លោក ដួង សុខគា ហួសចិត្ត ក្រោយចេញសារដាស់តឿនយុវជន មុនចូលឆ្នាំថ្មី

ភ្នំពេញ៖ តារាប្រុសពហុជំនាញ លោក ដួង សុខគា ស្របពេលដែលកៀកជិតចូលមកដល់នៃឱកាសពិធីបុណ្យចូលឆ្នាំថ្មីប្រពៃណីជាតិខ្មែរនៅពេលមុខនេះ បានចេញសារមួយដោយបង្កប់ន័យអប់រំ និងដើម្បីដាស់តឿនស្មារតីដល់យវជនខ្មែរនាពេលបច្ចុប្បន្ន។

ប៉ុន្តែទោះបីជាយ៉ាងណា សម្រាប់លទ្ធផលដែលលោក ដួង សុខគា ទទួលបានមកវិញ គឺបានត្រឹមតែការហួសចិត្តប៉ុណ្ណោះ។ ខ្លឹមសារអប់រំដំបូងរបស់លោក ដួង សុខគា បានលើកឡើងថា៖ “សន្យានឹងខ្លួនឯងសម្រាប់ឆ្នាំថ្មីបានទេប្អូនៗក្មួយៗ? សន្យាថា រាំលេង ឬ លេងល្បែងកម្សាន្តផ្សេងៗកុំឱ្យលើសលស់ដាក់គ្នាណា៎! ហើយបើប៉ះគ្នាបន្តិចបន្តួច កុំវ៉ៃ កុំកាប់ចាក់គ្នា រាប់អានគ្នាទៅ គ្នាឯងទេ”។

ប៉ុន្តែក្រោយមកមិនបានប៉ុន្មានផង ស្រាប់តែលោក ដួង សុខគា បានចេញសារថ្មីមួយទៀតដោយបង្ហាញការហួសចិត្តខ្លាំង។ លោក ដួង សុខគា បានបញ្ជាក់ឱ្យដឹងថា៖ “សាកល្បងបង្ហោះសារអប់រំមួយសម្រាប់ចូលឆ្នាំឃើញថា អ្នកមើល អ្នកឱ្យមេដាយ អ្នកផ្តល់មតិ អ្នកចែកផ្សាយ មានតិចដែរហ្នឹង”។

លោកបន្ថែមទៀតថា៖ “ខ្ញុំសាកមើលស្មានតែគ្រាន់បើ ឮថាបងប្អូនយើងចូលចិត្តសារអប់រំសង្គម។ ដល់ពេលបង្ហោះឡប់ៗនាំគ្នាតិះដៀល (ទិទៀន) ថា អត់មានអី្វអប់រំដល់សង្គម។ ដល់តែបង្ហោះអប់រំ អត់ខ្ចីជួយរវល់។ អីយ៉ាស់ម៉េចអីចេះ? តិចអ្នកបង្ហោះឡប់ៗ ពុលៗដៀលវិញ។

តាមរយ:ការលើកឡើងនេះ មានមតិមួយចំនួនបានបង្ហាញការគាំទ្រលោក ដួង សុខគា ៕

អត្ថបទ៖ ចាន់រ៉ា