លោក ជី សុផាត នឹងធ្វើសកម្មភាពដើម្បីសង្គមមួយទៀត តាមរយៈដំណើរកំសាន្តទៅតំបន់ព្រំដែនកម្ពុជា ក្នុងបំណងធំ២

លោក ជី សុផាត អ្នកផលិតមាតិកាបែបដំណើរផ្សងព្រេង និងជាអ្នកជំនាញផ្នែកបច្ចេកវិទ្យា នឹងធ្វើដំណើរកំសាន្តទៅកាន់តំបន់ព្រំដែនកម្ពុជាភាគឦសានប្រទេស នៅថ្ងៃទី ២-៦ ខែវិច្ឆិកាខាងមុខនេះ ក្នុងសកម្មភាពសង្គម ដោយបង្ហាញពីធម្មជាតិ ទេសភាពតាមផ្លូវ ជីវិតសហគមន៍ និងការលើកកម្ពស់ទេសចរណ៍ឌីជីថល តាមរយៈវីដេអូរូបភាព 360° (Street View) និងការកែលម្អផែនទី Google Maps។

ក្រោយចូលរួមយ៉ាងសស្រាក់សស្រាំក្នុងយុទ្ធនាការកែតម្រូវផែនទីឌីជីថល ក្នុងដែនអធិបតេយ្យកម្ពុជា ថ្មីៗនេះ លោកក៏បានប្រកាសផែនការដើម្បីសង្គមមួយទៀត តាមរយៈការធ្វើដំណើរកំសាន្តទៅកាន់ខេត្តមណ្ឌលគីរី – ស្ទឹងត្រែង – ព្រះវិហារ និងតំបន់ព្រំដែនកម្ពុជា-ឡាវ ដោយបង្ហាញពីធម្មជាតិ ទេសភាពតាមផ្លូវ ជីវិតសហគមន៍ និងការលើកកម្ពស់ទេសចរណ៍ឌីជីថល តាមរយៈវីដេអូរូបភាព 360° (Street View) និងការកែលម្អផែនទី Google Maps។

តាមរយៈគម្រោងដំណើរកំសាន្តនេះ អាចចាត់ទុកជាការរួមចំណែកផ្សព្វផ្សាយទេសចរណ៍ជាតិផងដែរ ខណៈដំណើរនេះ ធ្វើឡើងក្នុងំគោលបំណងធំ២៖

១. គោលបំណងទី១ គឺបង្កើតវីដេអូដំណើរកំសាន្ត ក្នុងន័យដើម្បីបង្ហាញពីវប្បធម៌ជាតិ ជីវិតសហគមន៍ និងសម្រស់ធម្មជាតិ ដែលផ្តល់មូលបំណងចំពោះការរក្សា និងបន្តអត្តសញ្ញាណខ្មែរ។

២. ឯគោលបំណងមួយទៀត គឺដើម្បីចូលរួមកែលម្អបច្ចុប្បន្នភាពទីតាំងក្នុងកម្មវិធីឌីជីថលរបស់ប្រទេសកម្ពុជា តាមរយៈការបន្ថែមរូបភាព Street View នៅតំបន់ទេសចរណ៍សំខាន់ៗ ធ្វើឱ្យភ្ញៀវទេសចរជាតិ និងអន្តរជាតិ អាចស្វែងរកទីតាំងបានងាយស្រួល និងទុកចិត្តបាន។

លោកថា ដំណើរនេះមិនមែនត្រឹមជាការផលិតវីដេអូប៉ុណ្ណោះទេ ប៉ុន្តែសម្រាប់គុណតម្លៃ និងការចូលរួមក្នុងការបង្កើតអនាគតទេសចរណ៍ឌីជីថលជាមួយគ្នា ដោយអាចបង្ហាញពិភពលោកថា យើងមានទិដ្នភាពល្អជាងការមើលឃើញតែតាមផែនទី Google Maps ។ តួយ៉ាងសកម្មភាពនេះ ក៏ស្របទៅនឹងយុទ្ធនាការកែតម្រូវទីតាំងក្នុងកម្មវិធីផែនទីដែលកំពុងដំណើរការ ក្នុងគោលបំណងចង់ធ្វើឱ្យមានភាពត្រឹមត្រូវចំពោះដែនអធិបតេយ្យភាពឌីជីថលកម្ពុជា។

ទន្ទឹមនេះ លោក ជី សុផាត ក៏បានថ្លែងអំណរគុណទៅកាន់ក្រុមហ៊ុន និងហាងនានាដែលចូលរួមគាំទ្រដល់ដំណើររបស់លោក ដែលរួមមានដូចជា Co- Sponsorship – Bookmebus.com, ហាងសំបុកអាយធី (Sombokit Cambodia), Anagata Type, KOFI Co., Ltd ខណៈការគាំទ្រទាំងនេះ មិនត្រឹមតែជាការជួយដល់ដំណើររបស់លោកប៉ុណ្ណោះទេ ប៉ុន្តែជាការចូលរួមក្នុងការលើកស្ទួយទេសចរណ៍ក្នុងស្រុក និងពង្រឹងភាពងាយស្រួលក្នុងការធ្វើដំណើររបស់យុវជនកម្ពុជា។

មួយវិញទៀត “Motorbike Vlog” នៅរង់ចាំដៃគូសហការបន្ថែមនៅឡើយ។ ដូចនេះ ​សម្រាប់ក្រុមហ៊ុន-ស្ថាប័ន ឬអ្នកចង់ចូលរួមគាំទ្រដល់សកម្មភាពដើម្បីសង្គមមួយនេះ អាចបន្តចូលរួមចំណែក និងសហការបន្ថែម តាមរយៈ Telegram: t.me/CHYSophat ឬ Email: [email protected]៕