រឿងថ្មីរបស់ Johnny Depp នឹងចាក់បញ្ចាំងលើកដំបូង ក្រោយឈ្នះក្តីលើអតីតភរិយា Amber Heard

ខ្សែភាពយន្តដំបូងរបស់តារាសម្តែង Johnny Depp បន្ទាប់ពីឈ្នះការកាត់ទោសបទបរិហារកេរ្តិ៍លើអតីតភរិយារបស់លោក Amber Heard ត្រូវបានជ្រើសរើសជាភាពយន្តចាក់បញ្ចាំងបើកឆាកសម្រាប់មហោស្រពភាពយន្ត Cannes នៅខែក្រោយក្នុងប្រទេសបារាំង។

ព័ត៌មាននេះត្រូវបានប្រកាសដោយអ្នករៀបចំមហោស្រពភាពយន្តទីក្រុង Cannes កាលពីថ្ងៃទី៥ ខែ មេសា ដោយភាពយន្តដែលសម្ដែងដោយ Johnny មានឈ្មោះថា “Jeanne du Barry”។ នៅក្នុងខ្សែភាពយន្តនេះ Johnny Depp ដើរតួជាស្តេច ហើយខ្សែភាពយន្តនេះនឹងមានការចាក់បញ្ចាំងលើកដំបូងនៅលើពិភពលោកនៅឯទីក្រុង Cannes នៅថ្ងៃទី ១៦ ខែឧសភា។

តារាសម្តែង Johnny Depp កម្របានលេចមុខតាមខ្សែភាពយន្ត ឬទូរទស្សន៍ណាស់ ចាប់តាំងពីការកាត់ក្តីរឿងបទបរិហារកេរ្តិ៍លើអតីតភរិយារបស់លោក Amber Heard បានបញ្ចប់ក្នុងខែមិថុនា ឆ្នាំ ២០២២។ ប៉ុន្តែក៏មានព្រឹត្តិការណ៍ចំនួន ២ ដែល Johnny Depp ចូលរួមដូចជាកម្មវិធី MTV Video Music Awards និងកម្មវិធីបង្ហាញម៉ូដ Savage X Fenty របស់ Rihanna ។

យ៉ាងណាមិញតារាសម្តែង Johnny Depp កំពុងព្យាយាមកសាងអាជីពរបស់គាត់ឡើងវិញ បន្ទាប់ពីបានឈ្នះការកាត់ក្តីលើអតីតភរិយារបស់លោក Amber Heard នៅពេលដែលគាត់ត្រូវបានចោទប្រកាន់ពីបទរំលោភបំពាននិងប្រើប្រាស់អំពើហឹង្សា ៕

ប្រែសម្រួល៖នាងតូច

ចុចអាន៖តារាអន្តរជាតិ ១០ រូប មានសម្រស់ក្មេងជាងវ័យពិតៗ