ខេម ប្រកាសថា ខ្លួនឆ្លងកូវីដ និងណែនាំឱ្យសាធារណជនចេះការពារខ្លួន

មុននេះ តារាចម្រៀងសំនៀងស្អក ខេម បានប្រកាសឱ្យសាធារណជនជ្រាបថា ខ្លួនកំពុងកើតជំងឺកូវីដ និងដាស់តឿនស្មារតីពលរដ្ឋកម្ពុជាគ្រប់រូបការពារខ្លួនជាមួយវិធានការណែនាំឱ្យបានត្រឹមត្រូវ។

ទោះមិនបានបញ្ជាក់ពីស្ថានភាពសុខភាព តែការប្រកាសរបស់តារាចម្រៀងល្បីឈ្មោះរូបនេះ អាចចាត់ទុកជាសារដាស់តឿនដល់មហាជនគ្រប់រូបមានការប្រុងប្រយ័ត្ន និងការពារតាមវិធានការសុវត្ថិភាពរបស់ក្រសួងសុខាភិបាល ឱ្យបានខ្ជាប់ខ្ជូន ជៀសវាងឆ្លង ឬចម្លងដល់សមាជិកគ្រួសារ សាច់ញាតិ និងមិត្តភក្តិ។

ដ្បិតស្ងប់មួយរយៈពេលទៅហើយក្តី តែកូវីដមិនទាន់ទៅណាឆ្ងាយឡើយ ខណៈប្រទេសក្បែរខាងកម្ពុជាក៏កំពុងសម្តែងក្តីបារម្ភចំពោះការឆ្លងរីករាលដ៏ឆាប់រហ័សនៃវីរុសបំប្លែងថ្មី JN.1 ផងដែរ។ តួយ៉ាង ស្ថានការណ៍ឆ្លងរាលដាលជំងឺកូវីដប្រភេទថ្មីនៅប្រទេសថៃ កំពុងឈានដល់កម្រិតព្រួយបារម្ភសាជាថ្មី ដោយក្នុងរយៈពេលត្រឹមមួយសប្តាហ៍ ពោលគឺចាប់ពីថ្ងៃទី៤-១០ខែឧសភា មានករណីឆ្លង ១៦ ៦០៧ករណី ដែលភាគច្រើនជាប្រភេទអូមីក្រុងបំប្លែងថ្មី JN.1 ហើយក្នុងនោះ មានមនុស្សស្លាប់ ៦នាក់ផងដែរ។

ពាក់ព័ន្ធការផ្ទុះឡើងថ្មីនៃមេរោគនេះ ក្រសួងសុខាភិបាលកម្ពុជាក៏បានចេញសេចក្តីប្រកាសព័ត៌មាន ស្តីពីការបង្កើនការការពារខ្លួនផងដែរដោយនិយាយថា ស្ថានភាពនៃការចម្លងវីរុសកូវីដ-១៩ នៅតែបន្តមាននៅឡើយ ហើយចុងក្រោយនេះគឺពពួកអូមីក្រុងដែលបានបំប្លែងខ្លួនជាបន្តបន្ទាប់ ជាពិសេសពពួកអូមីក្រុងបំប្លែងថ្មីប្រភេទ JN.1 ដែលរកឃើញដំបូង ក្នុងខែសីហា ឆ្នាំ២០២៣ ហើយបានក្លាយរីករាលដាលយ៉ាងឆាប់រហ័សនៅក្នុងតំបន់ជាច្រើននៅទូទាំងពិភពលោក។

ចំពោះរោគសញ្ញានៃកូវីដប្រភេទថ្មីនេះ មិនខុសប្លែកគ្នាពីប្រភេទកូវីដ-១៩ ជំនាន់មុនៗ នោះទេ គឺមានរោគសញ្ញាដូចជា គ្រុនក្តៅ ក្អកស្ងួត ឈឺបំពង់ក ហៀរសំបោរ ចង្អោរ និងក្អួត ដែលមានភាពស្រដៀងទៅ នឹងជំងឺផ្តាសាយធម្មតា។ ដ្បិត JN.1 មានហានិភ័យសុខភាពសាធារណៈជាសកលនៅមានកម្រិតទាប ការបន្តការប្រុងប្រយ័ត្នគឺចាំបាច់ ជាពិសេសចំពោះបុគ្គលដែលមាន ហានិភ័យខ្ពស់នៃការចម្លងជំងឺរួមមាន អ្នកមានប្រព័ន្ធការពាររាងកាយខ្សោយ ជំងឺរ៉ាំរ៉ៃប្រចាំកាយ ទឹកនោមផ្អែម លើសឈាម ជនចាស់ជរា ស្ត្រីមានផ្ទៃពោះ ជាដើម៕