ខេត្តបាត់ដំបង​បន្ត​រកឃើញ​អ្នក​វិជ្ជមាន​កូ​វីដ​១៩​ ចំនួន​១៥​នាក់​បន្ថែម​ទៀត

រដ្ឋបាលខេត្តបាត់ដំបង បានចេញសេចក្តីជូនដំណឹងស្តីពីករណីវិជ្ជមានកូវីដ១៩ថ្មីចំនួន១៥នាក់បន្ថែមទៀត ដែលក្នុងនោះពាក់ព័ន្ធនឹងសហគមន៍ ២០ កុម្ភ: ចំនួន៨នាក់ និងធ្វើដំណើរមកពីប្រទេសថៃ ចំនួន៧នាក់ ព្រមទាំងមានអ្នកជាសះស្បើយចំនួន ២នាក់។

អ្នកជំងឺកូវីដ១៩ខាងលើ ជាអ្នកសង្ស័យពាក់ព័ន្ធជាមួយព្រឹត្តិការណ៍សហគមន៍ ២០ កុម្ភៈ មកពីរាជធានីភ្នំពេញ មកពីខេត្តកណ្តាល និងមកពីខេត្តបន្ទាយមានជ័យ អ្នកពាក់ព័ន្ធជាមួយបុគ្គលិកមជ្ឈមណ្ឌលវេជ្ជសាស្រ្ត ហាន់ដា (HANDA) ក្រុងបាត់ដំបង និងជាពលករវិលត្រឡប់មកពីប្រទេសថៃ ត្រូវបានចាត់បញ្ជូនមកធ្វើចត្តាឡីស័កកម្រិត១ នៅតាមស្រុក និងបានយកសំណាកទៅវិភាគទទួលបានលទ្ធផលនៅថ្ងៃទី២១ ខែឧសភា ឆ្នាំ២០២១ ឃើញថា មានជំងឺកូវីដ១៩ ហើយបានបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តបាត់ដំបង មន្ទីរពេទ្យបង្អែកស្រុកថ្មគោល មន្ទីរពេទ្យបង្អែកស្រុកមោងឫស្សី និងនៅមន្ទីរពេទ្យបង្អែកស្រុកសំពៅលូន។

ចាប់តាំងពីមានការឆ្លងរាលដាលជំងឺកូវីដ១៩ ខេត្តបាត់ដំបង មានអ្នកជំងឺកូវីដ១៩ ចំនួន ១៣០នាក់ បានព្យាបាលជាសះស្បើយ ៤៣នាក់ ករណីស្លាប់ ១នាក់ បញ្ជូនទៅព្យាបាលនៅខេត្តបន្ទាយមានជ័យ ចំនួន ២នាក់ និងកំពុងសម្រាកព្យាបាលក្នុងខេត្តបាត់ដំបង ចំនួន ៨៤នាក់៕ សោ និយមរ័ត្ន

សោ និយមរ័ត្ន

សូមចុចអាន៖ ​ខេត្តកំពង់ចាមប្រកាសរកឃើញករណីវិជ្ជមានកូវីដ៨៤នាក់ ក្នុងចំណោម៨៧៤នាក់

​