ឱក សុគន្ធកញ្ញា រាជិនីស្ពតពាណិជ្ជកម្មប្រចាំប្រទេសកម្ពុជា

ឱក សុគន្ធកញ្ញា កំពូលតារាចម្រៀងជួរមុខផលិតកម្មហង្សមាស កំពុងតែរីកចម្រើនខ្លាំង មិនថាវិស័យសិល្បៈ និងស្ពតពាណិជ្ជកម្ម លើសពីនេះក៏មានគេឲ្យរហស្សនាមអ្នកនាងថា រាជិនីពាណិជ្ជកម្មប្រចាំប្រទេសកម្ពុជា។

នៅលើវិថីសិល្បៈអស់រយៈពេល ២០ ជាងឆ្នាំនេះ អ្នកនាង ឱក សុគន្ធកញ្ញា បានឆ្លងកាត់ឧបសគ្គជាច្រើនទម្រាំបានក្លាយជាតារាចម្រៀងស្រីប្រចាំប្រទេស ដែលមានអ្នកគាំទ្រ និងការកោតសរសើរពីមនុស្សគ្រប់ស្រទាប់វណ្ណៈរហូតមកដល់សព្វថ្ងៃ។ លើសពីនេះអ្នកនាង បានឆ្លងកាត់ផលិតកម្មចំនួន ៣ ទី១ គឺ ផលិតកម្មរស្មីស្ទឹងសង្កែ ចាប់ពីឆ្នាំ ១៩៩៩ ដល់ឆ្នាំ ២០០៥, ទី២ គឺ ផលិតកម្ម U2 ចាប់ពីឆ្នាំ ២០០៦ ដល់ឆ្នាំ ២០០៧, ចំណែកឆ្នាំ ២០០៨ កញ្ញា ក៏បានចូលផលិត Rock ដែលបានចេញចម្រៀងខ្សែរឿង ១ បទ ចំណងជើង បេះដូងរងគ្រោះ និងបទមោទនភាពជាតិខ្មែរ និងនៅឆ្នាំដដែលនោះ អ្នកនាងក៏បានចាកចេញពីផលិតកម្ម Rock ចូលផលិតកម្មរស្មីហង្សមាសរហូតមកដល់បច្ចុប្បន្ននេះ។

អ្នកនាង ឱក សុគន្ធកញ្ញា ក៏បានកសាងកេរ្តិ៍ឈ្មោះលើសពីការស្មាននៅផលិតកម្មរស្មីហង្សមាស និងបានក្លាយជាតារាចម្រៀងស្រីប្រចាំផលិតកម្ម នៅលើតារាងតារាស្រីជួរមុខប្រចាំប្រទេស។ ទន្ទឹមនឹងជោគជ័យលើវិស័យសិល្បៈអ្នកនាង បានក្ដោបកាប់ការផ្សព្វផ្សាយពាណិជ្ជកម្មជាច្រើនមានដូចជា Coca Cola, ទូរស័ព្ទដៃសាមសុង, សាប៊ូកក់សក់ Sunsilk, សាប៊ូកក់សក់ CLEAR, Tick Coffee, Midea, Pond’s, Viso, Ancha, Vaseline, ខោទឹកនោម KoKo Fit, Farlin, Secret-C , R&F, ហតដក លិឆឹង, ម្សៅទឹកដោះគោ Enfagrow , Coseayoung, Chip mong Land, ធនាគារ DGB លើសពីនេះទៀតអ្នកនាងក៏បានបង្កើត Brand ខ្លួនឯងផ្ទាល់ឈ្មោះ ASK។

គួររំលឹកផងដែរថា អ្នកនាង ឱក សុគន្ធកញ្ញា បានចូលរោងជ័យជាមួយលោក អ៊ឹង សុខលី កាលពីថ្ងៃទី ១៦ ខែឧសភា ឆ្នាំ ២០១៩ ហើយអ្នកនាង ក៏ទទួលបានចំណងដៃកូនប្រុសម្នាក់ ឈ្មោះ អ៊ឹង បញ្ញាបុត្រ ហៅ ឆលី៕

អត្ថបទ៖ ផានិត