ជីវិតកម្សាន្ដ

មូលហេតុតារាកំប្លែងជើងចាស់ល្បីឈ្មោះ ជុំ រស្មី ហៅ ស្រីទូច ឃ្លាតឆ្ងាយពីរង្វង់សិល្បៈ

បានផុស

៣ years មុន

នៅ

ថ្ងៃពុធ ២២ មីនា ២០២៣

ដោយ

តារាកំប្លែងជើងចាស់លោកស្រី ជុំ រស្មី ហៅ ស្រីទូច បន្ទាប់ពីចូលប្រឡូកក្នុងវិស័យសិល្បៈអស់រយៈពេលច្រើនឆ្នាំ និងសាងបានប្រជាប្រិយភាព ហើយការគាំទ្រយ៉ាងច្រើនក្រាស់ក្រែលមកនោះ ឃើញថា អំឡុងប៉ុន្មានឆ្នាំចុងក្រោយនេះ តារាកំប្លែងជើងចាស់រូបនេះបានឃ្លាតឆ្ងាយពីសិល្បៈស្ទើរទាំងស្រុងតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះការបាត់វត្តមានរបស់តារាកំប្លែងលោកស្រី ទូច ពីវិថីសិល្បៈនេះ ក៏បានធ្វើឲ្យមហាជនដែលជាអ្នកគាំទ្រមួយចំនួនតែងលើកជាចម្ងល់ថា តើប្រហែលជាគាត់បានលាឈប់ពីសិល្បៈ ឬមួយយ៉ាងណា?។ ក្នុងនោះក៏មានការសួរនាំចង់ដឹងពីបញ្ហាសុខទុក្ខរបស់លោកស្រី ទូច និងស្វាមី ដែលជាតារាកំប្លែងជើងចាស់ គឺ នាយ ត្រដក់ ផងដែរ។

ឆ្លើយតបជុំវិញរឿងរ៉ាវខាងលើនេះ តារាកំប្លែង លោកស្រី ទូច បានថ្លែងប្រាប់ឲ្យដឹងតាមទូរស័ព្ទថា អំឡុងមួយរយៈចុងក្រោយនេះ លោកស្រីពិតជាបានឃ្លាតឆ្ងាយពីសិល្បៈមែន។ ចំណែកឯមូលហេតុដែលគាត់បាត់មុខពីសិល្បៈនោះ ដោយសារជួបបញ្ហាមួយចំនួន ពោលគឺកន្លងមកត្រូវមានបន្ទុកនៅមើលថែជំងឺអ្នកម្ដាយដែលជាវីរសិល្បការិនីជើងចាស់ល្បីឈ្មោះ លោកស្រី កែវ មន្ថា និងម្យ៉ាងទៀត កន្លងទៅ លោកស្រី (ទូច) គាត់ក៏មានជំងឺផ្ទាល់ខ្លួន ថែមទាំងបញ្ហាចាក់ស្រេះមួយចំនួនទៀតដែលត្រូវប្រឈមដោះស្រាយនៅប្រព័ន្ធតុលាការ។

តារាកំប្លែងលោកស្រី ទូច បានបន្តថា បន្ទាប់ពីចំណាយពេលនៅមើលថែជំងឺអ្នកម្ដាយជាទីស្រលាញ់មួយរយៈធំ លោកស្រី បានឃ្លាតឆ្ងាយសិល្បៈទាំងស្រុង ប៉ុន្តែក្រោយពេលអ្នកម្ដាយលោកស្រីបានចែកឋាន កាលពីអំឡុងឆ្នាំ ២០២១ កន្លងទៅ រហូតមកដល់ពេលនេះ លោកស្រី រួមនឹងបងប្អូនទាំងអស់ កំពុងមានបញ្ហាធំមួយទៀតជាមួយប្តីក្រោយរបស់លោកស្រី កែវ មន្ថា ដែលជាម្ដាយតារាកំប្លែងលោកស្រី ទូច។

លោកស្រីនិយាយទៀតថា បញ្ហាដែលប្រឈម និងត្រូវដោះស្រាយនៅតុលាការនាពេលនេះ គឺជារឿងទំនាស់មរតកដែលលោកស្រី កែវ មន្ថា បានសរសេរបណ្ដាំទុកឲ្យកូនៗ ចៅៗ ព្រមនឹងប្តីក្រោយរបស់លោកស្រី កែ វ មន្ថា។ ជាមួយគ្នានេះ លោកស្រី ទូច បានសង្កត់ធ្ងន់ថា បណ្តាំមរតកដែលត្រូវបានបន្សល់ទុកដោយអ្នកម្តាយ កែវ មន្ថា នោះ មកដល់ពេលឥឡូវ គឺលោកស្រី រួមនឹងបងប្អូន កូនចៅ នៅមិនទាន់ទទួលបានយុត្តិធម៌ទេ ខណៈប្តីក្រោយលោកស្រី កែវ មន្ថា ពុំបានបែងចែកទ្រព្យសម្បត្តិឲ្យបានស្មើទៅតាមអ្វីដែលសរសេរទុកក្នុងបណ្តាំមរតកទេ។

តារាកំប្លែងរូបនេះ បន្ថែមថា សម្រាប់ពេលនេះអ្វីដែលចង់បាននោះ លោកស្រី រួមនឹងបងប្អូន សូមទាមទារឲ្យមានការផ្តល់ភាពយុត្តិធម៌ចំពោះពួកគាត់ដូចដែលមានសរសេរនៅក្នុងលិខិតបណ្តាំមរតករបស់លោកស្រី កែវ មន្ថា ដែលជាម្ដាយ។ ពាក់ព័ន្ធរឿងរ៉ាវ នៃបណ្តាំមរតកខាងលើ យើងមិនទាន់អាចស្វែងរកការបកស្រាយពីភាគីម្ខាងទៀតដែលស្វាមីក្រោយរបស់លោកស្រី កែវ មន្ថា បានទេជុំវិញបញ្ហានេះ ដូច្នេះយើងសង្ឃឹមថា នឹងមានការបកស្រាយនៅពេលក្រោយ៕

អត្ថបទ ៖ ចាន់រ៉ា

Related Topics:តារាកំប្លែង ជុំ រស្មី ស្រីទូច

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា