ជីវិតកម្សាន្ដ

ចាន់ សុផានី នៅតែទទូចស្វែងរកយុត្តិធម៌ ខណៈ នាង និង កូន កំពុងបាក់ទឹកចិត្តខ្លាំង

បានផុស

៤ ខែ មុន

នៅ

ថ្ងៃចន្ទ ១៥ ឧសភា ២០២៣

ដោយ

អតីតតារាសម្ដែង និងជាពិធីការិនីល្បីឈ្មោះអ្នកនាង ចាន់ សុផានី មកទល់ពេលនេះ នាងនៅតែចេញមកទទូចស្វែងរកយុត្តិធម៌ពាក់ព័ន្ធរឿងអតីតស្វាមីជាតារាចម្រៀង គឺ លោក ហ្សូណូ ដែលគ្មានទំនួលខុសត្រូវក្នុងការផ្តល់ជំនួយដើម្បីចិញ្ចឹមកូនស្រីជាតំណក់ឈាមរួមកាលពីរួមរស់ជាស្វាមី-ភរិយានឹងគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាង ចាន់ សុផានី កាលពីថ្មីៗនេះក៏បានទម្លាយអារម្មណ៍លំបាកនៅលើបណ្ដាញសង្គមឲ្យមហាជនបានដឹងថា បច្ចុប្បន្ននាងកំពុងតែជួបការលំបាក និងខ្វះខាត។ ក្នុងនោះដែរ កូនស្រីអ្នកនាងកំពុងប្រឈមនឹងជំងឺបាក់ទឹកចិត្ត ហើយចង់ជួបមុខឪពុក គឺ តារាប្រុសលោក ហ្សូណូ ប៉ុន្តែមិនអាចឲ្យពួកគេទំនាក់ទំនងបានទេ។

បញ្ជាក់ពីស្ថានភាព និងការលំបាកក្នុងពេលបច្ចុប្បន្ន អតីតតារាសម្ដែងស្រីរូបនេះ បាននិយាយថា ពេលនេះនាង និងកូន កំពុងបាក់ទឹកចិត្តខ្លាំង។ ក្នុងនោះ ចាន់ សុផានី ក៏នៅតែទទូចស្វែងរកយុត្តិធម៌សម្រាប់ម្ដាយកូនអ្នកទាំង ២ ផងដែរ។ អ្នកនាង ចាន់ សុផានី លើកឡើងថា «ពេលនេះ ខ្ញុំពីរនាក់ម្ដាយកូន បាក់ទឹកចិត្តខ្លាំងណាស់ សូមរកយុត្តិធម៌ឲ្យខ្ញុំផង ព្រោះគេកំពុងបង្ខំឲ្យខ្ញុំ និងកូន ដើរដល់ផ្លូវទាល់មែនទែនហើយបងប្អូន ពិតជាអយុត្តិធម៌ណាស់»។

អ្នកនាងនិយាយបន្ថែមថា «កាតព្វកិច្ចជាម្ដាយត្រូវបានគេព្រួតគ្នាធ្វើបាបខ្ញុំ រងភាពអយុត្តិធម៌មកយូរហើយបងប្អូន មេត្តាអាណិតខ្ញុំផង និងជួយរកយុត្តិធម៌ឲ្យខ្ញុំផង»។ សូមជម្រាបដែរថា គិតមកដល់ពេលនេះ អតីតតារាសម្ដែង និងពិធីការិនីអ្នកនាង ចាន់ សុផានី បានឃ្លាតឆ្ងាយពីវិថីសិល្បៈច្រើនឆ្នាំមកហើយ ចាប់តាំងពីផ្ទុះរឿងរ៉ាវបែកបាក់ស្វាមីដែលជាតារាចម្រៀង លោក ហ្សូណូ ដោយបានបន្សល់ទុកកូនស្រីម្នាក់ឲ្យនាងជាអ្នករ៉ាប់រងការចិញ្ចឹមមើលថែ។

ជាការពិតណាស់ បន្ទាប់ពីស្ពាយឈ្មោះជាស្ត្រីមេម៉ាយ អតីតតារាស្រីរូបនេះ មិនដែលត្អូញត្អែរស្រែករកជំនួយចិញ្ចឹមកូនស្រីនេះទេ។ ប៉ុន្តែថ្មីៗនេះ បានធ្វើឲ្យមានការភ្ញាក់ផ្អើល ខណៈអតីតតារាសម្ដែង អ្នកនាង ចាន់ សុផានី បានចេញមុខប្រកាសជាសាធារណៈសុំជំនួយពីអតីតស្វាមីក្នុងពេលដែលនាងកំពុងជួបការលំបាកខ្លាំងលើផ្នែកជីវភាពនាពេលបច្ចុប្បន្ននេះ។

យ៉ាងណាមិញទោះបីមានការប្រកាសស្វែងរកជំនួយពីស្វាមីពិតមែន តែរហូតមកទល់ពេលនេះ ពុំមានការឆ្លើយតបពីសំណាក់លោក ហ្សូណូ ដែលជាស្វាមី និងជាឪពុកនោះទេ។ ទង្វើនេះបានធ្វើឲ្យអ្នកនាង ចាន់ សុផានី កើតក្តីមិនសុខចិត្ត ក៏ចេញមកទាមទាររកយុត្តិធម៌ ខណៈនាងបានបើកកកាយរឿងរ៉ាវមួយចំនួនពាក់ព័ន្ធអតីតស្វាមីលោ ហ្សូណូ ផងនោះ៕

អត្ថបទ ៖ ចាន់រ៉ា