តម្លៃប្រេងអន្តរជាតិ​ធ្លាក់ចុះមកវិញដើមសប្ដាហ៍នេះ ជុំវិញ​កំណើនការផ្គត់ផ្គង់

តម្លៃប្រេងអន្តរជាតិបាន​ធ្លាក់ចុះមកវិញ សម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទ ដើមសប្ដាហ៍នេះ ក្រោយ​​កើនឡើងប្រចាំសប្ដាហ៍ពេលបិទការជួញដូរ​កាលពីថ្ងៃសុក្រ​​ ជុំវិញ​កង្វល់ពាក់ព័ន្ធនឹង​ការផ្គត់ផ្គង់។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងនាពេលអនាគត ម៉ាក Brent បាន​ធ្លាក់ចុះ ៥៥ សេន ឬ ០,៧៨​ ភាគរយ ដោយ​ជួញដូរនៅតម្លៃ ៦៩,៥៨ ដុល្លារ/បារ៉ែល ខណៈតម្លៃប្រេងអាមេរិក ធ្លាក់ចុះ ៦២ សេន ឬ ០,៩៤ ភាគរយ ដោយ​ជួញដូរ​នៅតម្លៃ ៦៥,១០ ដុល្លារ/បារ៉ែល។

តម្លៃប្រេងទាំង ២ បាន​កើនឡើងជាង ៤ ភាគរយ ដែល​ជាកំណើនប្រចាំសប្ដាហ៍ខ្ពស់បំផុតរាប់តាំងពីខែមិថុនា ដោយសារតែកង្វល់នៃការផ្គត់ផ្គង់ប្រេងរបស់រុស្ស៊ី ក្នុងបរិបទជម្លោះអ៊ុយក្រែន និងភាព​រឹងមាំនៃតម្រូវការប្រេងសាំងនៅសហរដ្ឋអាមេរិក។

យ៉ាងណាមិញ អ្នកជំនាញបាន​លើកឡើងថា តម្លៃប្រេងធ្លាក់ចុះនៅសប្ដាហ៍នេះ កើតឡើង​ចំពេលដែល​អ្នកវិនិយោគិនរំពឹងពីកំណើននៃការផ្គត់ផ្គង់​ជាថ្មី​ បន្ទាប់ពីតំបន់កួដនៃប្រទេសអ៊ីរ៉ាក់ បើកការនាំចេញប្រេងទៅកាន់តួកគីឡើងវិញនៅចុងសប្ដាហ៍ ក្រោយ​ពីផ្អាកអស់រយៈពេលជាង ២ ឆ្នាំកន្លះ។ ការសម្រេចចិត្តនេះ នឹង​អនុញ្ញាតឱ្យតំបន់កួដ នាំចេញប្រេងចន្លោះពី ១៨០ ០០០ – ១៩០ ០០០ បារ៉ែល/ថ្ងៃ ទៅកាន់កំពង់ផែ Ceyhan របស់តួកគី។ នេះបើតាមការឱ្យដឹងរបស់រដ្ឋមន្រ្តីក្រសួងប្រេងកាតអ៊ីរ៉ាក់។

លើសពីនេះ មាន​សេចក្ដីរាយការណ៍ថា អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) គ្រោង​នឹង​ជួបគ្នានៅថ្ងៃអាទិត្យខាងមុខ ដើម្បីពិភាក្សាគ្នាលើផែនការបង្កើនផលិតកម្មប្រេងថ្មី យ៉ាង​ហោចណាស់ ១៣៧ ០០០ បារ៉ែល/ថ្ងៃ៕