គម្រោង​អភិវឌ្ឍន៍ ​Bay of Lights ​នឹង​តភ្ជាប់កម្ពុជាទៅ​ទីផ្សារអន្តរជាតិបន្ថែមទៀត

គម្រោង​អភិវឌ្ឍន៍ បេ អហ្វ ឡៃថ៍ (BAY OF LIGHTS) ស្ថិត​នៅភូមិអុង សង្កាត់រាម ក្រុងកំពង់សោម ខេត្តព្រះសីហនុ នឹងទាក់ទាញក្រុមហ៊ុនអន្តរជាតិផ្សេងៗ ព្រមទាំង​ផ្តល់នូវការតភ្ជាប់​កម្ពុជាទៅ​កាន់ទីផ្សារ​អន្តរ​ជាតិ​ច្រើនជាងមុន ហើយបង្កើតឱកាសអាជីវកម្មក្នុងស្រុកឱ្យកាន់តែរីកចម្រើន។

​លោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ​បានលើកឡើងនៅព្រឹកថ្ងៃទី ០៨ ខែកញ្ញា ឆ្នាំ ២០២៥ ក្នុងពិធីសម្ពោធដាក់ឱ្យប្រើប្រាស់សាកល្បង (Soft Opening) អគារការិយាល័យ​មជ្ឈមណ្ឌលហិរញ្ញវត្ថុ អន្តរជាតិ នៅក្នុងគម្រោង បេ អហ្វ ឡៃថ៍។

​លោក ម៉ាង ស៊ីណេត​ បានថ្លែងកោតសរសើរ និងវាយតម្លៃចំពោះក្រុមហ៊ុន ខានូពី ស៊ែន ឌីវេឡុបម៉ិន ដែល​ខិតខំប្រឹងប្រែងអភិវឌ្ឍគម្រោង បេ អហ្វ ឡៃថ៍ (BAY OF LIGHTS) ពីមួយថ្ងៃទៅមួយថ្ងៃឱ្យកាន់តែ​ល្អប្រសើរឡើង។

គម្រោងនេះ ​បានចូលរួមចំណែកយ៉ាងសំខាន់ក្នុងការជំរុញការអភិវឌ្ឍន៍រួមទាំងការលើកកម្ពស់ វិស័យទេសចរណ៍ និងសេដ្ឋកិច្ចក្នុងខេត្តឱ្យកាន់តែទទួលបានភាពទាក់ទាញ និងរីកចម្រើន ​ជា​ពិសេសផ្តល់ការងារជូនប្រជាពលរដ្ឋទាំងក្នុងខេត្ត និងមកពីបណ្ដាខេត្តផ្សេងៗ ដើម្បីចូលរួមចំណែក​ជាមួយរាជរដ្ឋាភិបាលកម្ពុជា ក្នុងការលើកកម្ពស់កម្រិតជីវភាព និងកាត់បន្ថយភាពក្រី​ក្ររបស់ប្រជា​ពលរដ្ឋស្របតាមគោលនយោបាយ និងយុទ្ធសាស្រ្តបញ្ចកោណដំណាក់កាលទី១ របស់​រាជរដ្ឋាភិបាល​កម្ពុជា គឺ​ដើម្បីកំណើន​ការងារ សមធម៌ ប្រសិទ្ធភាព និង​ចីរភាព ដែល​ជាមូល​ដ្ឋាន​គ្រឹះឆ្តោះទៅសម្រេចបានចក្ខុវិស័យកម្ពុជាឆ្នាំ២០៥០។ ​

​គម្រោង Bay of Light គឺជាគម្រោងអាទិភាពដ៏សំខាន់មួយដែលរាជរដ្ឋាភិបាល និងរដ្ឋបាលខេត្ត​បាននឹងកំពុងគាំទ្រ និងខិតខំជួយសម្របសម្រួល ដើម្បីឱ្យគម្រោងនេះដំណើរការដោយរលូន និង​ទទួលបានជោគជ័យតាមដំណាក់ការនីមួយៗជាបន្តបន្ទាប់។

