ក្រោយចាក់វ៉ាក់សាំង បុគ្គលិកនៅ វៀតណាម ២ នាក់ស្លាប់

មន្ទីរសុខាភិបាលខេត្តបានប្រកាសកាលពីថ្ងៃពុធថា បុគ្គលិក ២ នាក់នៅខេត្ត Thanh Hoa ភាគកណ្តាលវៀតណាមបានស្លាប់ បន្ទាប់ពីបានចាក់វ៉ាក់សាំងប្រឆាំងនឹងជំងឺកូវីដ ១៩ ។

យោងតាមមន្ទីរសុខាភិបាលខេត្តបានឲ្យដឹងថា មជ្ឈមណ្ឌលវេជ្ជសាស្ត្រស្រុក Nong Cong បានចាក់វ៉ាក់សាំង Vero Cell របស់ក្រុមហ៊ុន Sinopharm ដូសទី ២ ដល់បុគ្គលិកនៃក្រុមហ៊ុន Kim Viet Shoe កាលពីថ្ងៃអង្គារ ។

ទន្ទឹមនោះ មនុស្សទាំងអស់ដែលបានចាក់វ៉ាក់សាំងក៏បានពិនិត្យសុខភាពរបស់ពួកគេផងដែរ ហើយត្រូវបានណែនាំអំពីផលប៉ះពាល់ដូចគ្នា ។

បន្ទាប់ពីចាក់វ៉ាក់សាំង បុគ្គលិកជាច្រើននាក់ចាប់ផ្តើមមានផលប៉ះពាល់ ។ ពួកគេ ៥ នាក់ មានប្រតិកម្មធ្ងន់ធ្ងរ ត្រូវបានគេធ្វើរោគវិនិច្ឆ័យថាមានអាឡ័កស៊ីជាមួយថ្នាំ ហើយត្រូវបានបញ្ជូនទៅមន្ទីរពេទ្យបង្អែកស្រុក Nong Cong ខណៈក្រោយមកទៀតបញ្ជូនទៅមន្ទីរពេទ្យបង្អែកខេត្ត ។

ក្រោយមកបុគ្គលិក ២ នាក់បានស្លាប់នៅព្រឹកថ្ងៃពុធ វេលាម៉ោង ០០ និង ៤៥ នាទី និងម៉ោង ៨ និង ៤៥ នាទីព្រឹក ហើយមូលហេតុនៃផលវិបាករបស់ពួកគេ បន្ទាប់ពីការចាក់វ៉ាក់សាំងកំពុងត្រូវបានស៊ើបអង្កេត ។

គួរបញ្ជាក់ថា ខេត្ត Thanh Hoa បានកត់ត្រាករណីឆ្លងកូវីដប្រហែល ២,០០០ ករណីនៅក្នុងរលកឆ្លងទី ៤ ដែលក្នុងនោះមានជាង ១,០០០ នាក់បានជាសះស្បើយ និង ១២ នាក់បានស្លាប់ ខណៈប្រហែល ២.២ លាននាក់បានទទួលការចាក់វ៉ាក់សាំង ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ អ្នកជំនាញ វៀតណាម ថា ឆ្នាំក្រោយ កូវីដ នឹងក្លាយជាជំងឺធម្មតា ស្រដៀង ផ្ដាសាយ