ខាត់ សុឃីម ចេញសារដាស់តឿនឲ្យថែសុខភាព ក្រោយប្អូនប្រុសស្លាប់មួយប៉ព្រិចភ្នែក

តារាស្រីពហុជំនាញអ្នកនាង ខាត់ សុឃីម បានចេញសារផ្តាំផ្ញើដល់អ្នកគាំទ្រ និងមហាជនឲ្យបង្កើនការប្រុងប្រ័ត្នហើយថែរក្សាសុខភាពឲ្យបានដិតដល់ ពិសេសគឺការធ្វើបុណ្យធ្វើទានអោយបានច្រើនព្រោះថា ជីវិតមនុស្សយើងម្នាក់ៗផុយស្រួយណាស់អាចប្រឈមការស្លាប់គ្រប់ពេល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញសារដាស់តឿនពីសំណាក់តារាស្រីអ្នកនាង ខាត់ សុឃីម នានេះ បន្ទាប់ពីនាង និងក្រុមគ្រួសារក្រកូល​”ខាត់”​ទើបបាត់បង់មនុស្សជាទីស្រលាញ់ដែលត្រូវជាប្អូនប្រុសបង្កើតគឺលោក ខាត់ ចំរើន ដោយសារជំងឺដែលមិនអាចជួយ​សង្គ្រោះបានឡើយ។ អ្នកនាង ខាត់ សុឃីម បានបង្ហោះខ្លឹមសារយ៉ាងក្តុកក្តួលថា មួយប៉ព្រិចភ្នែកមនុស្សម្នាក់បានក្លាយជាផេះបាត់ទៅហើយព្រះអើយ។

អ្នកនាង ខាត់ សុឃីម បានផ្តាំផ្ញើដូច្នេះថា ជីវិតផុយស្រួយណាស់ថែសុខភាពផង ធ្វើបុណ្យធ្វើទានអោយបានច្រើន។សូមជូនផលបុណ្យដល់ប្អូន (ខាត់ ចំរើន )របស់ខ្ញុំទៅកាន់ឋានសុខ។ អ្នកនាងក៏បានបង្ហោះវីដេអូរម្លឹកអនុស្សាវរីយ៍កាលពីក្មេងៗថា ប្អូនខ្ញុំពូកែរណាស់លោកអើយឥឡូវប្អូនខ្ញុំលែងបានច្រៀងអោយយើងស្តាប់ទៀតហើយ ។

សូមរម្លឹកថា តារាកំប្លែង និងចម្រៀងលោក ខាត់ ចំរើន ដែលជាប្អូនប្រុសបង្កើតអ្នកនាង ខាត់ សុឃីម បានទទួលមរណភាពកាលពីព្រឹកថ្ងៃទី២០ ខែវិច្ឆិកា ឆ្នាំ២០២២ ក្នុងវ័យ៤០ឆ្នាំ ដោយសារជំងឺក្រិនថ្លើម បេះដូង និងក្រលៀន។ តាមរយ: ដំណឹងមរណភាពតារាកំប្លែងលោក ខាត់ ចំរើន នេះគេឃើញមានអ្នកគាំទ្រព្រមទាំងសិល្បករ-សិល្បការិនីជាច្រើនបានសម្តែងការសោកស្តាយចំពោះការបាត់បង់ធន់ធានសិល្បករដ៏មានប្រជាប្រិយភាព និងទេពកោសល្យផ្នែកសិល្ប:ស្ទើរគ្រប់ជំនាញ៕

អត្ថបទ៖ ចាន់រ៉ា