យុទ្ធនាការ “ដើរដើម្បីធម្មជាតិ” ដើរពីភ្នំពេញទៅភ្នំឱរ៉ាល់ ទទួលបានស្វាគមន៍យ៉ាងកក់ក្តៅពីសាធារណជនខ្មែរ

លោក តាន់ គីមសួរ សកម្មជនព្រៃឈើដែលតែងសកម្មក្នុងការបំផុសឱ្យពលរដ្ឋកម្ពុជា ចូលរួមរក្សាការការពារធនធានធានធម្មជាតិ បាននិងកំពុងបំពេញដំណើរបេសកកម្មថ្មីមួយ តាមរយៈយុទ្ធនាការ “ដើរដើម្បីធម្មជាតិ” ដោយទទួលបានការស្វាគមន៍យ៉ាងកក់ក្តៅ។

យុទ្ធនាការនេះ ធ្វើឡើងក្នុងគោលបំណងផ្សព្វផ្សាយ និងជំរុញការការពារព្រៃឈើលើទឹកដីនៃព្រះរាជាណាចក្រកម្ពុជា ដោយដើរពីភ្នំពេញ ទៅកាន់ភ្នំឱរ៉ាល់ ។ មិនតែប៉ុណ្ណោះ ដំណើរថ្មើរជើងនេះ ក៏តំណាងឱ្យភាពតស៊ូរឹងមាំស្ត្រីកម្ពុជា ដោយមានអ្នកជំនួញអនឡាញដ៏មានប្រជាប្រិយ មាស ចាន់ដាលីន, លោក ទ្រី សុីថេង ព្រមនិងសមាជិកមួយចំនួនទៀត។

គិតចាប់ផ្តើមតាំងពីថ្ងៃទី០៥តុលា ដំណើរបេសកកម្មនេះមានរយៈពេលជិត ១សប្តាហ៍ហើយ ខណៈក្រុមអ្នកថ្មើរជើងទាំងអស់ កំពុងស្ថិតនៅលើទឹកដីនៃខេត្តកំពង់ស្ពឺ និងទទួលបានការស្វាគមន៍យ៉ាងកក់ក្តៅពីមន្ត្រីមូលដ្ឋាន លោកគ្រូអ្នកគ្រូ សាធារណជន អ្នកសិល្បៈ ពិសេសទំពាំងស្នងឬស្សីរបស់ជាតិ។

ជាក់ស្តែង ក្នុងដំណើរថ្មើរជើងនេះ មានការចូលរួមគាំទ្រយ៉ាងផុសផុលពីក្មេងៗ យុវជនយុវតី ខណៈខ្លះបានស្កាត់ទៅផ្តល់ការគាំទ្រតាមផ្លូវធ្វើដំណើរ និងចូលរួមថវិកាគាំទ្រថែមទៀត បើទោះបីជាមិនមានការរៃអង្គាសក៏ដោយ។ អ្វីដែលកាន់តែគួរឱ្យស្ញប់ស្ញែង ថវិកាដែលទទួលក្នុងដំណើរនៃបេសកកម្មនេះ លោក តាន់ គីមសួរ និងអ្នកស្រី មាស ចាន់ដាលីន ក៏បានយកទៅប្រគល់ជូនអ្នកខ្វះខាតដែលបានជួបប្រទះតាមដងផ្លូវធ្វើដំណើរផងដែរ។

តាមរយៈដំណើរបេសកកម្មនេះ អ្នកផ្តួចផ្តើមធំទាំងបីរូប បានបង្ហាញអារម្មណ៍រំភើបមិនអាចពណ៌នាបាន ក៏ព្រោះតែជនរួមជាតិខ្មែរ បានយល់ពីតម្លៃនៃសកម្មភាពរបស់ពួកគាត់ ក្នុងន័យដើម្បីការពារសម្បត្តិធម្មជាតិដែលកំពុងរងការបំផ្លិចបំផ្លាញមិនឈប់។