នាយក្រិន រលាកត្រចៀកធ្ងន់ធ្ងរ ដល់ថ្នាក់វង្វេងស្មារតី ត្រូវបញ្ជូនទៅពេទ្យកាល់ម៉ែត្រ ដើម្បីសង្គ្រោះបន្ទាន់

នារសៀលថ្ងៃទី១១ ខែមីនា ឆ្នាំ២០២៦ លោក សាវិន ហ្វីលីព បានបញ្ជាក់ពីស្ថានភាពធ្ងន់ធ្ងរនៃជំងឺរបស់នាយក្រិន ខណៈដែលកាន់តែធ្ងន់ធ្ងរដោយសារមេរោគទ្បេីងពេញឈាម និងខួរក្បាល ដល់ថ្នាក់វង្វេងស្មារតី ទើបត្រូវបង្ខំចិត្តបញ្ជូនទៅកាន់មន្ទីរពេទ្យកាល់ម៉ែត្របន្ទាន់ ដេីម្បីសង្រ្គោះជីវិត។

ក្នុងវីដេអូជិត ២នាទី លោក ហ្វីលីព បានរៀបរាប់ពីស្ថានភាពតារាកំប្លែងដ៏កម្សត់រូបនេះ ក្នុងស្ថានភាពស្ទើរតែបាត់ស្មារតីលើគ្រែពេទ្យ និងត្រៀមបញ្ជូនមកកាន់មន្ទីរពេទ្យកាល់ម៉ែត្រ ក្រុងភ្នំពេញ នារសៀលនេះ ដើម្បីសង្គ្រោះបន្ទាន់។

ស្ថានភាពរបស់នាយក្រិននាពេលនេះ បានធ្វើឱ្យសាធារណជន និងអ្នកគាំទ្ររបស់នាយក្រិនទាំងក្នុងប្រទេស និងក្រៅប្រទេស មានការបារម្ភ និងអាណិតអាសូរចំពោះលោកផងដែរ។

បើតាមលោក សាវិន ហ្វីលីព ថវិកាសម្រាប់ចំណាយលើការព្យាបាលតារាកំប្លែងរូបនេះ គឺមួយផ្នែកបានពីលោក ហ៊ុន គឹមជាតិ និងជំទាវ ហាក់ ដាណា ដែលបានបរិច្ចាគ ១០០០ដុល្លារ ជួយនាយក្រិនផងដែរ។

លោក សាវិន ហ្វីលីព ក្នុងនាមជារៀមច្បង និងអ្នកស្និតស្នាល បានជួសមុខឱ្យក្រុមគ្រួសាររបស់នាយក្រិនផ្ទាល់ ថ្លែងអំណរគុណដល់ម្ចាស់ជំនួយ ព្រមនិងស្នើរសប្បុរសជនដែលមានបំណងជួយពោះម៉ាយកម្សត់កូន ៣រូបនេះ ចូលរួមបរិច្ចាគផងដែរ៕