«ភ្លើងឆេះក្លឹបក្រោមដី» ជាប់​ក្នុង​បញ្ជី​ពាន​រង្វាន់ Golden Petrel នៃមហោស្រពភាពយន្តសិល្បៈអាស៊ី លើកទី២

ក្រោយជោគជ័យក្នុងការចាក់បញ្ចាំងខ្សែភាពយន្តរឿង «ភ្លើងឆេះក្លឹបក្រោមដី» កាលពីឆ្នាំកន្លងទៅ ផលិតកម្ម LD Pictures នៅថ្ងៃទី១១ ខែកុម្ភៈ ឆ្នាំ២០២៦ បានប្រកាសឱ្យសាធារណជនដឹងថា ភាពយន្តនេះ បានជាប់​ក្នុង​បញ្ជី​សម្រិតសម្រាំង​ (shortlisted) សម្រាប់​ពាន​រង្វាន់ Golden Petrel នៃមហោស្រពភាពយន្តសិល្បៈអាស៊ី លើកទី២ ឆ្នាំ២០២៦ (AAFF) នឹងរៀបចំធ្វើឡើងនៅទីក្រុងម៉ាកាវ ប្រទេសចិន នាខែឧសភាខាងមុខនេះ។

មហោស្រពភាពយន្តសិល្បៈអាស៊ីលើកទី២ ឆ្នាំ២០២៦ (AAFF) គឺជាព្រឹត្តិការណ៍សិល្បៈភាពយន្តអន្តរជាតិមួយ ដែលនឹងធ្វើឡើងនៅទីក្រុងម៉ាកាវ ប្រទេសចិន នាខែឧសភាខាងមុខនេះ។ មហោស្រពភាពយន្តនេះ គឺប្រមូលផ្តុំដោយភាពយន្តរបស់អាសុី ដោយផ្តោតលើការផលិតភាពយន្តដោយឯករាជ្យ វប្បធម៌ មានតម្លៃសិល្បៈយូរអង្វែង និងភាពច្នៃប្រឌិត។

ស្របតាមលក្ខខណ្ឌនេះ «ភ្លើងឆេះក្លឹបក្រោមដី» ត្រូវបានជ្រើសរើសជាប់​ក្នុង​បញ្ជី​សម្រិតសម្រាំង​សម្រាប់​ពាន​រង្វាន់ Golden Petrel នៃមហោស្រពភាពយន្តសិល្បៈអាស៊ី លើកទី២ ឆ្នាំ២០២៦ (AAFF) ។

ភាពយន្តនេះ ជាសាច់រឿងដកស្រង់ពីសោកនាដកម្មពិតមួយ នៃហេតុការណ៍ភ្លើងឆេះក្លឹបកម្សាន្តក្រោមដីមួយកន្លែង កាលអំឡុងពេលនៃវិបត្តិជំងឺកូវីដ១៩ ដែលមានភាពល្បីល្បាញខ្លាំង និងត្រូវបានគេចែករំលែកពេញបណ្តាញទំនាក់ទំនងសង្គម។ បើតាមការស៊ើបអង្កេតរបស់ប៉ូលីសត្រូវបានឱ្យដឹងថា មូលហេតុគឺដោយសារតែផ្ទុះចរន្តអគ្គសនី ប៉ុន្តែបើតាមជំនឿ គេជឿថា មានព្រាយដ៏កាចសាហាវមួយបានធ្វើរឿងនេះឡើង គោលបំណងចង់យកជីវិតអ្នកចម្រៀងប្រុសម្នាក់។

បើតាមលោក លៀក លីដា កាលពីពេលកន្លងមកបានឱ្យដឹងដែរថា ជុំវិញរឿងរ៉ាវនៃការផលិតភាពយន្តដកស្រង់ពីហេតុការណ៍ពិតនេះ គឺចាប់ផ្ដើមផលិតឡើងដោយមានការយលព្រមរបស់គ្រួសារនៃសព ហើយត្រូវបានសិក្សានិងយកចិត្តទុកដាក់អស់រយៈពេលជិតមួយឆ្នាំ ដើម្បីផលិត ខណៈរឿងនេះទទួលបានការគាំទ្រខ្លាំង ក្លាយជាកំណត់ត្រាថ្មីនៃភាពយន្តដ៏មានប្រជាប្រិយភាពរបស់ LD ៕