នាយ ក្រិន ប្រកាសដាក់លក់ដី និងផ្ទះក្រោយ​ខាត​បង់ពីការរកស៊ី និងអាជីពសិល្បៈ

បន្ទាប់បាត់វត្តមានពីសិល្ប:មួយរយៈធំកន្លងទៅនេះ ស្រាប់តែតារាកំប្លែងមាឌល្អិតកម្សត់ស្នេហ៍នាយ ក្រិន កាលពីថ្មីៗនេះបានបញ្ជាក់ថា បច្ចុប្បន្នលោកកំពុងរស់នៅជាមួយកូនៗទាំង៣នាក់ឯស្រុកកំណើតខេត្តបាត់ដំបង។

តាមរយ:ការផ្តល់សម្ភាសន៍ប្រាប់ “កម្ពុជាថ្មី” តារាកំប្លែងនាយ ក្រិន បានឲ្យដឹងថា លោកនិងកូនៗទាំង៣សព្វថ្ងៃគឺមានសុខទុក្ខជាធម្មតា ប៉ុន្តែអ្វីដែលនាយជួបការលំបាកពេលនេះដោយសារនៅជាប់ជំពាក់បំណុលធនាគាររាប់ម៉ឺនដុល្លារដែលតម្រូវឲ្យរូបលោកត្រូវបង្ខំចិត្តប្រកាសដាក់លក់ដី និងផ្ទះនៅឯស្រុកកំណើតខេត្តបាត់ដំបងដើម្បីយកលុយមកដោះបំណុលដែលនៅជំពាក់គេ។

នាយ ក្រិន បានលើកឡើងទៀតថា មូលហេតុដែលនាំឲ្យលោកជំពាក់លុយធនាគារដោយសារការរកស៊ីខាតកាលពីមុនៗពោលគឺការបើកហាងនៅភ្នំពេញដូច្នេះទើបគ្រានោះបានយកប្លង់ដី ឬប្លងផ្ទះដើម្បីដាក់បញ្ចាំយកលុយមកធ្វើទុនពង្រឹងមុខរបរ ប៉ុន្តែពេលនោះដែរគឺមុខរបរនៃការរកស៊ីមិនអំណោយផលគឺចេះតែខាតធ្វើឲ្យបំណុលក៏កាន់តែកើនពីកន្លែងមួយទៅកន្លែងមួយដូច្នេះហើយរាល់ថ្ងៃធ្វើឲ្យលោកជួបការលំបាករកលុយដោះបំណុលទាំងនេះ។

នាយ ក្រិន និយាយបន្តថា “សម្រាប់ខ្ញុំដោយសារបច្ចុប្បន្នគឺជួបការពិបាកក្នុងការរកលុយសងការប្រាក់ធនាគារក៏សម្រេចចិត្តទាំងបង្ខំដាក់លក់ដី និងផ្ទះនៅបាត់ដំបងហើយរឿងម្យ៉ាងទៀតអាជីពកំប្លែងសិល្ប:ឥឡូវក៏ត្រូវបានផ្អាក់ទាំងស្រុងដូច្នេះហើយខ្ញុំគ្មានផ្លូវអ្វីដើម្បីរកចំណូលមកដោះស្រាយទៀតទេ ម្លោះហើយមានតែលក់ដីនិងផ្ទះដោះបំណុងគេ”។

តារាកំប្លែងនាយ ក្រិន បញ្ជាក់បន្ថែមទៀតថា ទំហំដីដែលលោកដាក់លក់នេះ គឺមានបណ្តោយ១០០ម៉ែត្រ និងទទឹង៥០​ម៉ែត្រ ដោយលក់ក្នុងតម្លៃជាង១២ម៉ឺនដុល្លារ(ចរចាបាន)។ ចំពោះរឿងមួយទៀតដែលនាយកំពុងជួបការលំបាកដែរនោះដោយសារបច្ចុប្បន្នលោកឪពុករបស់នាយក៏ធ្លាក់ខ្លួនឈឺនៅលើកន្ទេលមានរយ:ពេល៣ឆ្នាំមកហើយផងដែរ។

មហាជន និងអ្នកគាំទ្រកត់សម្គាល់ថា ការបាត់ដំណឹងពីសិល្ប:របស់នាយ ក្រិន នេះគឺ​ចាប់តាំងពី​នាយជួបរឿងអកុសលត្រូវបែកបាក់ភរិយាទី២ដោយសារលួចផិតក្បត់មានអ្នកថ្មីរហូត​ឈានដល់​ផ្លូវ​លែងលះគ្នា។ មិនតែប៉ុណ្ណោះអាជីព​បើក​ហាងរបស់នាយ ក្រិន ក៏ត្រូវបានបិទទ្វារទាំងស្រុងព្រោះក្ស័យធន់។

ដោយសារហេតុផលខាងលើនេះ ទើបកាលពី​ចុងឆ្នាំ​២០១៩ នាយ​ ក្រិន បាន​សម្រេចវេចបង្វិច និងនាំកូនៗទាំង៣នាក់យ៉ាងកម្សត់ចាកចេញពីរាជធានីភ្នំពេញដើម្បីទៅរស់នៅឯស្រុកកំណើតនៅ​ខេត្តបាត់ដំបង។ យ៉ាងណាបន្ទាប់ពីកើតមានរឿងរ៉ាវនេះឡើងតារា​កំប្លែង​មាឌ​ល្អិត​អភ័ព្វស្នេហ៍លោក ទេស សុជន ហៅ​នាយ​ក្រិន នាអំឡុងឆ្នាំ២០២១កន្លងទៅ ក៏លោកបានធ្លាក់ខ្លួនឈឺផងដែរ តែក្រោយព្យាបាលគឺជំងឺលោកក៏បានជាសះស្បើយឡើងវិញប៉ុន្តែចាប់តាំងពីពេលនោះនា យ ក្រិន ក៏បាត់ដំណឹងសូន្យឈឹងពីអាជីពសិល្ប:៕

អត្ថបទ៖ ចាន់រ៉ា