ក្រៅពីវ៉ាក់សាំង ថ្នាំគ្រាប់៤ប្រភេទនេះ អាចជាអាវុធរបស់ពិភពលោកក្នុងការកម្ចាត់កូវីដ

ក្រុមហ៊ុនផលិតឱសថធំៗ បានបង្ហាញក្ដីសង្ឃឹមដល់ពិភពលោកនូវការបង្កើតថ្នាំគ្រាប់ព្យាបាលជំងឺកូវីដ-១៩ ្ដើម្បីបង្កភាពងាយស្រួលសម្រាប់អ្នកជំងឺព្យាបាលនៅតាមផ្ទះ។ ក្នុងនោះមានថ្នាំគ្រាប់ខ្លះជាការផលិតថ្មី និងខ្លះទៀតជាថ្នាំដែលធ្លាប់បានដាក់ឱ្យប្រើប្រាស់ជាយូរហើយ ហើយពេលនេះថ្នាំទាំងនោះកំពុងស្ថិតក្នុងដំណាក់កាលសាកល្បងនិងពិសោធន៍។

តើមកទល់បច្ចុប្បន្ន ក្រៅពីវ៉ាក់សាំង តើមានថ្នាំគ្រាប់ប៉ុន្មានប្រភេទហើយដែលអ្នកជំនាញកំពុងសិក្សានិងស្នើឱ្យប្រើប្រាស់?

១. ថ្នាំ PF-07321332

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

PF-07321332 ជាថ្នាំគ្រាប់ផលិតដោយក្រុមហ៊ុន Pfizer ហើយពេលនេះក្រុមហ៊ុនកំពុងសាកល្បងវាទៅលើអ្នកស្ម័គ្រចិត្តនៅសហរដ្ឋអាមេរិកនិងទ្វីបអឺរ៉ុប។ Pfizer អាចចាប់ផ្តើមផលិតថ្នាំបង្ការកូវីដ-១៩មួយប្រភទនេះ នៅត្រឹមចុងឆ្នាំ២០២១ ប្រសិនការពិសោធន៍ទទួលជោគជ័យ។

អ្នកផលិតវ៉ាក់សាំងសង្ឃឹមថា ថ្នាំ PF-07321332 នឹងការពារអ្នកជំងឺកូវីដកុំឱ្យវិវត្តទៅជារោគសញ្ញាធ្ងន់ធ្ងរ ក៏ដូចជាការពារវីរុសបំប្លែងខ្លួនប្រភេទថ្មីផងដែរ។

២. ថ្នាំ Molnupiravir

ថ្នាំ Molnupiravir សម្រាប់ប្រើព្យាបាលអ្នកជំងឺវិជ្ជមានកូវីដ-១៩មួយប្រភេទនេះ កំពុងស្ថិតក្នុងដំណាក់សាកល្បងកាលទី ៣ ដែលធ្វើឡើងដោយក្រុមហ៊ុន Natco Pharma Limited របស់ឥណ្ឌា។ ពេលនេះក្រុមហ៊ុនកំពុងដាក់ពាក្យស្នើសុំទៅអង្គការត្រួតពិនិត្យស្តង់ដារឱសថថ្នាក់កណ្តាល (CDSCO) ដើម្បីអនុម័តលើការធ្វើតេស្តរបស់ខ្លួន។

បើយោងតាមសេចក្តីប្រកាសព័ត៌មានពីក្រុមហ៊ុន Natco និយាយថា ថ្នាំ Molnupiravir មិនត្រឹមតែមានសមត្ថភាពប្រឆាំងនឹងជំងឺផ្តាសាយប៉ុណ្ណោះទេ តែវាអាចទប់ស្កាត់វីរុស SARS-CoV-2 យ៉ាងមានប្រសិទ្ធភាពផងដែរ។

៣. ថ្នាំ Baricitinib

កាលពីសប្ដាហ៍មុន ក្រសួងសុខាភិបាលជប៉ុន បានយល់ព្រមឲ្យប្រើប្រាស់ថ្នាំព្យាបាលជំងឺរលាកសន្លាក់រ៉ាំរ៉ៃឈ្មោះ Baricitinib ដើម្បីព្យាបាលអ្នកកើតជំងឺកូវីដ-១៩ នៅក្នុងប្រទេសរបស់ខ្លួន។

ថ្នាំគ្រាប់ Baricitinib ត្រូវបានអះអាងថា អាចព្យាបាលអ្នកជំងឺកូវីដដែលមានរោគសញ្ញាកម្រិតមធ្យម​និងអ្នកជំងឺធ្ងន់ធ្ងរដែលត្រូវការអុកស៊ីសែន​ឱ្យមានអាការធូរស្រាលឡើងបាន ប៉ុន្តែវាត្រូវផ្សំជាមួយថ្នាំ Remdesivir។

៤. ថ្នាំ Avigan ឬ Favipiravir 

Avigan ឬ Favipiravir ជាថ្នាំគ្រាប់ធ្លាប់បានប្រើប្រាស់រួចមកហើយនាពេលកន្លងមក ហើយបច្ចុប្បន្នវាត្រូវបានក្រុមហ៊ុន Fujifilm របស់ជប៉ុន កំពុងធ្វើតេស្តនៅដំណាក់កាលចុងក្រោយ។

ថ្នាំនេះត្រូវបានក្រុមហ៊ុន Fujifilm Holdings Corp អះអាងថា អាចព្យាបាលអ្នកជំងឺកូវីដ-១៩ សម្រាកព្យាបាលនៅតាមផ្ទះដែលមានអាយុលើសពី ៥០ ឆ្នាំ និងអ្នកដែលមានហានិភ័យនៃការវិវត្តទៅជារោគសញ្ញាធ្ងន់ធ្ងរ។ មិនតែប៉ុណ្ណោះ Favipiravir ក៏ត្រូវបានអង់គ្លេសធ្វើការសាកល្បងនៅដំណាក់កាលដំបូង ហើយអ្នកវិទ្យាសាស្ត្រអះអាងថា វាមានសក្តានុពលក្នុងការសម្លាប់មេរោគ SARS-CoV-2 ក្នុងរយៈពេលត្រឹមតែប៉ុន្មានថ្ងៃ៕

អត្ថបទ៖ សន្យា

ចុចអាន៖ ថ្នាំគ្រាប់មួយប្រភេទទៀត ក្រុមហ៊ុនឱសថរបស់ឥណ្ឌាអះអាងថាអាចជួយព្យាបាលអ្នកជំងឺកូវីដ

ចុចអាន៖ ថ្នាំគ្រាប់ការពារកូវីដរបស់ក្រុមហ៊ុន Pfizer នឹងចាប់ផ្តើមផលិតនៅចុងឆ្នាំនេះ បើការសាកល្បងជោគជ័យ