រដ្ឋមួយនៅឥណ្ឌា រកឃើញថា អ្នកជំងឺកូវីដដល់ទៅ ៩៩,៧ភាគរយដែលស្លាប់ គឺជាអ្នកមិនចាក់វ៉ាក់សាំង

នាយកដ្ឋានសុខាភិបាលនិងសុខុមាលភាពគ្រួសាររបស់រដ្ឋបាននិយាយថា ការស្លាប់ស្ទើរតែទាំងអស់ដោយសារជំងឺកូវីដ-១៩នៅក្នុងរដ្ឋ Nagaland នៃប្រទេសឥណ្ឌា បន្ទាប់ពីខែកុម្ភៈ គឺជាមនុស្សដែលមិនទាន់បានចាក់វ៉ាក់សាំងគ្រប់ដូស។

ទិន្នន័យរបស់នាយកដ្ឋានបានបង្ហាញថា​ ក្នុងចំណោមអ្នកស្លាប់ចំនួន៣៧៥នាក់ នៅក្នុងរដ្ឋនេះ ចាប់ពីខែកុម្ភៈមក មានតែអ្នកជំងឺម្នាក់ប៉ុណ្ណោះ ដែលចាក់វ៉ាក់សាំងដូសទី២បានពីរសប្តាហ៍។

រដ្ឋ Nagaland បានចាប់ផ្តើមដំណាក់កាលដំបូងនៃការចាក់វ៉ាក់សាំង រួមជាមួយតំបន់ផ្សេងទៀតក្នុងប្រទេសកាលពីថ្ងៃទី១៦ខែមករា ខណៈបុគ្គលិកសុខាភិបាលត្រូវបានផ្តល់អាទិភាពសម្រាប់ការចាក់វ៉ាក់សាំង។

នាយកដ្ឋានសុខាភិបាលបានជូនដំណឹងថា រហូតមកដល់ពេលនេះ គ្មានបុគ្គលិកសុខាភិបាលសកម្មណាម្នាក់នៅក្នុងមន្ទីរពេទ្យកូវីដ បានស្លាប់ដោយសារវីរុសនោះទេ បើទោះបីជាមានហានិភ័យខ្ពស់បំផុតនៃការប៉ះពាល់ក៏ដោយ ខណៈបុគ្គលិកថែទាំសុខភាពភាគច្រើនបានចាក់វ៉ាក់សាំងពេញលេញ។

គិតត្រឹមថ្ងៃសៅរ៍ ការចាក់វ៉ាក់សាំងចំនួន ៤០២,៧៧៨ដូស (លើកទី១ចំនួន ៣,៤៧,៤១៥ដូសនិងលើកទី២ចំនួន៥៥,៣៦៣ដូស ត្រូវបានចាក់នៅក្នុងរដ្ឋ Nagaland។ បុគ្គលិកសុខាភិបាល១០,៣៦៥នាក់, បុគ្គលិកជួរមុខ២៨,៣៤៤នាក់, មនុស្សអាយុលើស៤៥ឆ្នាំ១៦,៦៥៣នាក់និងមនុស្សអាយុចន្លោះ ១៨ដល់៤៤ឆ្នាំម្នាក់ បានទទួលវ៉ាក់សាំងគ្រប់ទាំងពីរដូស៕

ប្រែសម្រួល៖ Vann Vann

ប្រភព៖ Eas​t Mojo

ចុចអាន៖ ពលរដ្ឋ ឥណ្ឌា នៅតែជួបជុំងូតទឹកទន្លេគង្គា ក្នុងពិធីបុណ្យសាសនាមួយទៀត ដោយជឿថា ព្រះអាទិទេពចុះពីលើមេឃមកផែនដីជួយការពារកូវីដ