ខេម អំពាវនាវមហាជនចូលរួមផ្តល់កម្លាំងចិត្តជូនវីរៈកងទ័ពជួរមុខ តាមរយៈកម្មវិធីច្រៀងចម្រៀងជាតិ និងជាវអាវ

ក្នុងស្មារតី «សាមគ្គីគ្នាដើម្បីកម្ពុជា» និង ខ្មែរស្រលាញ់ខ្មែរ ខ្មែរជួយខ្មែរ តារាចម្រៀងសំឡេងស្អកលោក ខេម បានចេញមុខអំពាវនាវនិងបំផុសស្មារតីចូលរួមកម្មវិធី “ច្រៀងចម្រៀងជាតិផ្តល់កម្លាំងចិត្តជូនវីរៈកងទ័ពជួរមុខ” នៅថ្ងៃទី១៩ ខែកក្កដា ចុងសប្តាហ៍នេះ នៅពហុកីឡដ្ឋានអូឡាំពិកនា៣រសៀលតទៅ។

ទន្ទឹមគ្នានៃការបំផុសនេះដែរ ខេមក៏បានអំពាវនាវសប្បុរសជនទាំងអស់ចូលរួមបរិច្ចាគថវិកាតាមរយ:ការទិញ “អាវ មោទនៈជាតិខ្មែរ” ដើម្បីជាកម្លាំងចិត្តនិងប្រមូលមូលនិធិជូនកងទ័ពជួរមុខ។ ខេម ថា “បើបងប្អូនចង់បានអាវទាក់ទងមកខ្ញុំ តម្លៃមួយត្រឹមតែ ២០០០០រៀល ថវិកាទាំងអស់ យើងខ្ញុំនិងយកទៅផ្តល់ជូនកងទ័ពវីរៈជួរមុខទាំងអស់”។

ខេម បានបញ្ជាក់ថា ក្នុងន័យខ្មែរស្រលាញ់ខ្មែរ ខ្មែរជួយខ្មែរ តស់យើងទៅច្រៀងចម្រៀងជាតិផ្តល់កម្លាំងចិត្តជូនវីរៈកងទ័ពជួរមុខ នៅថ្ងៃទី១៩ ខែកក្កដា នៅពហុកីឡដ្ឋានអូឡាំពិកនា៣រសៀលតទៅ។

ជាមួយគ្នានេះ លោកក៏បានថ្លែងការអរគុណចំពោះ លោកឧកញ៉ា ហ៊ួត ជា អគ្គនាយកក្រុមហ៊ុនសម្ភារៈសំណង់ ហួត ជា ដែលបានបញ្ជាទិញអាវមោទនៈជាតិខ្មែរ ១០០អាវ ក្នុងន័យដើម្បីជាកម្លាំងចិត្តនិងប្រមូលមូលនិធិជូនកងទ័ពជួរមុខ និងអរគុណដល់សាធារណជនផ្សេងទៀតដេលបានបញ្ជាទិញជាច្រើន។

សូមជម្រាបថា តារាចម្រៀងសម្លេងស្អកលោក ប៉ុន សុណារិន ហៅ ខេម ក្នុងនាមជាប្រធានក្រុមបាល់ទាត់តារាកម្ពុជាបានដឹកនាំក្រុមការងារនិងសមាជិកក្រុមបាល់ទាត់តារាកម្ពុជាកាលពីថ្មីៗកន្លងទៅនេះ បានចុះទៅសួរសុខទុក្ខ និងលើកទឹកចិត្តដល់វីរកងទ័ពរបស់កម្ពុជាដែលកំពុងឈរជើងការពារបូរណភាពទឹកដីដ៏អង់អាចក្លាហាន នៅតាមបន្ទាត់ព្រំដែនតំបន់ប្រាសាទព្រះវិហារ៕ ចាន់រ៉ា