តារាចម្រៀង ខេម ដឹកនាំក្រុមតារាបាល់ទាត់កម្ពុជាផ្តល់ឈាម ផ្តល់ក្តីស្រលាញ់សម្រាប់កម្ពុជា

ក្នុងសកម្មភាពចូលរួមចំណែកជួយដល់សង្គម និងដើម្បីសង្គ្រោះជីវិតអ្នកជំងឺដែលត្រូវកាឈាមជាចំបាច់តារាចម្រៀងសម្លេងស្អកលោក ប៉ុន សុណារិន ហៅ ខេម បានស្ម័គ្រចិត្តដឹកនាំក្រុមតារាបាល់ទាត់កម្ពុជាចូលរួមផ្តល់ឈាម ផ្តល់ក្តីស្រលាញ់សម្រាប់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះដែរ តារាចម្រៀងលោក ខេម បានធ្វើការអំពាវនាវក៏ដូចជាបំផុសផងដែរដល់អ្នកគាំទ្រចូលរួមបរិច្ចាគឈាមព្រោះការផ្តល់ឈាម គឺមានអត្ថប្រយោជន៍ជួយសង្គ្រោះជីវិតអ្នកជំងឺនិងខ្លួនឯង។ លោកបញ្ជាក់ថា ការផ្តល់ឈាមគឺជាអំពើល្អដ៏អស្ចារ្យ និងជាការជួយសង្គ្រោះជីវិតមនុស្សយ៉ាងពិតប្រាកដ។

តារាប្រុស ខេម បានឱ្យដឹងថា “ខ្ញុំបានដឹកនាំបងប្អូនសិល្ប:ក្រុមតារាបាល់ទាត់កម្ពុជាមកផ្តល់ឈាមជូនបងប្អូនដែលមានបញ្ហាកង្វះឈាម ដូច្នេះបងប្អូនក៏អាចបរិច្ចាគជាមួយគ្នាបានដែរនៅថ្ងៃទី១៤-១៥ ចាប់ពីម៉ោង៧ព្រឹកតទៅនៅពហុកីឡដ្ឋានជាតិអូឡាំពិក។ រួមគ្នាផ្តល់ឈាម ផ្តល់ក្តីស្រលាញ់សម្រាប់កម្ពុជា”។

លោក ខេម បានបន្តថា នៅថ្ងៃទី១៥ខែវិច្ឆិកានោះដែរ ក៏មានការប្រកួតបាល់ទាត់មិត្តភាព ដើម្បីអបអរសាទរព្រឹត្តិការណ៍ផ្តល់ឈាមក្រោមមូលបទ “យើងផ្តល់ឈាម ផ្តល់ក្តីស្រលាញ់សម្រាប់កម្ពុជា” ។

តាមការកត់សម្គាល់កន្លងមក គឺមានសិល្បករ-សិល្បការិនីជាច្រើនមកហើយបានស្ម័គ្រចិត្តរួមគ្នាក្នុងការបរិច្ចាគឈាមក្នុងគោលបំណងដើម្បីរួមចំណែកជួយសង្គ្រោះជីវិតពលរដ្ឋ និងអ្នកជំងឺដែលកំពុងត្រូវការឈាមជាចាំបាច់ ខណ:លោក ខេម ក៏មិនខុសគ្នាពីសិល្បករ-សិល្បការិនីឯទៀតនោះដែរ៕ ចាន់រ៉ា