ជំនួបខ្លីនៅ G7៖ កូរ៉េខាងត្បូងស្នើ ត្រាំ ធ្វើជាអ្នកដឹកនាំផ្សះផ្សាវិបត្តិនុយក្លេអ៊ែរកូរ៉េខាងជើង ដូចនៅមជ្ឈិមបូព៌ា

ការិយាល័យប្រធានាធិបតីកូរ៉េខាងត្បូង បានប្រកាសនៅ​ថ្ងៃទី១៦ ខែមិថុនា ថា ប្រធានាធិបតីកូរ៉េខាងត្បូង លោក លី ជេម្យុង ​(Lee Jae-Myung) បានស្នើឲ្យប្រធានាធិបតីអាមេរិក ដូណាល់ ត្រាំ ដើរតួនាទីនាំ​មុខក្នុងការស្វែងរកដំណោះស្រាយដោយសន្តិវិធី ដើម្បីកាត់បន្ថយភាពតានតឹងជាមួយកូរ៉េខាងជើង អំឡុងពេលនៃការពិភាក្សាខ្លីមួយ នៅក្នុងកិច្ចប្រជុំកំពូល​នៃ​ប្រទេស​​​រីកលួតលាស់​ឧស្សាហកម្ម​ ហៅ​កាត់​ថា «G7» ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យវិមានប្រធានាធិបតីកូរ៉េខាងត្បូង លោកស្រី កាង យូជុង (Kang Yu-jung) បានថ្លែង​ថា មេដឹកនាំទាំងពីរ បានសួរសុខទុក្ខគ្នាទៅវិញទៅមក អំឡុងពេលថតរូបជុំគ្នារបស់មេដឹកនាំ​នៃ​ ក្រុ​ម​ប្រទេស​​​ជាសមាជិក​ G7 ដែលនៅពេលនោះលោក ត្រាំ បានសាកសួរ លោក លី ជេម្យុង អំពីស្ថានភាពបច្ចុប្បន្ននៃទំនាក់ទំនងរវាង​កូរ៉េទាំងពីរ។ នេះបើយោងតាមការចេញផ្សាយពីសារព័ត៌មាន Reuters។

យោងតាមការិយាល័យប្រធានាធិបតីកូរ៉េខាងត្បូង លោក លី ជេម្យុង បានស្នើឲ្យលោក ត្រាំ ដឹកនាំកិច្ចខិតខំប្រឹងប្រែងដើម្បីដោះស្រាយបញ្ហាកូរ៉េខាងជើងដោយសន្តិវិធី ដូចដែលលោកធ្លាប់បានធ្វើចំពោះបញ្ហាសង្គ្រាមនៅមជ្ឈិមបូព៌ាដែរ។ លោកស្រី យូជុង បានបន្ថែមថា លោក ត្រាំ បានឆ្លើយតបវិញថា លោកនឹងខិតខំប្រឹងប្រែង ដើម្បីដោះស្រាយបញ្ហាកូរ៉េខាងជើងនេះ។

គួររំលឹកផងដែរថា លោក ត្រាំ និងមេដឹកនាំកូរ៉េខាងជើង គីម ជុងអ៊ុន ធ្លាប់បានជួបពិភាក្សាគ្នាចំនួនបីដងរួចមកហើយ អំឡុងពេលដែលលោក ត្រាំ កាន់តំណែងជាប្រធានាធិបតីអាណត្តិដំបូង រួមមានកិច្ចប្រជុំកំពូលជាប្រវត្តិសាស្ត្រនៅប្រទេសសិង្ហបុរីក្នុងឆ្នាំ២០១៨ កិច្ចប្រជុំកំពូលលើកទីពីរនៅទីក្រុងហាណូយក្នុងឆ្នាំ២០១៩ និងការជួបគ្នានៅចុងឆ្នាំដដែលនោះនៅតំបន់គ្មានយោធា (DMZ) រវាងកូរ៉េទាំងពីរ ដែលនៅពេលនោះ ត្រាំ បានក្លាយជាប្រធានាធិបតីអាមេរិកកំពុងកាន់តំណែងដំបូងគេបង្អស់ ដែលបានឈានជើងចូលទៅក្នុងទឹកដីកូរ៉េខាងជើង។

ទោះជាយ៉ាងណាក៏ដោយ កិច្ចខិតខំប្រឹងប្រែងផ្នែកការទូតនាពេលនោះបានទទួលបរាជ័យទាំំងស្រុង បន្ទាប់ពីកិច្ចប្រជុំកំពូលនៅក្រុងហាណូយមិនអាចឈានដល់កិច្ចព្រមព្រៀងលើការរំសាយកម្មវិធីនុយក្លេអ៊ែររបស់កូរ៉េខាងជើង និងការបន្ធូរបន្ថយទណ្ឌកម្មដែលដឹកនាំដោយអាមេរិកនោះឡើយ។

រហូតមកដល់ពេលនេះ លោក ត្រាំ បានបង្ហាញសញ្ញាជាបន្តបន្ទាប់ អំពីការចាប់អារម្មណ៍ក្នុងការស្តារការទូតដោយផ្ទាល់ជាមួយលោក គីម ជុងអ៊ុន ឡើងវិញ។ លោកបានថ្លែងកាលពីខែសីហា ឆ្នាំ២០២៥ ថា លោកទន្ទឹងរង់ចាំជួបមេដឹកនាំកូរ៉េខាងជើងរូបនេះ «នៅក្នុងពេលវេលាដ៏សមស្របណាមួយនាពេលអនាគត» ហើយលោកក៏បានបញ្ជាក់កាលពីខែតុលាផងដែរថា លោក «ចង់» ជួបលោក គីម ម្តងទៀត។

កាលពីសប្តាហ៍មុន លោក ត្រាំ ក៏បានបង្ហោះរូបថតមួយសន្លឹករបស់ខ្លួន ជាមួយលោក គីម ជុងអ៊ុន ដោយគ្មានសរសេរចំណងជើងអ្វីទាំងអស់នៅលើបណ្តាញសង្គម Truth Social ដែលនេះ ហាក់ដូចជាការរំលឹកឡើងវិញអំពីទំនាក់ទំនងការទូតកាលពីអតីតកាលរបស់ពួកគេផងដែរ។

សូមបញ្ជាក់ដែរថា នៅក្នុងកិច្ចប្រជុំកំពូល G7 នាឆ្នាំនេះ គឺជាឆ្នាំទីពីរជាប់ៗគ្នាហើយ ដែលកូរ៉េខាងត្បូងត្រូវបានអញ្ជើញឲ្យចូលរួមក្នុងនាមជាប្រទេសដៃគូ។ ក្រៅពីសមាជិក G7 រួមមានបារាំង, អាល្លឺម៉ង់, សហរដ្ឋអាមេរិក, កាណាដា, អ៊ីតាលី, ជប៉ុន និងចក្រភពអង់គ្លេស ប្រទេសម្ចាស់ផ្ទះក៏បានអញ្ជើញប្រទេសជាច្រើនទៀតឲ្យចូលរួមផងដែរ ដូចជាប្រេស៊ីល, អេហ្ស៊ីប, ឥណ្ឌា និងកេនយ៉ា ជាដើម៕

អត្ថបទ ៖ សាង ស្រីល័ក្ខ