អ្នកជំងឺកូវីដនៅស្រុកស្រែអំបិល ៣៧ នាក់ជាសះស្បើយ

អ្នកជំងឺកូវីដ១៩ចំនួន ៣៧ នាក់ មានស្ត្រី ២៣ នាក់ បានជាសះស្បើយពីជំងឺកូវីដ១៩ ហើយហើយអនុញ្ញាត​ឱ្យវិល​ត្រឡប់ទៅលំនៅដ្ឋានវិញ។

ប្រធានមន្ទីរសុខាភិបាលខេត្តកោះកុង លោក ទៅ ម៉ឹង បានឱ្យដឹងនៅថ្ងៃទី ៩ មិថុនានេះថា អ្នកជំងឺដែលបានជាសះស្បើយនោះ ភាគច្រើនជាប្រជាពលរដ្ឋរស់នៅភូមិសិលាម្នាង ភូមិផ្លោង នៅឃុំបឹងព្រាវ និងភូមិវាលជើង ភូមិខ្លុង ឃុំស្រែអំបិល។

ក្រៅពីមូលដ្ឋានស្រុកស្រែអំបិល ក៏មានអ្នកជាសះស្បើយពីកូវីឌចំនួន២នាក់ផងដែរនៅក្នុងមន្ទីរពេទ្យបង្អែកខេត្តកោះកុង កាលពីថ្ងៃ៨ មិថុនា ម្សិលមិញ។
លោកប្រធានមន្ទីរសុខាភិបាលខេត្ត ដំណើរការទទួលបានជោគជ័យលើការព្យាបាលអ្នកជំងឺនៅពេលនេះ ដោយសារតែក្រុមការងារបានប្រឹងប្រែងសម្បើមណាស់ចំពោះការតាមដានពិនិត្យព្យាបាល ស្វែងអ្នកពាក់ព័ន្ធ និងទប់ស្កាត់ការឆ្លងរីករាលដាលក្នុងសហគមន៍បន្ត គិតចាប់តាំងពីថ្ងៃទី២២ ខែឧសភា រហូតដល់ម៉ោងនេះ។

ប្រធានមន្ទីរសុខាភិបាលខេត្ត ទទូចឱ្យអ្នកជំងឺកូវីដ ដែលជាសះស្បើយ និងវិលត្រឡប់ទៅផ្ទះវិញ ចាំបាច់បន្តអនុវត្តវិធានការសុខាភិបាលឱ្យខ្ជាប់ខ្ជួន ដោយការនៅដាច់ដោយឡែក រក្សាគម្លាត កុំទៅកន្លែងប្រមូលផ្តុំមានមនុស្សច្រើន ពាក់ម៉ាស់ និងលាងដៃនឹងសាប៊ូអាល់កុលជាដើម៕ អត្ថបទៈ សិរីវឌ្ឍនៈ