្រសិទ្ធភាព និងនិរន្តរភាព។

លោក លោក ស៊ីន ចាន់សិរីវុត្ថា មានប្រសាសន៍ថា ទោះបីជាមានភាពមិនប្រាកដប្រជា និងការប្រែប្រួលនៃតម្លៃប្រេងឥន្ធនៈ លើទីផ្សាពិភពលោក និងការកើនឡើងថ្លៃដើមប្រតិបត្តិការ និងជម្លោះក្នុងតំបន់ និងសកលក៏ដោយ ប៉ុន្តែមិនមានការកាត់បន្ថយជើងហោះហើរ ក្នុងរយៈពេល ៦-១២ខែចុងក្រោយនោះទេ, ចំណែកការតភ្ជាប់ថ្មីកំពុងស្ថិតក្រោមការចរចា ដូចជា ឥណ្ឌា មជ្ឈិមបូព៌ា និងទីក្រុងបន្ទាប់បន្សំរបស់ចិន។

អាកាសយានដ្ឋានអន្តរជាតិតេជោ ត្រូវបានជាប់ ឈ្មោះ ជា សំណង់ស្ថាបត្យកម្មដ៏អស្ចារ្យបំផុតមួយក្នុងចំណោម ១១-ស្ថាបត្យកម្មដ៏អស្ចារ្យបំផុតនៅ លើពិភពលោក ដោយដាក់ទីតាំងព្រលានយន្តហោះតេជោនៅជួរមុខនៃការរចនាប្រកប ដោយភាពច្នៃប្រឌិត និងនិរន្តរភាព។

អាកាសយានដ្ឋានអន្តរជាតិតេជោ នឹងមកជំនួសអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ដងលើសព្រលានបច្ចុប្បន្ន។

យោងតាមរដ្ឋលេខាធិការដ្ឋានអាកាសចរស៊ីវិល នៅក្នុងឆមាសទី១ ឆ្នាំ ២០២៥កម្ពុជាទទួលបានអ្នកដំណើរជាតិ និងអន្តរជាតិតាមផ្លូវអាកាសចំនួនជាង ៣,៦៥ លាននាក់ កើនឡើង ២០% ធៀបនឹងរយៈពេលដូចគ្នា កាលពីឆ្នាំ ២០២៤។

រដ្ឋលេខាធិការដ្ឋានអាកាសចរណ៍ស៊ីវិលបានព្យាករថា ការដឹកជញ្ជូនអ្នកដំណើរតាមផ្លូវអាកាសនឹងកើនដល់ចំនួន ៧,៥លាននាក់ និងទំនិញចំនួន ៨០ពាន់តោន នៅក្នុងឆ្នាំ ២០២៥នេះ៕