មនុស្ស ៣ នាក់ពាក់ព័ន្ធធ្លាក់អេក្រង់ LED សង្កត់ក្រុមចម្រៀង Mirror នឹងកាត់ទោសខែក្រោយ

នាយកគម្រោងពីរនាក់ និងអ្នកបច្ចេកទេសម្នាក់ត្រូវបានចោទប្រកាន់ពីបទរាយការណ៍ខុសអំពីទម្ងន់នៃអេក្រង់ដែលបណ្តាលឱ្យអេក្រង់ LED ទម្ងន់ ៦០០ គីឡូក្រាមធ្លាក់មកចំកណ្តាលឆាក កំឡុងពេលសម្តែងរបស់ក្រុមចម្រៀង Mirror និងធ្វើឱ្យអ្នករាំពិការ។

នៅថ្ងៃទី ២ ខែ កុម្ភៈ នេះយោងទៅតាមប្រភពព័ត៌មាន HK01 បានរាយការណ៍ថា ឧប្បត្តិហេតុអេក្រង់ LED ដែលប៉ះពាល់យ៉ាងធ្ងន់ធ្ងរដល់ការប្រគុំតន្ត្រីរបស់ក្រុម Mirror ក្នុងខែ កក្កដា ឆ្នាំ ២០២២ ត្រូវបានកាត់ទោសនៅតុលាការ Kowloon ទីក្រុងហុងកុង។ ជនជាប់ចោទរួមមានអ្នកគ្រប់គ្រងគម្រោងនៃ ក្រុមហ៊ុន Engineering Impact ពីរនាក់ និងបូករួមអ្នកបច្ចេកទេសម្នាក់ទៀត។

ពួកគេត្រូវបានគេចោទប្រកាន់ថាបានរាយការណ៍ខុសអំពីទម្ងន់នៃអេក្រង់ ដែលបណ្តាលឱ្យអេក្រង់ LED ទម្ងន់ ៦០០ គីឡូក្រាមធ្លាក់មកកណ្តាលឆាកកំឡុងពេលសម្តែង។ ធ្វើឱ្យអ្នករាំ២នាក់បានរងរបួសក្នុងនោះជនរងគ្រោះម្នាក់ទៀតត្រូវពិការជាអចិន្ត្រៃយ៍ ដោយកំពុងសម្រាកព្យាបាលនៅមន្ទីរពេទ្យនៅឡើយ។

ជាមួយគ្នាសវនាការនឹងប្រព្រឹត្តទៅនៅថ្ងៃទី ៣០ ខែមីនា ក្នុងអំឡុងពេលនោះព្រះរាជអាជ្ញានឹងរៀប ចំឯកសារដើម្បីផ្ទេរសំណុំរឿងទៅតុលាការស្រុក។ ជនជាប់ចោទទាំងបីនាក់ត្រូវបានដោះលែងឱ្យ នៅក្រៅឃុំជាមួយនឹងទឹកប្រាក់ ១០,០០០ ដុល្លារហុងកុង (ជិត ១,៣០០ ដុល្លារអាមេរិច) ដោយហាមឃាត់មិនឱ្យចាកចេញពីហុងកុង។

គួររម្លឹកដែលថា កាលពីថ្ងៃទី ១១ ខែវិច្ឆិកាឆ្នាំមុនប៉ូលីសបានចាប់មនុស្ស ៥ នាក់ជាប់ពាក់ព័ន្ធក្នុងករណីនេះ ប៉ុន្តែនៅពេលបច្ចុប្បន្ននេះប៉ូលិសរកឃើញមនុស្ស៣នាក់ក្នុងចំណោមពួកគេត្រូវបានចោទប្រកាន់ពីបទសមគំនិតក្លែងបន្លំនឹងត្រូវឡើងសវនាការពេលខាងមុខនេះ៕

ប្រែសម្រួល៖នាងតូច

ចុចអាន៖ប៉ូលិស ហុងកុង ចាប់ខ្លួនមនុស្ស ៥ នាក់ ពាក់ព័ន្ធករណីលាក់អេក្រង់ LED ធ្លាប់សង្កត់ក្រុមចម្រៀង Mirror