ព័ត៌មានអន្ដរជាតិ

ត្រាំ និង ស៊ី គ្រោងជួបគ្នានៅកូរ៉េខាងត្បូងចុងខែក្រោយ

បានផុស

៩ ខែ មុន

នៅ

ថ្ងៃសៅរ៍ ២០ កញ្ញា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជីនពីង គ្រោងនឹងជួបគ្នានៅប្រទេសកូរ៉េខាងត្បូងនាចុងខែក្រោយ ដើម្បីចរចាគ្នាពីបញ្ហាពាណិជ្ជកម្ម លំហូរគ្រឿងញៀន និងជម្លោះអ៊ុយក្រែន-រុស្ស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានឱ្យដឹងយ៉ាងដូច្នេះកាលពីថ្ងៃសុក្រ ក្រោយបានសន្ទនាទូរស័ព្ទជាមួយលោក ស៊ី ជាង ២ ម៉ោង។ ក្រោមកិច្ចសន្ទនានោះផងដែរ លោក ត្រាំ បានលើកឡើងពីវឌ្ឍនភាពនៃការចរចាពាក់ព័ន្ធនឹងបញ្ហា TikTok នៅសហរដ្ឋអាមេរិក ដោយ «លោក (ស៊ី) បានយល់ព្រមលើកិច្ចព្រមព្រៀង TikTok»។

បើតាមរ៉យទ័រ មេដឹកនាំទាំង២ បានព្រមព្រៀងគ្នា ដើម្បី «ចរចាគ្នាបន្ថែមទៀត» នៅខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ដែលចាប់ផ្តើមនៅថ្ងៃទី ៣១ ខែតុលា នៅទីក្រុង Gyeongju ប្រទេសកូរ៉េខាងត្បូង។

លោក ត្រាំ ក៏បាននិយាយដែរថា លោកនឹងទៅបំពេញទស្សនកិច្ចនៅប្រទេសចិននៅដើមឆ្នាំក្រោយ ហើយលោក ស៊ី នឹងមកសហរដ្ឋអាមេរិកនៅពេលក្រោយទៀត។ កន្លងមក មានសេចក្ដីរាយការណ៍ថា មេដឹកនាំទាំង២ កំពុងរៀបចំផែនការកិច្ចប្រជុំគ្នាបែបនេះ។

សេចក្តីថ្លែងការណ៍របស់រដ្ឋាភិបាលចិនវិញ មិនបាននិយាយអ្វីមួយ សំដៅចំៗលើកិច្ចព្រមព្រៀងផ្លូវការជុំវិញបញ្ហា TikTok នោះទេ។ ដោយអំពាវនាវកុំឱ្យមានការរើសអើងចំពោះក្រុមហ៊ុនរបស់ខ្លួន រដ្ឋាភិបាលនិយាយថា៖ «ជំហររបស់ចិនលើបញ្ហា TikTok គឺច្បាស់ណាស់៖ រដ្ឋាភិបាលចិនគោរពនូវបំណងប្រាថ្នារបស់ក្រុមហ៊ុន។ សហរដ្ឋអាមេរិកនឹងធ្វើការជាមួយប្រទេសចិនលើបញ្ហាសេដ្ឋកិច្ច និងពាណិជ្ជកម្ម ហើយគាំទ្រក្រុមការងារក្នុងការឈានដល់កិច្ចព្រមព្រៀងត្រឹមត្រូវជុំវិញបញ្ហា TikTok តាមរយៈការពិគ្រោះយោបល់»៕