សូម្បីតែអ្នកគ្រប់គ្រងរបស់ Lisa និង Jenie ក៏ចាកចេញពីផលិតកម្ម YG ព្រមគ្នា

កាលពីពេលថ្មីៗនេះ មានសេចក្តីរាយការណ៍ LINE TODAY ថា Alice Kang ដែលជាអ្នកគ្រប់គ្រងអន្តរជាតិរបស់ Lisa និង Alison Chang ព្រមទាំងអ្នកគ្រប់គ្រងជនជាតិកូរ៉េ Huit​ របស់ Jennie ពួកគេទាំងអស់បានដើរចេញពី YG​ ព្រមៗគ្នា។

បើយោងតាមគណនី LinkedIn របស់ ​Alice Kang នាងបានសរសេរយ៉ាងវែងអន្លាយថា នាងធ្វើការនៅផលិតកម្ម YG អស់រយៈពេលជាង ៥ ឆ្នាំ ក្នុងនាមជាអ្នកគ្រប់គ្រងជាន់ខ្ពស់ ហើយកុងត្រារបស់នាងជាមួយ YG បានបញ្ចប់នៅខែតុលា ឆ្នាំ ២០២៣។

តាម​រយៈ​ព័ត៌មាន​នេះ​បាន​ធ្វើ​ឲ្យអ្នក​គាំទ្រ​រំពឹង​ទុក​អំពី​អនាគត​របស់ Lisa ជាមួយ YG។ ហើយមានការសន្មត់ថា តើនាងបានបញ្ចប់កិច្ចសន្យាជាមួយភ្នាក់ងារហើយឬនៅ? ប៉ុន្តែ​មាន​អ្នក​ចូល​មក​បញ្ចេញ​មតិ​ថា កិច្ចសន្យារបស់អ្នកគ្រប់គ្រងជាមួយនាងគឺដាច់ដោយឡែក។

ក្រោយមក ផលិតកម្ម YG Entertainment បដិសេធមិនធ្វើអត្ថាធិប្បាយម្ដងទៀតថាតើ BLACKPINK នឹងបន្តកុងត្រាជាមួយស្លាកសញ្ញានេះឬអត់?

ទោះបីជាយ៉ាងណាក៏ដោយ បើ​តាម​របាយការណ៍​ប្រចាំ​ត្រីមាស​ទីបី​របស់​ខ្លួន​កាល​ពី​ថ្ងៃ​ទី ១៤ ខែ​វិច្ឆិកា​​ ផលិតកម្មមួយនេះបានបញ្ចាក់ថា “កិច្ចសន្យាផ្តាច់មុខជាមួយសិល្បករ គឺចូលក្នុងអំឡុងពេលការចរចាគិតចាប់ពីកាលបរិច្ឆេទនៃការផ្សាយជាសាធារណៈ”។

សូមបញ្ចាក់ថា BLACKPINK បង្ហាញខ្លួននៅថ្ងៃទី ០៨ ខែសីហា ឆ្នាំ ២០១៦ និងបានប្រារព្ធខួបលើកទី ៧​របស់ខ្លួនកាលពីខែសីហាកន្លងទៅ នៅពេលដែលកុងត្រារបស់ពួកគេផុតកំណត់។ ស្របពេលដែលក្រុមនេះ នៅតែមិនទាន់ផ្តល់ចម្លើយច្បាស់លាស់ ថាតើក្រុម​នឹង​បន្ត​កុងត្រា​ឬ​អត់?

ប្រែសម្រួល៖ សាង ស្រីល័ក្ខ

ចុចអាន៖Lisa ត្រូវ​ទស្សនិកជន​កូរ៉េ​ស្នើឲ្យចាក​ចេញ​ពី Blackpink ព្រោះធ្វើឲ្យខូចមុខមាត់ K-pop