ខេម ស្នើមហាជន បន្តផ្តល់ជំនួយសម្ភារ:ស្បៀងអាហារ ដើម្បីលើកទឹកចិត្តកងទ័ពការពារជាតិមាតុភូមិ

តារាចម្រៀងសំឡេងស្អកលោក ខេម បានបន្តស្នើរដល់មហាជនខ្មែរគ្រប់រូប រួមគ្នាសាមគ្គីក្នុងការចូលរួមផ្តល់ជំនួយជាសម្ភារ: ឬស្បៀងអាហារ ដើម្បីលើកទឹកចិត្តកងទ័ពការពារជាតិមាតុភូមិពីការឈ្លានពានរបស់ទាហានថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីកើតមានហេតុការណ៍ការប៉ះទង្គិចគ្នារវាងទាហានកម្ពុជា និងទាហានថៃ កាលព្រឹកថ្ងៃ ទី២៨ ខែឧសភា ឆ្នាំ២០២៥ ស្ថិតនៅចំណុចភូមិតេជោមរកត ឃុំមរកតស្រុកជាំក្សាន្ត ខេត្តព្រះវិហារ គេកត់សម្គាល់ឃើញមានប្រជាជនកម្ពុជាបានយកចិត្តទុកដាក់យ៉ាងខ្លាំង ក្នុងការផ្តល់កម្លាំងចិត្ត ក៏ដូចជាឧបត្ថម្ភដល់កងទ័ពជួរមុខ។

ដើម្បីគាំទ្រដល់កងទ័ពក្នុងបុព្វហេតុការពារជាតិមាតុភូមិ ខេម បានលើកឡើងថា “នៅក្នុងគ្រាដ៏លំបាកនេះ ដែលប្រទេសជាទីស្រលាញ់របស់យើងកំពុងប្រឈមនឹងការឈ្លានពាន យើងទាំងអស់គ្នាឈរយ៉ាងរឹងមាំក្នុងសាមគ្គីភាពមួយ។ ចិត្តរប ស់យើងប្រាថ្នាសុខសុវត្ថិភាព និងកម្លាំងចិត្តដល់វីរកងទ័ពជួរមុខទាំងអស់ ដែលកំពុងការពារទឹកដីនិងប្រជាជាតិយើង”។

តារាចម្រៀងរូបនេះ បន្តថា “យើងខិតខំគាំទ្រតាមគ្រប់មធ្យោបាយដែលអាចធ្វើបាន ទាំងការផ្តល់ជំនួយសម្ភារ: ការលើកទឹកចិត្តផ្លូវចិត្ត និងការបង្ហាញការគាំទ្រយ៉ាងរឹងមាំចំពោះការលះបង់បូជាឈាមស្រស់សាច់ស្រស់របស់បងប្អូនទាហានជួរមុខ។ យើងតស៊ូរួមគ្នាដើម្បីសន្តិភាពនិងយុត្តិធម៌។ ជយោ! វីរទាហានខ្មែរដ៏អង់អាចជាទីគោរព”។

គួរបញ្ជាក់ដែរថា តារាចម្រៀងសំឡេងស្អករូពនេះ ក៏បានចូលរួមចំណែកក្នុងការឧត្ថម្ភថវិកាជូនដល់កងទ័ពជួរមុខនូវទឹកប្រាក់ផ្ទាល់ខ្លួនចំនួន ២០លានរៀលផងដែរ៕ អត្ថបទ៖ ចាន់រ៉ា