ប៊ី សុធារី នឹងជួបគ្នាជាមួយម្ចាស់ផលិតផលសម្រស់ដ៏ល្បី មាស ចាន់ដាលីន ១១ថ្ងៃត្រង់នេះ

ក្រោយបវរកញ្ញាកម្ពុជា ប៊ី សុធារី លើកឡើងពីចម្ងល់ទាក់ទងនឹងរឿងលក់ផលិតផលសៀមមិនចេះអស់ពីស្តុក ធ្វើឱ្យផ្ទុះការវែកញែក ខណៈបង្កការយល់ច្រឡំរហូតមានការឆ្លើយឆ្លងគ្នាទៅមករវាងអ្នកស្រី មាស ចាន់ដាលីន រួចមក កាលពីម្សិលមិញនេះ បវរកញ្ញាកម្ពុជារូបនេះ បានបញ្ជាក់ពីជំនួបគ្នានាវេលាម៉ោង ១១ថ្ងៃត្រង់ ថ្ងៃទី១០ វិច្ឆិកានេះ។

តួយ៉ាង គម្រោងដែលនឹងត្រូវជួបគ្នានេះ គឺធ្វើតាមការលើកឡើងរៀងៗខ្លួនកាលពីសប្តាហ៍មុន ទាក់ទងនឹងការធ្វើសាក្សីចំពោះភាពស្អាតស្អំត្រឹមត្រូវ ខណៈក៏ដើម្បីរំងាប់មន្ទិលរបស់សាធារណៈទាក់ទងនឹងការពិតនៃការបញ្ចេញស្តុកមិនអស់សោះរបស់ប្រេនដ៏ល្បីមួយក្នុងចំណោមប្រេនល្បីជាច្រើនទៀត ដែលធ្លាប់ផលិតពីរោងចក្រផ្ទះលេខ២។

គួររំលឹក កាលថ្មីៗនេះ មហាជននិងអ្នកគាំទ្រមានការចាប់អារម្មណ៍គ្រប់គ្នាបន្ទាប់បវរកញ្ញា ប៊ី សុធារី បានលើកឡើងជាចម្ងល់ទៅកាន់អ្នកលក់អនឡាញ ពិសេសម្ចាស់ប្រេនល្បីៗ ជុំវិញរឿងលក់ស្តុកអត់ចេះអស់របស់ផលិតផលសៀម។

បន្ទាប់ពីកញ្ញា ប៊ី សុធារី លើកឡើងនិយាយពីរឿងរ៉ាវដែលជាចម្ងល់បែបនេះ ក៏ស្រាប់តែភ្លាមៗនោះ គេឃើញមានការផ្ទុះប្រតិកម្ម និងវែកញែកពីសំណាក់អ្នកគាំទ្រ ពិសេសម្ចាស់ប្រេនធំៗពាក់ព័ន្ធរឿងនេះ។ ក្នុងនោះគេក៏ឃើញម្ចាស់ប្រេនល្បីគឺ អ្នកស្រី មាស ច័ន្ទដាលីន បានបញ្ចេញប្រតិកម្មឆ្លើយតបទៅកញ្ញា ប៊ី សុធារី ផងដែរ។

ទោះបីយ៉ាងណា ប៊ី សុធារី បានចេញមុខបកស្រាយដោយបានបញ្ជាក់ថា ខ្លួនមិនបានវាយប្រហារនណាទេ គឺគ្រាន់តែប្រកាន់គោលជំហរផ្ទាល់ខ្លួនឯងមិនគាំទ្រផលិតផលសៀមប៉ុណ្ណោះ។ សុធារី និយាយថា នេះគ្រាន់តែចម្ងល់របស់នាងប៉ុណ្ណោះហេតុអ្វីបានជាផលិតផលខ្លះឃើញមានបន្តលក់នៅលើទីផ្សារបស់ខ្មែរមកដល់ពេលបច្ចុប្បន្ន ។

ប៊ី សុធារី បន្តថា ប្រសិនជាគាត់ស្អាតស្អំមែន ឬបានផលិតយូរមកហើយមែនគាត់គួរតែបញ្ចេញលេខកូដ ឬការបរិច្ឆេតនៃការផលិតរបស់គាត់ឱ្យយើងបានដឹងថាផលិតផលនោះពិតជាបានផលិតនៅមុនពេលដែលយើងកើតមានបញ្ហាជាមួយសៀមពិតមែន ឬ យ៉ាងណា។ កញ្ញាថា “ខ្ញុំមិនចង់ឲ្យមានការបន្តលក់ ផលិតផលសៀមនៅលើទីផ្សាយើងទៀតទេហើយស ម្រាប់ខ្ញុំគឺនៅតែប្រកាន់គោលជំហររបស់ខ្ញុំដោយពហិកាមិនប្រើប្រាស់ផលិតផលសៀម”។

ជុំវិញរឿងរ៉ាវនេះ សាធារណជនបង្ហាញការគាំទ្រជំនួនដែលអ្នកទាំងពីរត្រៀមជួបគ្នាបន្តិចទៀតផងដែរ៕