ជីវិតកម្សាន្ដ

ក្រោយផ្ទុះការរិះគន់ គូម៉ា ចេញមុខបកស្រាយករណីក្រុមការងារថតធ្លាក់ពីលើឆាកប្រគំតន្ត្រី

បានផុស

១ year មុន

នៅ

ថ្ងៃចន្ទ ១៣ មីនា ២០២៣

ដោយ

តារាចម្រៀងលោក គូម៉ា ចេញមុខបកស្រាយភ្លាមៗ ក្រោយផ្ទុះការរិះគន់ជុំវិញក្រុមការងារថតក្នុងការប្រគំតន្ត្រីមួយបានធ្លាក់ពីលើឆាកយ៉ាងភ្ញាក់ផ្អើល។ ប៉ុន្តែលោកបែរជានៅច្រៀងជាធម្មតា ហាក់ដូចគ្មានរឿងអ្វីកើតឡើងបន្តិចសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីនេះកើតឡើងអំឡុងពេលដែលតារាចម្រៀងលោក គូម៉ា បានបង្ហាញវត្តមាននៅលើឆាកតន្ត្រីរបស់ក្រុមហ៊ុនមួយ នាខេត្តបាត់ដំបង។

តាមរយៈការបកស្រាយរបស់លោក គូម៉ា បានលើកឡើងថា បន្ទាប់ពីមានការចែករំលែកនូវវីដេអូដែលក្រុមការងារថតបានធ្លាក់ពីលើឆាកតន្ត្រីភ្លាមៗនេះក៏មានការរិះគន់ និងសំនួរជាច្រើនសួរថា ហេតុអ្វីលោកមិនឈប់ច្រៀង ហើយទៅជួយគាត់ផង?។

លោក គូម៉ា បញ្ជាក់ថា «ចំពោះមតិរិះគន់ និងសំនួរទាំងនេះ ពិតជាធ្វើឲ្យខ្ញុំរំភើបមែនទែន ដោយសារហេតុអ្វីខ្ញុំនិយាយបែបនេះ គឺព្រោះរាល់មតិរិះគន់របស់ពួកគាត់បានបង្កប់នូវក្ដីស្រលាញ់ និងចង់ជួយនៅពេលឃើញក្រុមការងារធ្លាក់ពីលើឆាកក្នុងស្ថានភាពបែបហ្នឹង ប៉ុន្តែរឿងមួយទៀតដោយសារពួកគាត់អត់បានដឹង និងយល់អំឡុងពេលកាលៈទេសៈបែបនេះ។ ដូច្នេះខ្ញុំធ្វើវីដេអូនេះឡើង គឺដើម្បីឲ្យបងប្អូនបានជ្រាប និងយល់ពីស្ថានភាពដែលកើតឡើយយប់មិញ»។

លោក គូម៉ា បាននិយាយទៀតថា ជាក់ស្ដែងលោកក៏មិនខុសពីមហាជនដែរ ពេលឃើញក្រុមការងារធ្លាក់ពីលើឆាកភ្លាម គឺអារម្មណ៍លោកមានភាពច្របូកច្របល់ដូចគ្នាតែម្ដង តែពេលគាត់ធ្លាក់ពីលើឆាកភ្លាម គឺមានបងប្អូនក្រុមការងារ ៤ ឬ ៥ នាក់ បានស្ទុះមកជួយគាត់យ៉ាងយកចិត្តទុកដាក់។

ម្យ៉ាងទៀត ការប្រគំតន្ត្រីនោះជាការផ្សាយផ្ទាល់ ដូច្នេះក្រុមការងារ ក៏លើកដៃជាសញ្ញាដើម្បីឲ្យលោកច្រៀង ហើយសម្ដែងបន្ត។ តែការច្រៀងសម្ដែងនោះ អារម្មណ៍លោកនៅតែមានភាពច្របូកច្របល់ខ្លាំង ព្រោះគិតពីក្រុមការងារធ្លាក់ពីលើឆាក។

តារាប្រុសលោក គូម៉ា និយាយបន្ថែមទៀតថា នៅពេលខ្លួនបានច្រៀង និងសម្ដែងចប់ភ្លាម ក៏ចុះពីលើឆាកដើរសំដៅទៅរកកន្លែងស្តង់ដែលក្រុមការងារយកគាត់ទៅសម្រាកនោះ ដើម្បីសួរនាំពីសុខទុក្ខរបស់គាត់ថា តើប៉ះពាល់ត្រង់កន្លែងណាខ្លះ? (គាត់ឈឺចង្កេះ និងបែកបបូរមាត់)។

លោក គូម៉ា ថា គ្រាឃើញស្ថានភាពបែបនេះ លោកក៏បាននិយាយលើកទឹកចិត្ត និងជូនថវិកាខ្លះ ដើម្បីឲ្យគាត់(អ្នកថត) ព្រមទាំងមានក្រុមការងារច្រើនទៀតបានស្វះស្វែងជួយគាត់អស់ពីកម្លាំងកាយចិត្តតែម្ដង៕

អត្ថបទ ៖ ចាន់រ៉ា