​ក្រៅពីកម្មវិធីពិសេសជំរុញការវិនិយោគ និងធានាជំរុញការអភិវឌ្ឍន៍ខេត្តព្រះសីហនុ និយាយ​ដោយឡែក និងនិយាយជារួម ការអភិវឌ្ឍន៍ប្រទេសកម្ពុជាទាំងមូល រាជរដ្ឋាភិបាលកម្ពុជា​បាននឹង​កំពុង​រៀបចំផែនការមេ អភិវឌ្ឍន៍ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដែលចែក​ចេញជាបួនតំបន់រួមមាន៖ តំបន់ទីក្រុងសមាហរណកម្ម តំបន់រស់នៅប្រណិត តំបន់ទេសចរណ៍​ប្រណិត មជ្ឈមណ្ឌលពាណិជ្ជកម្ម និងមជ្ឈមណ្ឌលហិរញ្ញវត្ថុអន្តរជាតិ។

តំបន់ឧស្សាហកម្ម និងភស្តុភារកម្ម៖ គឺរៀបចំជាសួនឧស្សាហកម្ម តំបន់សេដ្ឋកិច្ចពិសេស និងជាច្រកចេញចូលអន្តរជាតិ រួមទាំងជាមជ្ឈមណ្ឌល ភស្តុភារ កម្មជាតិ ដោយមានទំនាក់ទំនង ជាមួយទីផ្សារអាស៊ាន និងសកលលោក។

ក្នុងឆ្នាំ ២០២៣ ខេត្តព្រះសីហនុទទួលបានផលិតផលសរុបចំនួនប្រមាណ ១ ៦១៧ លានដុល្លារអាមេរិក ចំណូលជាមធ្យមសម្រាប់មនុស្សម្នាក់ (GDP) ចំនួន ៤ ៦០២ ដុល្លារ អាមេរិក អត្រាកំណើនសេដ្ឋកិច្ច ៦%។

​លោក ដេវីដ ដបសាន់ Mr David Richard Dobson នាយកអភិវឌ្ឍអាជីវកម្មជាន់ខ្ពស់ មានប្រសាសន៍​ថា ការដាក់ឱ្យប្រើប្រាស់សាកល្បង អគារការិយាល័យ​មជ្ឈមណ្ឌលហិរញ្ញវត្ថុអន្តរជាតិ​នៅក្នុង​គម្រោង បេ អហ្វ ឡៃថ៍ នឹងក្លាយជាចលករមួយ​សម្រាប់កម្ពុជា​ក្នុងការជំរុញវិនិយោគ​ដោយផ្ទាល់​ពី​បរទេសឱ្យចូលក្នុងប្រទេសកម្ពុជាហើយបង្កើតវេទិការដែលមានតម្លៃ​ស្មើគ្នាជាមួយប្រទេស​នៅលើ​សកលលោក។

គម្រោង​អភិវឌ្ឍន៍ បេ អហ្វ ឡៃថ៍ នឹងបង្កើតឱកាសការងារគ្មានដែនកំណត់ ក៏ដូចជាការនាំចូល​ជំនាញ និងសេវា​កម្មអន្តរជាតិ ហើយក៏ជាគម្រោងអភិវឌ្ឍដ៍អស្ចារ្យដែល​អាចឈរជើងលើឆាក​អន្តរជាតិ ប៉ុន្តែដើម្បី​សម្រេចនូវគោលបំណងនេះ ត្រូវការអត់ធ្មត់ ការធ្វើផែនការនិងភាពឯកភាព​​ជាបន្តបន្ទាប់ តាមរយៈ​ការបំបែកទីក្រុងមហាអធិកនេះជាជំហានតូចៗ ប៉ុន្តែពួកយើង​មាន​យុទ្ធសាស្ត្រ​យ៉ាងច្បាស់លាស់​ពីរ​ឆ្នាំមុន យើងចាប់ផ្តើមគម្រោង Bay of Lights ពីដីទំនេរដែល​មិនទាន់​មានអ្វីសោះ មកជាតំបន់​អភិវឌ្ឍន៍ វានឹងទាក់ទាញក្រុមហ៊ុនអន្តរជាតិផ្សេងៗ​ផ្តល់នូវការតភ្ជាប់​កម្ពុជា​ទៅកាន់​ទីផ្សារអន្តរជាតិ​​ច្រើនជាងមុខ ហើយបង្កើតឱកាសអាជីវកម្មក្នុង​ស្រុក​ឱ្យមានការរីកចម្រើន៕